Muallif: master

Prezident Shavkat Mirziyoyev 3-fevral kuni urbanizatsiya va uy-joy qurilishida yangicha yondashuvlarni joriy etish yuzasidan taqdimot bilan tanishdi.

Aholining uy-joyga boʻlgan talabini qondirish maqsadida soʻnggi 8 yilda mamlakatimizda 120 million kvadrat metr yoki 600 mingdan ziyod xonadonlar qurilib, foydalanishga topshirildi. Uy-joy sotib olishga koʻmaklashish uchun 541 ming nafar fuqaroga 103 trillion soʻm arzon ipoteka kreditlari va subsidiyalar ajratildi.

Qurilish ishlarining koʻlami kengaygani qurilish materiallari sanoati rivojiga katta turtki berib, koʻplab hududlarning “drayveri”ga aylandi. Urbanizatsiya darajasi 1991-yildagi 40,3 foizdan 51 foizga yetdi.

Davlatimiz rahbari qilingan ishlar hali yetarli emasligini koʻrsatib oʻtdi. Respublika boʻyicha har yili 200 mingtaga yaqin yangi oila tashkil topmoqda. Bu yangi uylar, yoʻllar va ijtimoiy infratuzilmaga talab yanada ortadi degani. Qolaversa, hozirda aholining bir kishi boshiga oʻrtacha 18,9 kvadrat metr turar joy maydoni toʻgʻri kelmoqda. Bu koʻrsatkichni kamida 23 kvadrat metrga yetkazish uchun 2040-yilgacha yangi uy-joy qurilishi surʼatini 280 mingtaga oshirish lozim.

Shu maqsadda urbanizatsiya sohasida boshqaruv yangi tizim asosida yoʻlga qoʻyilib, alohida qoʻmita tuzildi, uning oldiga uy-joy qurish hajmlarini bosqichma-bosqich oshirish vazifasi qoʻyildi. Xususan, 2026-yilda 140 ming, 2027-yilda 150 ming va 2028-yilda 160 ming xonadonli uy-joylar qurish rejalashtirilgan.

Prezidentimiz biznes va startaplar rivoji uchun sharoit yaratish, sanoat va AT klasterlarini shakllantirish, mehnat unumdorligini oshirishda aql bilan tashkil etilgan urbanizatsiya muhim oʻrin tutishini taʼkidladi.

Taqdimotda yer resurslaridan samarali foydalanish masalalariga ham alohida eʼtibor qaratildi. Xalqaro tashkilotlarning hisob-kitoblariga koʻra, aholi punktlari tartibsiz kengayib borishi ayrim hududlarda kelgusida ekin yerlarining tanqisligiga olib kelishi mumkin.

Shu munosabat bilan eskirgan uy-joy fondini yangilash, uy-joy qurilishida renovatsiya ulushini oshirish zarurligi taʼkidlandi. Bunda renovatsiya hissasini hozirgi 15 foizdan 2040-yilga qadar 60 foizga yetkazish, “Yangi Oʻzbekiston” massivlarini barpo etishni kengaytirib, 120 taga yetkazish zarurligi qayd etildi.

Bugungi kunda qurilish sohasidagi ruxsat olish jarayonlari 9 ta bosqichdan iborat boʻlib, oʻrtacha 90-120 kun vaqt talab qilmoqda. Shu bilan birga, xalqaro amaliyotda “qurilishga tayyor yer” mexanizmi orqali bu ishlarga ketadigan vaqt 7-15 kunni tashkil etayotgani koʻrsatib oʻtildi.

Mamlakatimizda ushbu tizimni joriy etish taklif qilindi. Unga koʻra, barcha tayyorgarlik jarayonlari va ruxsatnomalarni rasmiylashtirish yer maydonlari auksionga qoʻyilishidan oldin bajariladi. Natijada tadbirkor auksionda yerni yutib olgandan soʻng qoʻshimcha hujjat yigʻmasdan va kelishuvlardan oʻtmasdan, barcha hujjatlarni avtomatik tarzda olish imkoniga ega boʻladi. Qurilishga tayyor boʻlmagan yerlarni auksionga chiqarish taqiqlanadi, jarayonlar esa shaffof va qisqa muddatlarda amalga oshirilishi taʼminlanadi.

Qurilish sifati, birinchi navbatda, loyiha hujjatlariga bogʻliq. “ToshboshplanLITI”, “OʻzshaharsozlikLITI”, “OʻzGAShKLITI”, “Qishloq qurilish loyiha” tashkilotlarining faoliyatini tubdan yaxshilash, buning uchun yuqori malakali xorijiy mutaxassislarni jalb qilish va zamonaviy boshqaruv tizimini joriy qilish zarurligi qayd etildi.

Urbanizatsiya va uy-joy qurilishi jarayonlarini toʻgʻri va samarali rejalashtirish uchun raqamli texnologiyalardan keng foydalanish kerak. Bu borada taqdimotda bosh va master rejalarning yagona maʼlumotlar bazasi, qurilishga tayyor yer maydonlari bazasi – “Yer banki”, koʻp kvartirali uylarning yagona geoaxborot bazasi, “eskrou” tizimi, quruvchilar reytingi va boshqalardan iborat “Uy-joy” axborot tizimini ishlab chiqish taklif etildi.

Prezidentimiz taqdim etilgan takliflarni maʼqullab, sohada rejali, hisob-kitobga asoslangan va uzoq muddatli yondashuvlarni izchil joriy etish, belgilangan koʻrsatkichlar ijrosini taʼminlash yuzasidan mutasaddilarga tegishli topshiriqlar berdi.

Prezident Shavkat Mirziyoyev 2-fevral kuni koʻmir va uran sanoatida amalga oshirilayotgan ishlar hamda yaqin istiqbolga moʻljallangan rejalar yuzasidan taqdimot bilan tanishdi.

Koʻmir ishlab chiqarish hajmlarini oshirish, sohada raqobat muhitini kuchaytirish va mavjud zaxiralardan samarali foydalanish masalalari muhokama qilindi.

Qayd etilganidek, 2025-2026-yillar kuz-qish mavsumida 10 million tonna koʻmir qazib olish rejalashtirilgan boʻlib, bu oʻtgan mavsumga nisbatan 1,3 million tonnaga koʻpdir. Hozirgacha 9 million tonna koʻmir qazib olindi, oʻsish 590 ming tonnani tashkil etdi. Keyingi mavsumda ishlab chiqarish hajmini 11 million tonnaga yetkazish zarurligi qayd etildi.

Buning uchun Toshkent va Janubiy hududlarda joylashgan konlarni oʻzlashtirishni jadallashtirish, selektiv qazib olishni kengaytirish, autsorsing asosida qoʻshimcha ekskavator va texnikalar jalb qilish muhim ekani taʼkidlandi. Xususiy tadbirkorlar ishtirokini kengaytirish orqali 2026-yilda qoʻshimcha 2,5 million tonna koʻmir qazib chiqarish rejalashtirilgan.

Angrendagi Nishbosh koʻmir konini oʻzlashtirish loyihasiga alohida eʼtibor qaratildi. Zaxiralarining hajmi 233 million tonna va qiymati qariyb 500 million dollarga baholanayotgan ushbu investitsiya loyihasi doirasida 2026-yilda qazib olish ishlarini boshlash hamda 1 million tonna koʻmir qazib chiqarish, kelgusida yillik quvvatni 10 million tonnaga yetkazish koʻzda tutilgan. Loyiha doirasida 880 ta doimiy ish oʻrni yaratiladi.

Taqdimotda koʻmirni chuqur qayta ishlash asosida yangi turdagi sanoat mahsulotlarini ishlab chiqarishga qaratilgan loyiha ham koʻrib chiqildi. “Oʻzkimyosanoat” aksiyadorlik jamiyati tashabbusi bilan koʻmirni kimyoviy qayta ishlash orqali polimer mahsulotlar olishni tashkil etish rejalashtirilgan. Loyiha qiymati 5 milliard dollar boʻlib, uning natijasida yiliga 8-9 million tonna koʻmirni qayta ishlash va 1,18 million tonna polimer mahsulotlari ishlab chiqarish quvvatlari barpo etiladi.

Oʻtgan yili mamlakatimizda 7 ming tonna uran ishlab chiqarilib, aniqlangan zaxiralar esa 139 ming tonnaga yetdi.

Joriy yilda Arnasoy, Gʻarbiy Qizilqoq, Janubiy Jongeldi, Sharqiy Agʻron konlarini oʻzlashtirishni boshlash rejalashtirilgan.

Xomashyo qazib olish hajmining koʻpayishi munosabati bilan uni qayta ishlash quvvatlarini ham oshirish zarurligi qayd etildi.

Uranni qayta ishlash quvvatlarini sulfat kislotasi hamda uni ishlab chiqarish uchun zarur boʻlgan texnik oltingugurt bilan barqaror taʼminlash chora-tadbirlari belgilab olindi.

Prezidentimiz koʻmir va uran sanoatida rejalashtirilgan loyihalarni oʻz vaqtida va sifatli bajarish, ishlab chiqarish hajmlarini oshirish, iqtisodiy samaradorlikni kuchaytirish yuzasidan mutasaddilarga tegishli topshiriqlar berdi.

Prezident Shavkat Mirziyoyev 2-fevral kuni Navoiy xalqaro aeroporti faoliyati samaradorligini oshirish hamda aviatsiya korxonalarini transformatsiya qilish yuzasidan taqdimot bilan tanishdi.

Navoiy xalqaro aeroportining asosiy koʻrsatkichlari 2025-yilda 2024-yilga nisbatan oʻsganiga qaramasdan, havo kemalariga xizmat koʻrsatish, yoʻlovchi va yuk tashish boʻyicha maksimal quvvatlaridan toʻliq foydalanilmayapti.

Shuningdek, aeroport infratuzilmasi, texnika parki, yuk va yoʻlovchi terminallarini modernizatsiya qilish, faoliyat jarayonlarini raqamlashtirish zarur.

Taqdimotda Navoiy xalqaro aeroportini loyihaviy boshqaruv tamoyillari asosida rivojlantirish taklif etildi.

Aeroportni “Uzbekistan Airports” AJning markazlashgan operativ boshqaruv tizimidan ajratgan holda, unga mahalliy va xorijiy aviakompaniyalar bilan yoʻlovchi va yuk tashish, tranzit hamda texnik qoʻnishlar boʻyicha mustaqil muzokaralar olib borish hamda shartnomalar tuzish huquqi beriladi.

Aeroport daromadlarini uning infratuzilmasini modernizatsiya qilish, yoqilgʻi rezervuarlarini kengaytirish, havo kemalarini taʼmirlash va boʻyash xizmatlarini joriy etishga yoʻnaltirish orqali aviatsiya xizmatlari eksportini oshirish vazifalari belgilandi.

Navoiy xalqaro aeroportini rivojlantirish boʻyicha ishlab chiqilgan biznes rejasi toʻgʻrisida axborot berildi. Unga koʻra, tijorat va noaviatsion faoliyat koʻrsatkichlari 50 foizga oshiriladi, 25 tadan ortiq aviakompaniyalarning doimiy parvozlari yoʻlga qoʻyilib, qayta ishlanadigan yuk hajmi 20 ming tonnadan oshiriladi.

Aeroport hududida havo kemalariga texnik va tijorat xizmatlari koʻrsatishga ixtisoslashgan “porto-franko” erkin bojxona zonasini tashkil etish taklif qilindi.

2029-yil 1-yanvarga qadar havo kemalariga xizmat koʻrsatish uchun olib kiriladigan maxsus texnika va ehtiyot qismlar bojxona toʻlovlaridan ozod qilinadi. Shuningdek, hududdagi mehmonxona aeroport tasarrufiga oʻtkazilishi belgilandi.

Taqdimotda fuqaro aviatsiyasi korxonalarini transformatsiya qilish masalalariga alohida eʼtibor qaratildi.

Korxonalar faoliyati samaradorligini oshirish va moliyaviy barqarorlikni taʼminlash maqsadida xarajatlarni qisqartirish, resurslardan oqilona foydalanish hamda asosiy faoliyat turiga xos boʻlmagan xizmatlarni autsorsingga oʻtkazish boʻyicha kompleks chora-tadbirlar haqida axborot berildi.

Energiya tejovchi texnologiyalarni joriy etish, elektr energiyasida harakatlanuvchi maxsus transport vositalaridan foydalanish orqali ekspluatatsion xarajatlarni kamaytirish zarurligi qayd etildi.

2026-yildan boshlab “Uzbekistan Airways” va “Uzbekistan Airports” aksiyadorlik jamiyatlari tomonidan nosohaviy faoliyatni moliyalashtirish toʻxtatilishi belgilandi. “Uzbekistan Airports” faoliyati 18 ta, “Uzbekistan Airways” faoliyati esa 16 ta ustuvor vazifa asosida amalga oshiriladi.

Jumladan, korxonalarda xizmatlar sifatini oshirish orqali raqobatbardoshlikni mustahkamlash, xizmat va mahsulot tannarxini hisoblashda maqbul metodologiyalarni joriy etish, ishlab chiqarish jarayonlarining barcha bosqichlarini raqamlashtirish, kadrlar tayyorlash va ularning malakasini oshirish ustuvor vazifalar sifatida belgilandi.

Transformatsiya doirasida tashkiliy tuzilmalarni qayta koʻrib chiqish, shtat birliklarini maqbullashtirish, xalqaro kredit reytinglarini oshirish, IPOga chiqish hamda korporativ xalqaro obligatsiyalarni joylashtirish boʻyicha chora-tadbirlar amalga oshiriladi.

Yig‘ilishda aviatsiya sohasida kadrlar tayyorlash tizimini tubdan takomillashtirish masalalari, jumladan, Fuqaro aviatsiyasi universiteti va uning qoshida aviatsiya texnikumini tashkil etish ishlarining borishi ko‘rib chiqildi.

Taʼlim muassasalari AQShning “Embry-Riddle”, Fransiyaning “ENAC” kabi yetakchi xalqaro aviatsiya taʼlim markazlari bilan hamkorlikda tashkil etiladi. Universitetda bort kuzatuvchi, aviatsiya texnikasi boʻyicha mutaxassislar va mexaniklar kabi amaliy kasblar bilan birgalikda uchuvchilik, muhandislik, havo harakati dispetcherligi, boshqaruv boʻyicha ham kadrlar tayyorlash va ilmiy dasturlar yoʻlga qoʻyiladi.

Prezidentimiz takliflarni maʼqullab, mutasaddilarga tegishli topshiriqlar berdi.

Prezident Shavkat Mirziyoyev 30-yanvar kuni “Oʻzbekneftgaz” aksiyadorlik jamiyati faoliyati samaradorligini oshirish masalalari yuzasidan taqdimot bilan tanishdi.

Mamlakatimizda energetika xavfsizligini mustahkamlash, energiya resurslari, jumladan, tabiiy gazga boʻlgan ichki talabni barqaror qondirish hamda iqtisodiyot tarmoqlarini uzluksiz taʼminlash boʻyicha izchil ishlar amalga oshirilmoqda. Shu bilan birga, iqtisodiyot va aholining tabiiy gazga boʻlgan ehtiyoji ortib borayotgani yangi zaxiralarni aniqlash, mavjud konlar samaradorligini oshirish va yangilarini ishga tushirishni taqozo etmoqda.

Shu munosabat bilan “Oʻzbekneftgaz” aksiyadorlik jamiyatining oldiga sohada natijadorlikni tubdan oshirish va zamonaviy yondashuvlarni joriy etish vazifalari qoʻyilgan.

Taqdimotda qayd etilganidek, 2025-yilda jamiyat korxonalari tomonidan 25,2 milliard kub metr tabiiy gaz qazib chiqarilib, 56 ta yangi quduq burg‘ilandi, 29 ta quduq mukammal ta’mirlandi.

2026-2027-yillarda tabiy gaz chiqarish hajmini barqaror darajada ta’minlash, 300 dan ortiq geologik-texnik chora-tadbirlarni amalga oshirish rejalashtirilgan.

Taqdimotda buning uchun amalga oshirilishi lozim bo‘lgan ustuvor vazifalar to‘g‘risida axborot berildi.

Jumladan, geologiya-qidiruv va geologik-texnik tadbirlar samaradorligini oshirish, zaxiralarni koʻpaytirish va qazib chiqarish hajmlarining barqarorligini taʼminlash, xaridlar tartib-taomillarini takomillashtirishga alohida eʼtibor qaratiladi.

Shuningdek, gazni chuqur qayta ishlash orqali qoʻshilgan qiymat zanjirini yaratish, import oʻrnini bosuvchi eksportbop mahsulotlar ishlab chiqarish, jamiyat va uning korxonalarini moliyaviy sogʻlomlashtirish choralari koʻriladi.

Kompaniya faoliyatida operatsion samaradorlikni oshirish, xususan, sohaga oid boʻlmagan aktivlarni tasarrufdan chiqarish, homiylik toʻlovlarini toʻxtatish hamda xarajatlarni maqbullashtirish orqali moliyaviy barqarorlikni taʼminlashga ustuvor ahamiyat qaratilishi qayd etildi.

Ishlab chiqarish jarayonlarini raqamlashtirish, sohada sunʼiy intellekt texnologiyalarini keng joriy etish, shuningdek, ichki nazorat va komplayens tizimini kuchaytirish, moliyaviy aktivlar harakatini nazorat qilish, korrupsiya va manfaatlar toʻqnashuvining oldini olish masalalari jamiyat faoliyatining muhim ustuvor yoʻnalishlari sifatida belgilandi.

Davlatimiz rahbari belgilangan vazifalar va rejalashtirilgan barcha tadbirlar ijrosini aniq hisob-kitob, qatʼiy intizom hamda shaxsiy javobgarlik asosida taʼminlash yuzasidan mutasaddilarga topshiriqlar berdi.

Taqdimotda geologiya-qidiruv ishlarini olib borish jarayonida, shu jumladan Surxondaryo viloyatida qayd etilgan texnogen holatlarga ham to‘xtalib o‘tildi. Bunday holatlar yangi istiqbolli maydonlarni izlash, quduqlarni chuqur burg‘ilash va geologik qatlamlarni o‘rganish jarayonlarining tabiiy tarkibiy qismi bo‘lib, ular dunyo amaliyotida ham ko‘p uchrab turadi. Yurtimizda bunday vaziyatlarda tegishli choralar ko‘rib borilayotgani ta’kidlandi.

Prezidentimiz mutasaddilarga geologik tadqiqotlar olib borilayotgan hududlarda doimiy monitoringni kuchaytirish, zamonaviy nazorat texnologiyalarini joriy etish hamda aholi xavfsizligini ta’minlash masalalariga alohida e’tibor qaratish yuzasidan ko‘rsatmalar berdi.

Prezident Shavkat Mirziyoyev 30-yanvar kuni Jizzax viloyatida amalga oshirilayotgan islohotlar natijadorligi va kelgusidagi ustuvor vazifalar yuzasidan yigʻilish oʻtkazdi.

Oʻtgan yillarda olib borilgan islohotlar va tizimli chora-tadbirlar natijasida viloyat iqtisodiyotida tarkibiy transformatsiya yuz berdi. Natijada hudud agrar sohadan diversifikatsiyalangan sanoat, xizmatlar va zamonaviy agroklasterlarga ixtisoslashdi. Toʻqimachilik, qurilish materiallari, avtomobilsozlik, elektrotexnika va turizm kabi yangi oʻsish drayverlari shakllandi.

Yalpi hududiy mahsulotda sanoat ulushi 9,1 foizdan 18,8 foizga oshdi, qishloq xoʻjaligining ulushi 50 foizdan 36 foizga kamaydi. Shuningdek, ishsizlik va kambagʻallik tegishlicha 4,9 va 5,8 foizga kamaydi, eksport 1,8 barobar, xizmat koʻrsatish 1,6, sanoat ishlab chiqarishi hajmi 1,9 barobar koʻpaydi.

25 ta yirik hamda 533 ta oʻrta va kichik investitsiya loyihalari ishga tushirildi, 1,4 milliard dollar xorijiy investitsiya oʻzlashtirildi. Eksportchi korxonalar soni 160 taga yetib, eksport hajmi 285 million dollarni tashkil qildi.

Yigʻilishda viloyatda kambagʻallik va ishsizlikni yanada qisqartirish, sanoat, xizmat koʻrsatish va qishloq xoʻjaligida keskin oʻsishga erishish boʻyicha rejalar koʻrib chiqildi.

Xususan, 2026-2027-yillarda yalpi hududiy mahsulotning oʻsish surʼatlarini 8,5 foizga yetkazish, sanoatda ishlab chiqarish hajmini 8 foizga oshirish, 5 milliard dollar xorijiy investitsiya jalb qilish va yillik eksport hajmini 500 million dollarga yetkazish rejalashtirilgan.

Eʼtiborlisi, oʻtgan yillarda investitsiyalar asosan xomashyo qazib olish yoki oddiy yigʻuv ishlab chiqarishga yoʻnaltirilgan boʻlsa, endilikda yuqori qoʻshilgan qiymatga ega sanoat loyihalariga yoʻnaltiriladi.

Bundan tashqari, joriy yilda viloyatda ishsizlik darajasini 3 foizga, kambagʻallikni 2,8 foizga tushirish, 182 ta mahallani jinoyatchilikdan xoli hududga aylantirish koʻzda tutilgan.

Davlatimiz rahbari bu maqsadlarga viloyatdagi mahallalarni chuqur ixtisoslashtirmasdan erishib boʻlmasligini qayd etdi.

Shu munosabat bilan viloyatda kelgusi ikki yilda yangi model rivojlantiriladi. Hududdagi 304 ta mahallaning solishtirma ustunliklari tahlil qilinib, ularning bogʻdorchilik, chorvachilik, sabzavot va polizchilik, sanoat, servis hamda turizm yoʻnalishlariga ixtisoslashuvini chuqurlashtirish dasturi ishlab chiqildi.

Dastur doirasida 5 ming gektar eski bogʻ va tokzorlarda sertifikatlangan koʻchatlar ekish, 4,6 ming gektar sanoatlashgan plantatsiyalar barpo etish, 10 ming gektar aholi tomorqasi va ijara yer maydonlarida hosildorligi yuqori va eksportbop mahsulotlar yetishtirish, 101 ming bosh chorva mollarining naslini yangilash, 5 ta sanoat mikromarkazlari, 6 ta yirik turizm majmualarini tashkil etish, har bir tuman markazida istirohat bogʻlarini barpo qilish va gavjum koʻchalar tashkil etish kabi ishlar amalga oshiriladi.

Yigʻilishda “drayver” loyihalar infratuzilmasini mustahkamlash uchun joriy yilda 200 milliard soʻm ajratilishi belgilandi. Sanoatni rivojlantirish maqsadida 2026-2027-yillarda umumiy qiymati 2,7 milliard dollarlik yirik investitsiya loyihalari amalga oshiriladi. Bunda viloyatdagi qoʻrgʻoshin-rux, volfram, oltin va boshqa noruda konlardan samarali foydalanish lozimligi koʻrsatib oʻtildi.

Zomin tumanida qishloq xoʻjaligi ilmiy-sanoat parki loyihasining taqdimotida makkajoʻxorini qayta ishlab, yuqori fruktozali sirop va allyuloza ishlab chiqarish quvvatlarini yaratish rejalashtirilgani aytildi.

Shuningdek, qishloq xoʻjaligi yoʻnalishida naslli chorva mollarni xarid qilish, tuyachilikni rivojlantirish, “Jayilma” kanalini rekonstruksiya qilish choralari koʻriladi.

Davlatimiz rahbari viloyatni rivojlantirishda togʻli va choʻl hududlarning salohiyatini alohida yondashuvlar asosida roʻyobga chiqarish zarurligini taʼkidladi. Jumladan, joriy yilda 25 ming gektar lalmi va yaylov yerlarini foydalanishga kiritish va yaylovlardan samarali foydalanish boʻyicha uch yillik dastur ishlab chiqish rejalashtirilgan.

Yigʻilishda Jizzax viloyatining turizm salohiyati ham tahlil qilindi. Aydar-Arnasoy koʻllar tizimi, shuningdek, Baxmal, Forish, Zafarobod, Sharof Rashidov va Gʻallaorol tumanlarining imkoniyatlari toʻliq ishga solinmayotgani qayd etildi.

Shu munosabat ushbu tumanlarda turizm majmualarini tashkil etish, Arnasoy aeroportini kengaytirish, xalqaro avtomobil yoʻllar boʻyida savdo-servis majmualarini qurish rejalari koʻrib chiqildi.

Joriy yilda mahallalarda ijtimoiy obyektlar, yoʻllar, ichimlik suvi, kanalizatsiya va elektr tarmoqlari qurilishi uchun 30 million dollar, kelgusi yilda esa yana 10 million dollar mablagʻ ajratiladi. Buning hisobiga 14 mahalladagi ijtimoiy soha obyektlari, olis 28 ta mahallani bogʻlovchi 105 kilometr yoʻllar, 9 ta mahalla aholisi uchun 50 kilometr ichimlik suvi, elektr tarmoqlari, 13 ta mahallada 65 kilometr oqova suv tarmoqlari quriladi va taʼmirlanadi.

Shaharsozlik yoʻnalishida Baxmal, Zafarobod va Gʻallaorol tumanlarini fazoviy rejalashtirish va bosh rejalarini ishlab chiqish koʻzda tutilgan.

Shuningdek, Jizzax shahri va Sharof Rashidov tumani yagona aglomeratsiya hududi sifatida rivojlantiriladi. Bu boʻyicha ishlab chiqiladigan bosh rejada shahar ichidagi tirbandliklarni kamaytirish maqsadida 10 kilometrlik aylanma yoʻl qurish, shahar va tumanni bogʻlaydigan yagona jamoat transport tizimini yoʻlga qoʻyish, yagona maʼmuriy bino qurish orqali tashkilotlarni bir joyga koʻchirish nazarda tutiladi.

Yigʻilish yakunida mutasaddilarga viloyatni yanada rivojlantirish doirasidagi har bir loyihani aholi bandligi hamda turmush darajasini oshirish bilan bogʻlab bajarish boʻyicha topshiriqlar berildi.

Anqara shahriga rasmiy tashrif doirasida Oʻzbekiston Respublikasi Prezidenti Shavkat Mirziyoyev va Turkiya Respublikasi Prezidenti Rejep Tayyip Erdogʻan Hatay viloyatida mamlakatimiz tomonidan barpo etilgan “Oʻzbekiston” turar joy majmuasining ochilish marosimida ishtirok etdilar.

Marosimda soʻzga chiqqan davlatimiz rahbari uch yil oldin sodir boʻlgan vayronkor zilzila qardosh turk xalqi uchun ogʻir sinov boʻlganini taʼkidladi. Oʻzbekiston ushbu fojiali davrning dastlabki kunlaridanoq Turkiyaga har tomonlama yordam koʻrsata boshladi.

Qisqa fursatda 100 nafar oʻzbekistonlik qutqaruvchi va 70 nafar tibbiyot xodimi falokat sodir boʻlgan hududga yetib bordi. Qidiruv-qutqaruv ishlari natijasida 18 kishi qutqarildi, 200 nafarga yaqin jabrlanganlar vayronalar ostidan chiqarildi. Dala shifoxonasi 4 ming nafar bemorga tibbiy yordam koʻrsatdi.

Prezident Rejep Tayyip Erdogʻan tashabbusi bilan zilzila oqibatlarini bartaraf etish boʻyicha keng koʻlamli dasturlar amalga oshirilayotgani alohida qayd etildi. Bugungi kunga qadar mamlakatda 455 mingdan ortiq uy-joy qurildi.

Oʻzbekiston, oʻz navbatida, qisqa muddatlarda Hatay viloyatining Arsuz tumanida 300 dan ziyod toʻliq jihozlangan xonadon, jami 24 ta koʻp qavatli uydan iborat barcha zarur infratuzilmaga ega zamonaviy turar joy majmuasini barpo etdi.

Turkiya Prezidenti ushbu majmua nafaqat jabrlangan oilalar uchun yangi uy, balki oʻzbek va turk xalqlari oʻrtasidagi abadiy doʻstlikning yorqin namunasi ekanini taʼkidladi.

Yetakchilar loyihani amalga oshirishda ishtirok etgan quruvchilar, muhandislar, ishchilar va barcha hamkorlarga samimiy minnatdorlik bildirdilar.

Davlat rahbarlari yangi xonadonlar kalitlarini ularning egalariga tantanali ravishda topshirdilar.

Shuningdek, Prezidentlar Istanbulning Bekirkyoy tumanida oʻzbek maktabi qurilishini boshlab berdilar. Mazkur dargoh Oʻzbekistonning xorijdagi birinchi taʼlim muassasasi boʻladi.

Yangi oʻquv maskani Turkiyada yashovchi oʻzbek oilalarining farzandlariga oʻz ona tilida taʼlim olishi bilan birga milliy qadriyatlar, madaniyat va anʼanalarni saqlab qolish imkonini beradi.

Tomonlar ushbu maktab ikki qardosh xalq oʻrtasidagi rishtalar yanada mustahkam boʻlishiga xizmat qilishi, yosh avlod uchun muhim taʼlim va tarbiya markaziga aylanishiga ishonch bildirdilar.

Prezident Shavkat Mirziyoyev raisligida 15-yanvar kuni Tashqi ishlar vazirligi hamda xorijdagi diplomatik vakolatxonalar faoliyati masalalariga bagʻishlangan videoselektor yigʻilishi boʻlib oʻtdi.

Yigʻilish avvalida davlatimiz rahbari mazkur uchrashuv jahonda keskin geosiyosiy oʻzgarishlar boʻlayotgan, davlatlar suverenitetiga xavf-xatarlar tobora kuchayib borayotgan murakkab bir paytda oʻtayotganini qayd etdi. Bunday sharoitda tashqi siyosat sohasidagi faoliyatni tanqidiy muhokama qilib, Tashqi ishlar vazirligi va xorijdagi diplomatik vakolatxonalar ishini yangicha tashkil qilish zarurligi taʼkidlandi.

Davlatimiz rahbari tashqi siyosat borasida 2025-yil koʻp jihatdan natijador boʻlganini qayd etdi. Oʻtgan yili 26 ta xorijiy davlatga oliy darajadagi tashriflar amalga oshirildi, yangi tariximizda ilk bor qator davlatlar rahbarlarining Oʻzbekistonga tashriflari tashkil etildi. “Markaziy Osiyo plyus” formatidagi koʻp tomonlama muloqotlar sermahsul boʻldi. Soʻnggi yillarda 11 ta davlat bilan strategik sheriklik munosabatlari oʻrnatilib, ularning umumiy soni 19 taga yetdi, Qozogʻiston, Ozarbayjon va Tojikiston bilan ittifoqchilik munosabatlari yoʻlga qoʻyildi.

– Ochiq, pragmatik, puxta oʻylangan va tashabbuskor tashqi siyosatimiz natijasida Oʻzbekiston global tinchlik va diplomatiya markazlaridan biriga aylanib bormoqda, – dedi Prezidentimiz.

2017-yildan buyon xorijiy davlatlarda 16 ta yangi diplomatik va konsullik vakolatxonalari ochilib, ularning soni 60 taga, diplomatik aloqa oʻrnatilgan davlatlar soni esa 165 taga yetdi. Elchixonalar, konsullik muassasalari va xalqaro tashkilotlar huzuridagi vakolatxonalar shtatlari hamda Tashqi ishlar vazirligi xodimlarining ish haqi oshirilgani qayd etildi.

Shu bilan birga, “Barcha diplomatik vakolatxonalar mavjud imkoniyatlardan toʻliq foydalanyaptimi?” degan masala oʻrtaga qoʻyildi.

– Hozirgi sharoitda elchi degani faqat siyosiy muloqot yurituvchi shaxs emas. Elchi – investitsiya va texnologiya olib keladigan, yangi eksport bozorlarini ochadigan, transport-logistika yoʻlaklarini ishga soladigan, turistlar oqimini koʻpaytirib, qonuniy mehnat migratsiyasi uchun sharoit yaratadigan, eng asosiysi, fuqarolarimiz huquqlarini himoya qiladigan davlat vakilidir, – dedi Prezidentimiz.

Shu munosabat bilan elchilar uchun ular faoliyat yuritayotgan davlatlardan eksport tushumlari, turistlar oqimi hamda ushbu mamlakatlarga qonuniy mehnat migratsiyasi samaradorlik mezoni boʻlishi qayd etildi.

Iqtisodiy diplomatiyani kuchaytirish orqali eksport va investitsiya hajmini oshirish zarurligi taʼkidlandi.

Ikki va koʻp tomonlama tadbirlar doirasida 2025-yilda umumiy qiymati 160 milliard dollarlik investitsiya loyihalari va savdo shartnomalari boʻyicha bitimlar imzolandi. Tarixda ilk bor tashqi savdo aylanmasi 80 milliard dollardan oshib, eksport 33,5 milliard dollarga, xorijiy investitsiyalar esa 43 milliard dollardan oshdi. Oʻtgan yili 75 ta davlatga eksport hajmi qariyb 4,5 milliard dollarga koʻpaydi.

Shu nuqtayi nazardan elchilarga Yaqin Sharq, Yevropa, Osiyo va Afrika davlatlari yoʻnalishlarida eksportni kengaytirish, sanoat, qishloq xoʻjaligi, kimyo, toʻqimachilik, issiqxona va xizmatlar sohalarida aniq loyihalar bilan ishlash vazifalari qoʻyildi. Ayrim bozorlarda Oʻzbekiston mahsulotlarining nomi yetarlicha tanitilmayotgani qayd etildi.

Logistika xarajatlarining ortishi milliy mahsulotlar raqobatdoshligiga salbiy taʼsir koʻrsatayotgani taʼkidlanib, Yevropa bozorlariga chiqishda tranzit yoʻnalishlarini diversifikatsiya qilish, logistika zanjirlarini qisqartirish boʻyicha takliflar ishlab chiqish zarurligi koʻrsatib oʻtildi.

Qishloq xoʻjaligi sohasida tejamkor texnologiyalar, innovatsion issiqxonalar tajribasini oʻrganish, ularni hududlarimizda joriy etish boʻyicha aniq vazifalar belgilandi. Shuningdek, kimyo sanoati mahsulotlari uchun yangi eksport bozorlarini ochish, standart va talablarni ishlab chiqaruvchilarga yetkazish, koʻrgazmalar tashkil etish masalalari qayd etildi.

Yangi eksport yoʻnalishi sifatida Afrika qitʼasi bilan savdo-iqtisodiy hamkorlikni kuchaytirish zarurligi taʼkidlandi. Shu maqsadda tegishli vazirliklar va elchilar ishtirokida aniq “yoʻl xaritasi”ni ishlab chiqish topshirildi.

Elchilar loyiha topish, uni olib kelib, ishga tushirishdan manfaatdor boʻlishi kerakligi qayd etildi. Aniq investitsiya yoki eksport loyihasini yakuniga yetkazgan elchilarni moddiy ragʻbatlantirish amaliyoti joriy etilishi belgilandi.

Ayrim sohalarda elchilar va tarmoq rahbarlari mavjud imkoniyatlardan toʻliq foydalanmayotgani tanqid qilindi. Xususan, xalqaro grantlar jalb qilish boʻyicha salohiyat yetarli darajada ishga solinmagani qayd etildi. Agar vazirliklar va tarmoq rahbarlari elchilar bilan hamkorlikni toʻgʻri yoʻlga qoʻyganida oʻtgan yili qoʻshimcha ravishda yana kamida 200-300 million dollar grant jalb qilish mumkin edi.

Qayd etilganidek, xalqaro tashkilotlar va donor mamlakatlar har yili 200 milliard dollarga yaqin xalqaro grantlar eʼlon qilmoqda. Ushbu resurslardan samarali foydalanish, grantlar bilan ishlash boʻyicha yagona va tizimli yondashuvni joriy etish vazifasi qoʻyildi.

Shuningdek, AQSh, Buyuk Britaniya, Germaniya, Shveytsariya, Xitoy, Yaponiya va Singapurdagi elchilar bilan birgalikda dunyodagi TOP-100 talikka kiruvchi yetakchi xorijiy oliy taʼlim muassasalarini Oʻzbekiston oliygohlariga hamkor sifatida jalb etish boʻyicha aniq choralar koʻrish zarurligi taʼkidlandi.

Bundan tashqari, tashqi iqtisodiy aloqalarni kengaytirishda hududlar va elchixonalar oʻrtasidagi hamkorlik yetarli darajada yoʻlga qoʻyilmagani qayd etildi. Viloyat hokimlari elchilar bilan birgalikda hududlarda ishlab chiqarilayotgan eksportbop mahsulotlarni tizimli ravishda xorijda ilgari surishi, mahalliy korxonalarning tashqi bozorlarga chiqishida faol ishtirok etishi zarurligi taʼkidlandi.

Navbatdagi ustuvor vazifa sifatida fuqarolarimizni xorijda qonuniy va yuqori daromadli ish oʻrinlari bilan taʼminlash belgilandi. Tartibli mehnat migratsiyasining geografiyasi kengayib borayotgani, lekin ayrim mamlakatlarda bu yoʻnalishda ish yetarli darajada tashkil etilmayotgani koʻrsatib oʻtildi va elchilarga tegishli topshiriqlar berildi.

Elchixonalar va konsulliklar fuqarolarimizning huquq va manfaatlarini himoya qilishda faol boʻlishi, har bir holat boʻyicha malakali yuridik yordam koʻrsatishi shartligi taʼkidlandi. “Kabinet diplomatiyasi”dan voz kechib, joylarda ishlash, vatandoshlar bilan bevosita muloqot qilish vazifasi qoʻyildi.

Turizm sohasida elchilarning rolini yanada kuchaytirib, turizm va madaniyat boʻyicha ishlarga yangi yondashuv joriy etish, vizasiz rejimlardan samarali foydalanish, xalqaro autsorsing kompaniyalarni jalb etish zarurligi qayd etildi.

Shuningdek, tashqi siyosiy aloqalarni kengaytirish, oliy darajadagi tashriflarga puxta tayyorgarlik koʻrish, diplomat kadrlarni qayta tayyorlash va istiqbolli kadrlar zaxirasini shakllantirish masalalari muhokama qilindi.

Tashqi axborot siyosati va mamlakat imijini oshirishda xalqaro OAV va maxsus media loyihalar bilan ishlash ustuvor vazifa sifatida belgilandi.

Oʻzbekiston Respublikasining Tashqi siyosat faoliyati konsepsiyasini yangilab, uning ustuvor yoʻnalishlarini qayta koʻrib chiqish, milliy manfaatlarni himoya qilish va xalqaro maydonda mamlakatimizning oʻrnini mustahkamlashga qaratilgan aniq vazifalarni belgilab olish zarurligi taʼkidlandi.

Davlatimiz rahbari qayd etganidek, yangi konsepsiya mamlakatimizning uzoq muddatli strategik maqsadlarini, ichki islohotlarimiz mantigʻini, iqtisodiy diplomatiya, xavfsizlik, investitsiya, eksport, transport-logistika, suv va iqlim masalalaridagi milliy manfaatlarimizni yaxlit va oʻzaro bogʻliq holda aks ettirishi lozim.

Diplomatlarimizning xizmatlarini munosib eʼtirof etish maqsadida “Oʻzbekiston Respublikasida xizmat koʻrsatgan diplomat” faxriy unvonini taʼsis etish taklif etildi.

– Endi yangicha ruhda ishlaydigan, aniq natijalarga erishayotgan, Oʻzbekiston manfaatlarini xalqaro miqyosda qatʼiy himoya qiladigan diplomatlar davri keldi, – dedi davlatimiz rahbari yigʻilish yakunida.

Yigʻilishda xorijdagi elchilarning hisobot va takliflari tinglandi.