Bo'lim: Yangiliklar

---

O‘zbekiston Respublikasi Prezidentining Farmoni

O‘zbekiston va Fransiya o‘rtasida strategik sheriklik munosabatlarini o‘rnatish va chuqurlashtirishga qo‘shgan shaxsiy hissasi, siyosiy muloqot va davlatlararo hamkorlikni rivojlantirish, savdo-iqtisodiy, investitsiyaviy, ta’lim, sog‘liqni saqlash, sayyohlik, ilmiy-texnikaviy sohalarda o‘zaro manfaatli qo‘shma dastur va loyihalarni amalga oshirish, mamlakatimizning global va mintaqaviy tashabbuslarini faol qo‘llab-quvvatlash borasidagi alohida xizmatlari, shuningdek, xalqlarimiz orasida do‘stlik rishtalari, hamjihatlik va madaniy-gumanitar aloqalarni mustahkamlash yo‘lidagi amaliy sa’y-harakatlari uchun Fransiya Respublikasining O‘zbekiston Respublikasidagi Favqulodda va Muxtor Elchisi Oreliya Bushez xonim O‘zbekiston Respublikasining «Do‘stlik» ordeni bilan mukofotlansin.

O‘zbekiston Respublikasi Prezidenti

Sh.Mirziyoyev

---

---

Prezident Shavkat Mirziyoyev raisligida 13-avgust kuni to‘qimachilik sohasida eksport imkoniyatlari va zaxiralarni ishga solish masalalari bo‘yicha videoselektor yig‘ilishi o‘tkazildi.

To‘qimachilik mamlakatimiz iqtisodiyoti hajmining 3 foizini, sanoatning 14 foizini yaratayotgan yirik tarmoqdir. Bu yo‘nalishda 500 mingdan ortiq odam ish bilan band. So‘nggi besh yilda 3,5 milliard dollarlik 396 ta korxona ishga tushdi. Ishlab chiqarish hajmi 10 milliard dollarga yetdi.

Lekin dunyo bozoridagi o‘zgaruvchan vaziyat, talab va narx pasayishi sohani qo‘llab-quvvatlash bo‘yicha tezkor choralar ko‘rishni taqozo etmoqda.

So‘nggi uch yilda jahonda paxta narxi tonnasiga o‘rtacha 3 ming dollardan 1,5 ming dollarga tushdi. Bunga moslashish uchun 2022-2023-yillar uchun paxta xomashyosiga berilgan imtiyozli kredit 3 marta uzaytirildi, o‘tgan yili har bir tonnaga 1 million so‘mdan subsidiya berildi.

Ko‘plab to‘qimachilik korxonalarining tijorat kreditidan qarzdorligi bor. Atigi 16 foiz korxona xalqaro sertifikatga ega. Oqibatda ularning tashqi bozorda raqobat qilishi qiyin kechmoqda.

O‘zbekistonga nisbatan “paxta boykoti” bekor qilinganiga ancha bo‘ldi. Shuningdek, mamlakatimiz Yevropaga bojsiz eksport qilish imkonini beruvchi “GSP+” imtiyozlar tizimiga qo‘shilgan. Lekin brendlar bilan hamkorlik va eksport miqyosi bunga yarasha emas.

Sohadagi shu kabi muammolarni o‘rganish uchun, Prezident topshirig‘iga ko‘ra, 200 dan ortiq tadbirkorlar bilan muloqot qilindi. Yig‘ilishda ularning tahlilidan kelib chiqib, yangi imkoniyat va vazifalar belgilandi.

Avvalo, moliyaviy sog‘lomlashtirish va tannarxni kamaytirish masalalariga e’tibor qaratildi.

Bu yil klasterlarning 2022-2023-yillar hosili uchun kreditdan qarzdorligi garov qo‘yish sharti bilan besh yilgacha uzaytirilgan edi. Endi, 1-avgustdan garovi tayin klasterlar faqat asosiy qarzni to‘laydi. Qishloq xo‘jaligi jamg‘armasi va banklarga hisoblanadigan foizlar esa asosiy qarz to‘liq qoplanganidan keyin undiriladi. Agar klasterlar ham asosiy qarz, ham foizini o‘z vaqtida to‘lasa, foizning jamg‘armaga ketadigan qismining yarmi tadbirkorga qaytariladi.

Shuningdek, klasterlarga 2022-2023-yillar hosili uchun berilgan kredit bo‘yicha 1-avgust holatiga yuzaga kelgan 377 milliard so‘mlik penyadan voz kechiladi. Tijorat kreditidan majburiyati bo‘lgan 144 ta korxonani moliyaviy sog‘lomlashtirishga ko‘maklashiladi.

Bu yilgi paxta hosilini o‘z vaqtida terib olish uchun fermerlarga tonnasiga 1 million so‘mdan subsidiya beriladi. Korxonalar o‘z mablag‘i hisobidan paxta yetishtirsa yoki xarid qilsa, xomashyo qiymatining 10 foizi qoplab beriladi.

Endilikda to‘qimachilik zanjiridagi barcha korxonalarga ijtimoiy soliq stavkasi 1 foiz qilib belgilanadi. Bunda ijtimoiy reyestr bo‘yicha talab bekor qilinadi, umumiy faoliyatda to‘qimachilik ulushiga talab esa 90 foizdan 70 foizga tushiriladi.

O‘z xodimlarining bolalari uchun bog‘cha tashkil qilgan korxonalarga, xuddi xususiylardagi kabi, har bir tarbiyalanuvchi bo‘yicha subsidiya ajratiladi.

Ip-kalavaning tannarxiga elektr energiyasi qiymati ham ta’sir qilyapti. Shu bois endi korxonalarga o‘z ehtiyoji uchun o‘rnatilgan quyosh panellarini tarmoqqa ulashga ruxsat beriladi.

Bunday imkoniyatlar faoliyatni rivojlantirish uchun tayanch bo‘ladi. O‘zida tolani qayta ishlash quvvati yo‘q klasterlar ip-yigiruv korxonalari bilan samarali kooperatsiya tizimini yo‘lga qo‘yishi zarur. Aks holda, keyingi yildan ularning klaster maqomi bekor qilinadi va paxta hosili uchun imtiyozli kredit berilmaydi.

Hukumatga bunday klasterlar uchun jozibador moliyaviy choralar joriy qilish topshirildi.

Yig‘ilishda ishlab chiqarish va eksportni oshirish masalalari ham atroflicha tahlil qilindi.

Yurtimizda tayyorlanayotgan ip-kalava va matoning narxi raqobatchilarga nisbatan o‘rtacha 10-15 foiz yuqori. Chunki mahsulotlarimiz tarkibining 90 foizi paxta. Dunyoda esa sun’iy tola va aralash mato ko‘p ishlatiladi.

Shu bois korxonalarimizni arzon xomashyo bilan ta’minlash maqsadida 2028-yil 1-yanvargacha aralash mato va gazlama bojxona bojidan ozod etilishi belgilandi.

Endi bir nechta bo‘yoq korxonalari birlashib, suv tozalash inshootini qurmoqchi bo‘lsa, xarajatining bir qismi Savdoni rivojlantirish kompaniyasidan qoplab beriladi.

Eksportchi korxonalarga tumanlarda filial ochish uchun Savdoni rivojlantirish kompaniyasidan besh yil muddatga 10 milliard so‘mgacha Markaziy bank asosiy stavkasida kredit ajratiladi. Xorijlik dizayner, texnolog, konstruktor va marketologlarning oylik maoshi qoplab beriladi. Faqat sharti – 200 ta ish o‘rni ochish va odamlarga munosib ish haqi to‘lash kerak.

Dunyo bozorlariga chiqishda eng muhim masala – sifat va standart. Shu bois Texnik tartibga solish agentligiga to‘qimachilik korxonalarining xalqaro sertifikat olishiga ko‘maklashib, ularni 300 taga yetkazish vazifasi qo‘yildi.

Yevropa va AQSH bozoriga tayyor kiyim-kechak eksportini kengaytirish muhimligi ta’kidlandi. Xususan, Amerikada yiliga qariyb 100 milliard dollarlik to‘qimachilik bozori bor. Talabga moslashish orqali unda o‘rin egallash mumkin. Shu maqsadda Nyu-York va Sent-Luis shaharlarida savdo uylari ochish bo‘yicha ko‘rsatma berildi.

Tashqi ishlar vazirligi va elchilarga yirik brendlar bilan hamkorlik bo‘yicha “yo‘l xaritasi” ishlab chiqish, ularni Toshkentda bo‘ladigan yirik ko‘rgazmaga taklif qilish topshirildi.

Korxonalar faoliyatida sun’iy intellektni qo‘llash orqali daromadni 20-30 foizga oshirish hamda yashirin iqtisodiyot omilini kamaytirish mumkinligi qayd etildi. Bu borada to‘qimachilik korxonalarida “ERP” tizimini joriy qilish bo‘yicha dastur ishlab chiqiladi.

Yig‘ilishda tashkiliy masala ham ko‘rildi. Jahonda savdo qoidalari tez o‘zgarayotgan sharoitda soha boshqaruvida alohida yondashuvga zarurat tug‘ilayotgani aytildi.

Shu bois Yengil sanoatni rivojlantirish agentligi tashkil qilinadigan bo‘ldi. U to‘qimachilik, charm va ipaksanoat tarmoqlariga mas’ul bo‘ladi.

Agentlik uchun alohida jamg‘arma tuzilib, davlat ko‘magi va korxonalarga arzon aylanma mablag‘ u orqali beriladi. Jamg‘armaga 200 million dollar ajratiladi. Tashkilot huzurida tajribali tadbirkorlardan iborat kengash ham tuziladi.

Yangi agentlikka mazkur kengash bilan birga tannarx, ishlab chiqarish va eksport bo‘yicha natijadorlikni oshirish, kooperatsiyani kuchaytirib, past quvvatda ishlayotgan korxonalarni sog‘lomlashtirish vazifasi qo‘yildi. Xalqaro maslahatchilarni jalb etib, to‘qimachilikni 2030-yilgacha rivojlantirish dasturini ishlab chiqish, shuningdek, charm, ipak va gilamchilik sanoatini kengaytirish bo‘yicha topshiriqlar berildi.

Bosh vazirga belgilangan vazifalar ijrosi ustidan qat’iy nazorat o‘rnatish topshirildi.

Yig‘ilishda sohadagi namunali tajribalar ko‘rib chiqildi, tarmoq rahbarlari va tadbirkorlarning fikrlari eshitildi.

---

---

Prezident Shavkat Mirziyoyev 12-avgust kuni Buxoro viloyatida islohotlar natijadorligi va yangi loyihalar muhokamasi yuzasidan yig‘ilish o‘tkazdi.

Ilgari bu hudud iqtisodiyoti sanoqli tarmoqlar bilan cheklangan edi. So‘nggi sakkiz yilda viloyatga 8 milliard dollardan ortiq investitsiya jalb etilib, iqtisodiyot tarkibi kengaydi. Birgina sanoat sohasida 6 mingta yangi korxona ochildi. Sanoat mahsulotlari ishlab chiqarish hajmi 6 barobardan ziyod oshdi.

Turizm infratuzilmasi yaxshilanib, yangi maskanlar tashkil etildi. Nufuzli mehmonxona brendlari kirib keldi. Yillik sayyohlar soni 1 million 700 ming nafarga yetdi.

O‘zbekiston Prezidentining 2024-yil 5-dekabrdagi qarori bilan Buxoro viloyatida sanoat va xizmat ko‘rsatish sohasini rivojlantirish bo‘yicha qo‘shimcha chora-tadbirlar belgilangan edi. Natijada joriy yil 6 oyda sanoat mahsulotlari ishlab chiqarish 7,3 foizga oshdi. 198 ta yangi sanoat korxonasii tashkil topdi. Yalpi hududiy mahsulot hajmi 6,4 foizga o‘sdi.

Davlatimiz rahbari tashabbusiga muvofiq tuzilgan “Islohotlar shtabi” Buxoroda ham qo‘shimcha imkoniyatlarni yuzaga chiqarmoqda. Taqdimotda mutasaddilar ana shunday yangi loyihalar to‘g‘risida axborot berdi.

Masalan, turkiyalik tadbirkorlar Peshku tumanida grafit qazib olish va qayta ishlashga qiziqish bildirgan. Vetnam kompaniyasi zamonaviy turar joy, Hindiston korxonasi jarrohlik markazi qurishni rejalashtirgan. 217 gektar maydonda 260 ta loyihani amalga oshirib, 10 mingdan ortiq yangi ish o‘rni yaratish mo‘ljallangan.

Umuman, viloyatda 1 milliard 700 million dollarlik 21 ta yangi loyiha shakllantirilgan. Ularning natijasida 32 ming ish o‘rni, 180 million dollarlik eksport imkoniyati ochilishi ko‘zda tutilgan.

Prezidentimiz hudud iqtisodiyotini rivojlantirish va aholi bandligini ta’minlash bo‘yicha qo‘shimcha imkoniyatlarni ko‘rsatib o‘tdi.

Xususan, Peshku tumanida aholiga ijaraga berilgan yerlarda arzon issiqxonalar qurib, eksportbop ekinlar yetishtirish yo‘lga qo‘yilgan. Bu tajribani ommalashtirib, viloyat bo‘yicha qo‘shimcha 5 ming xonadonda shunday issiqxonalar tashkil etish vazifasi qo‘yildi.

Shofirkon, G‘ijduvon, Peshku va Buxoro tumanlaridagi 10 ming gektarda uzum, Vobkent, G‘ijduvon, Jondor, Romitan va Kogonda 5 ming gektarda o‘rik, gilos, anjir kabi eksportbop meva bog‘larini barpo qilish bo‘yicha topshiriq berildi.

Buxoroning qadim ziyoratgohlari mashhur. Lekin sayyohlarni ko‘p vaqt olib qoladigan yirik majmualar yo‘q. Xorijlik investorlarni jalb etib, savdo va ko‘lgilochar park ochish zarurligi ko‘rsatib o‘tildi.

Yana bir katta yo‘nalish – sanoat. Viloyatda 2 ta yirik neft-gaz korxonasi bor, yana biri barpo etilayapti, 10 ta yirik quyosh va shamol stansiyalari qurilishi jadallashgan. Bu majmualar atrofida kichik-kichik korxonalarni joylashtirib, investitsiya, sanoat va eksport hajmini oshirish mumkinligi aytildi.

Buxoro viloyati va tuman hokimlari aholi uchun daromad manbalarini ko‘paytirib, kambag‘allik va ishsizlikni kamaytirish bo‘yicha rejalarini bayon qildi.

---

---

Prezident Shavkat Mirziyoyev 12-avgust kuni suv resurslarini boshqarish va irrigatsiya sektorini rivojlantirishga oid takliflar taqdimoti bilan tanishdi.

Suv tanqis bo‘lgan mintaqamizda uni qadrlash va tejash juda dolzarb masala. O‘zbekistonda bunga doimiy e’tibor qaratilib, sug‘orish tarmoqlari ta’mirlanmoqda, suv tejovchi texnologiyalar joriy qilinmoqda.

Xususan, 2020-2024-yillarda shu maqsadlarga 60 trillion so‘m byudjet mablag‘lari hamda 622 million dollar xorijiy investitsiya yo‘naltirilgan. Natijada, 2020-yilda suv tejovchi texnologiyalar qo‘llangan maydonlar jami sug‘oriladigan maydonlarga nisbatan 4 foizni tashkil etgan bo‘lsa, 2025-yilga kelib bu ko‘rsatkich 50 foizga yetgan.

Endi bu ishlarning izchil davomi sifatida, suv resurslarini boshqarish va irrigatsiya sektorini rivojlantirishning 2025–2028-yillarga mo‘ljallangan dasturi ishlab chiqildi.

Taqdimotda mutasaddilar unda nazarda tutilgan chora-tadbirlar to‘g‘risida axborot berdi.

Dasturda suv resurslaridan oqilona foydalanishga ustuvor ahamiyat qaratilgan. Shu maqsadda 2 ming 551 kilometr irrigatsiya tarmoqlari rekonstruksiya qilinishi belgilangan. Nasos stansiyalaridagi eski uskunalarni tejamkoriga almashtirish orqali ularning yillik elektr energiyasi iste’molini 6,8 milliard kVt/soatdan 6,2 milliard kVt/soatgacha kamaytirish mo‘ljallangan.

Yerlarning holati ham suv sarfida muhim omil hisoblanadi. Shu bois dasturda suv ta’minoti past bo‘lgan sug‘oriladigan maydonlarni 424 ming gektardan 276 ming gektargacha kamaytirish ko‘zda tutilgan. Turli darajada sho‘rlangan hamda yerosti suvining sathi muammoli bo‘lgan maydonlar ham kamaytiriladi. Natijada foydalanishdan chiqib ketgan 460 ming gektar yer ekishga qaytariladi.

Yana 1 million 400 ming gektar yerda suv tejovchi, shu jumladan, 293 ming gektarda tomchilatib sug‘orish texnologiyasi joriy etiladi. 20 ta yirik inshootlarda nazorat-o‘lchov uskunalari modernizatsiya qilinadi.

Suv hisobini yuritishda inson omilini kamaytirish ham muhim. Bu borada 12 mingta meliorativ kuzatuv qudug‘ida hamda 1 ming 750 ta nasosda zamonaviy monitoring yo‘lga qo‘yiladi. 12 ta yirik suv xo‘jaligi inshooti raqamli texnologiyalar asosida avtomatlashtirilgan boshqaruvga o‘tkaziladi.

Umuman, dastur natijasida beton qoplamali kanallar ulushi hozirgi 39 foizdan 47 foizga yetadi. Irrigatsiya tarmoqlarining sifati oshib, yo‘qotishlar kamayadi. Tejamkorlik hisobiga bu yil 10 mlrd kub metr, 2028-yilga borib 14 mlrd kub metr suv iqtisod qilinishi kutilmoqda.

Davlatimiz rahbari bu takliflarni ma’qullab, O‘zbekiston Respublikasida suv resurslarini boshqarish va irrigatsiya sektorini rivojlantirishning 2025-2028-yillarga mo‘ljallangan dasturini tasdiqladi.

Taqdimotda, shuningdek, sohada samaradorlikni oshirish, raqamlashtirish, xususiy sektor ishtirokini kengaytirish borasidagi ishlar to‘g‘risida ham axborot berildi.

Hozirgi kunda viloyatlar, tumanlar va xo‘jaliklar miqyosidagi 18 ming 755 ta gidropostni avtomatlashtirish boshlangan. Keyingi bosqich dalalarga suv taqsimlovchi nuqtalarda rejalashtirilgan.

Suv xo‘jaligini raqamlashtirish masalasiga alohida to‘xtalib o‘tildi. Sohaga daxldor idoralardagi 11 ta dasturni integratsiya qilib, yagona platforma ishlab chiqish, IT-markaz va Vaziyatlar markazi tashkil etish bo‘yicha topshiriq berildi. Bunda “O‘zbekkosmos” imkoniyatlaridan keng foydalaniladi.

5 ming 200 ta nasosni elektr va suv hisoblagichlar bilan jihozlash, yirik nasoslarni muqobil energiyaga o‘tkazish vazifasi qo‘yildi. Bunda olinadigan ma’lumotlar raqamli platformada jamlanadi, suvning iqtisodiy samaradorligi tahlil qilib boriladi.

Bugungi kunda 2 ming 612 ta suv obyekti davlat-xususiy sheriklikka berilgan. Endi yirik nasoslar ham xususiy sektorga taklif qilinadi. Ularning har biri uchun alohida jozibador shartlar ishlab chiqiladi.

O‘tgan yili tuman irrigatsiya bo‘limlari negizida 159 ta “Suv yetkazib berish xizmatlari” davlat muassasasi tashkil qilingan edi. Ushbu quyi bo‘yin faoliyatini yaxshilash maqsadida endi ularga o‘z mablag‘ini mustaqil taqsimlash huquqini berish ko‘zda tutilmoqda.

Sohada xizmatlarni yaxshilash va samaradorlikni ta’minlash mutaxassislar tajribasiga ham bog‘liq. Shu maqsadda 200 o‘rinli malaka oshirish markazi tashkil etish rejalashtirilmoqda.

Prezidentimiz sohaga oid me’yoriy hujjatlarni takomillashtirish, suvdan foydalanish samaradorligini oshirish,  jamiyatda suvni tejash madaniyatini kuchaytirish bo‘yicha ko‘rsatmalar berdi.

---

---

O‘zbekiston Respublikasi Prezidenti Shavkat Mirziyoyev 12-avgust kuni Hindiston Respublikasi Bosh vaziri Narendra Modi bilan telefon orqali muloqot qildi.

Suhbat avvalida davlatimiz rahbari Bosh vazir va do‘st Hindiston xalqini yaqinlashib kelayotgan milliy bayram – mamlakat Mustaqilligi kuni bilan samimiy tabriklab, tinchlik-osoyishtalik, farovonlik va ravnaq tiladi.

O‘zbekiston-Hindiston strategik sheriklik va ko‘p qirrali hamkorlik munosabatlarini yanada rivojlantirishning dolzarb masalalari ko‘rib chiqildi.

Erishilgan kelishuvlarga muvofiq amaliy hamkorlik jadal rivojlanib borayotgani, turli darajalarda faol va sermahsul muloqotlar davom etayotgani katta mamnuniyat bilan qayd etildi.

Joriy yil boshidan tovar ayirboshlash 60 foizga oshdi, 40 ga yaqin yangi qo‘shma korxona va kooperatsiya loyihalari ishga tushirildi. Hindistonning yetakchi kompaniyalari bilan amalga oshirilayotgan istiqbolli loyihalarning joriy portfeli ikki milliard dollarga yetdi. O‘zbekistonda Hindiston universitetlarining to‘rtta filiali muvaffaqiyatli faoliyat yuritmoqda.

Yetakchilar farmatsevtika va kimyo sanoati, raqamli iqtisodiyot, energetika, konchilik, qishloq xo‘jaligi, qurilish, turizm va boshqa yo‘nalishlarda kooperatsiya loyihalarini ilgari surish va amalga oshirishga alohida e’tibor qaratdilar.

«Shimol-Janub» yo‘lagi doirasida samarali transport-tranzit yo‘nalishlarini rivojlantirish masalalari muhokama qilindi.

Hukumatlararo komissiyaning navbatdagi yig‘ilishini Toshkent shahrida samarali o‘tkazish muhimligi qayd etildi. Madaniyat va kino kunlarini o‘zaro tashkil etish, hududlar darajasida almashinuvlarni faollashtirish taklif qilindi.

O‘zbekiston Prezidenti va Hindiston Bosh vaziri mintaqaviy kun tartibi yuzasidan ham fikr almashdilar hamda bo‘lajak oliy darajadagi tadbirlar rejasini ko‘rib chiqdilar.

---

---

Prezident Shavkat Mirziyoyev 11-avgust kuni yashirin iqtisodiyotga qarshi kurashish tizimini takomillashtirish bo‘yicha takliflar taqdimoti bilan tanishdi.

Avvallari biznesga yuqori ma’muriy bosim va aralashuv bo‘lgani uchun ko‘pchilik oshkora ishlashdan xavfsirar edi. So‘nggi yillarda soliq yukini kamaytirish, byurokratik to‘siqlarni bartaraf etish bo‘yicha ko‘p ish qilindi. Soliq turlari 13 tadan 9 taga kamaydi, 100 dan ortiq turdagi litsenziya va ruxsatnoma bekor bo‘ldi.

Bularning natijasida, kuzatilmayotgan iqtisodiyot ulushi 2019-yildagi 45-50 foizdan hozirda 35 foizga tushdi. Lekin hali buni yanada kamaytirish zarur.

Taqdimotda shu boradagi ustuvor vazifalar muhokama qilindi. Mutasaddilar yashirin iqtisodiyotga sabab bo‘layotgan omillar va ularni bartaraf etish choralari bo‘yicha axborot berdi.

Bunda eng samarali yo‘l ilg‘or texnologiyalar asosida yangicha yondashuvlarni joriy qilish ekani ta’kidlandi. Masalan, Toshkent shahrida jamoat transporti to‘liq avtomatlashgan to‘lovga o‘tkazilgani natijasida, aslida, yo‘lovchilar soni 30 foizga ko‘p ekani ko‘ringan. Yoki raqamlashtirilgan dehqon va buyum bozorlarida tushum 2-3 karra oshayapti.

Shunday tizimni qishloq xo‘jaligi, qurilish, transport, savdo va xizmatlar kabi yashirin iqtisodiyot ulushi yuqori bo‘lgan sohalarda ham joriy qilish bo‘yicha ko‘rsatmalar berildi. Litsenziya va ruxsatnoma berish jarayonlari hamda muddatlarini qayta ko‘rib chiqib, inson omilini keskin qisqartirish va barcha qadamlarni to‘liq raqamlashtirish vazifasi qo‘yildi. Tadbirkorlar ko‘p duch keladigan soliq, bank, bojxona, kommunal, sertifikatlash kabi sohalarda korrupsiyaga yo‘l ochayotgan omillarga chek qo‘yish zarurligi aytildi.

Elektron to‘lovlar rivojlangani odamlarga keng qulaylik yaratmoqda. Bu yashirin iqtisodiyotni qisqartirishda ham maqbul vosita. Buning uchun naqdsiz hisob-kitoblarni rag‘batlantirish, to‘lov tashkilotlarini ko‘paytirish muhimligi qayd etildi.

Davlatimiz rahbari faqat nazoratni kuchaytirish bilan yashirin iqtisodiyotni jilovlab bo‘lmasligini, aholi va tadbirkorlarning soliq madaniyatini oshirib, to‘g‘ri ishlaganlarni rag‘batlantirish yo‘lidan borish kerakligini ta’kidladi.

Har bir soha bo‘yicha alohida yondashuv qilib, tadbirkorlarga ochiq va qonuniy ishlashni manfaatli qilish vazifasi qo‘yildi. Shundan kelib chiqib, soliq ma’murchiligini takomillashtirish va raqamlashtirish, biznesga qo‘shimcha yengilliklar berish, mehnat munosabatlarini yaxshilash bo‘yicha topshiriqlar berildi.

O‘z navbatida, soliq madaniyati butun jamiyat ishiga aylanishi zarur. Xalqimiz hamisha qadrlagan halollik fazilati pirovard natijada barcha sohalarda fayz-u baraka va farovonlik olib keladi. Bu g‘oyalarni aholi orasida targ‘ib qilib, keng qaror topdirish muhimligi qayd etildi.

---

---

Prezident Shavkat Mirziyoyev 11-avgust kuni yakka tartibdagi tadbirkorlar hamda o‘zini o‘zi band qilgan shaxslar uchun qulay shart-sharoitlar yaratishga oid taqdimot bilan tanishdi.

Tadbirkorlikni rivojlantirish mamlakatimizda strategik vazifaga aylangan. Iqtisodiyot ravnaqi, aholi bandligi va turmush farovonligida bu sohaning o‘rni juda katta. Shu bois biznes yuritish qoidalari soddalashtirilib, qulayliklar oshirib borilmoqda. Raqamli texnologiyalar ommalashayotgani bunda qo‘l kelayotir.

Endi buni davom ettirgan holda, shaffof tadbirkorlik muhitini shakllantirish, naqdsiz to‘lovlar uchun qulayliklarni kengaytirish ko‘zda tutilmoqda.

Unga ko‘ra, yakka tartibdagi tadbirkorlar va o‘zini o‘zi band qilgan shaxslar uchun 2030-yil 31-dekabrga qadar maxsus huquqiy rejim joriy etiladi. Ularni davlat ro‘yxatidan o‘tkazishdan tortib hisobotni topshirishgacha bo‘lgan barcha asosiy xizmatlarni birlashtiruvchi integratsiyalashgan raqamli platformalar yaratiladi. Jumladan, faoliyatni rasmiylashtirish, bank hisobvaraqlari ochish va boshqarish, soliqlarni hisoblash va to‘lash, hisob-kitoblar qilish va fiskal cheklarni shakllantirish ushbu raqamli platformalar orqali yuritiladi.

Bu tizimda elektron hamyon ochilishi tadbirkorlarga daromadlarni qabul qilish, xodimlar, kontragentlar va tashkilotlar bilan hisob-kitoblarni amalga oshirish, soliqlar va boshqa majburiy to‘lovlarni to‘lash imkoniyatini beradi. Elektron hamyonga ega bo‘lgan yakka tartibdagi tadbirkorlar va o‘zini o‘zi band qilgan shaxslar uchun bank hisobvaraqlarini ochish ixtiyoriy bo‘ladi.

2025-yil 1-noyabrdan boshlab, bu jarayonlarda “QR-kod” va “tap to pay” texnologiyasidan foydalaniladi. Hujjatlarni masofaviy biometriya va “SMS xabarnoma” orqali elektron kalitsiz imzolash mumkin bo‘ladi. Bu ma’lumotlar qog‘oz nusxadagi hujjatlar bilan tenglashtiriladi. “Kunlik to‘lov” tartibi tajriba tariqasida joriy etilib, xodimlarga to‘lovlarni elektron hamyon orqali to‘lash imkoniyati yaratiladi.

2026-yil 1-yanvardan boshlab, yillik aylanmasi 1 milliard so‘mgacha bo‘lgan yakka tartibdagi tadbirkorlar va o‘zini o‘zi band qilgan shaxslar uchun aylanmadan olinadigan soliq stavkasi 1 foiz miqdorida belgilanadi.

Yakka tartibdagi tadbirkorlar va o‘zini o‘zi band qilgan shaxslarda elektron to‘lovlarni qabul qiluvchi maxsus QR-kod mavjud bo‘lishi chakana savdo qoidalarining majburiy talabi etib belgilanadi. Raqamli platformadagi pul aylanmalari to‘g‘risidagi ma’lumot kredit ajratishda inobatga olinadi.

Prezidentimiz bu takliflarni ma’qullab, yakka tartibdagi tadbirkorlar hamda o‘zini o‘zi band qilgan shaxslar uchun qulay shart-sharoitlar yaratish chora-tadbirlari to‘g‘risidagi qarorni imzoladi.

---

---

O‘zbekiston Respublikasi Prezidenti Shavkat Mirziyoyev 9-avgust kuni Ozarbayjon Respublikasi Prezidenti Ilhom Aliyev bilan telefon orqali muloqot qildi.

Davlatimiz rahbari qardosh Ozarbayjon yetakchisi va xalqini tarixiy voqea – kuni kecha Vashington shahrida Ozarbayjon va Armaniston o‘rtasida tinchlik deklaratsiyasi imzolangani bilan samimiy qutladi.

Tez fursatda tinchlik bitimi rasman imzolanishi Janubiy Kavkazda tinchlik, barqarorlik va ravnaqni ta’minlashda muhim ahamiyat kasb etishiga ishonch bildirildi.

Shuningdek, O‘zbekiston Prezidentining joriy yil iyul oyida Ozarbayjonga davlat tashrifi davomida erishilgan kelishuvlarni amalga oshirish doirasida ikki tomonlama strategik sheriklik va ittifoqchilik munosabatlarini yanada rivojlantirish va mustahkamlashning dolzarb masalalari muhokama qilindi.

Barcha darajalarda samarali muloqot va almashinuvlar davom etmoqda. Joriy yil boshidan tovar ayirboshlash 30 foizga oshdi. «Yo‘l xaritasi» asosida iqtisodiyotning turli tarmoqlarida istiqbolli kooperatsiya loyihalari shakllantirilmoqda. Neft-gaz sohasidagi strategik loyiha bo‘yicha imzolangan Mahsulot taqsimotiga oid bitim doirasida amaliy ishlar olib borilmoqda.

Yetakchilar bo‘lajak oliy darajadagi uchrashuv va tadbirlar rejasini ham ko‘rib chiqdilar.

---

---

Hurmatli quruvchilar, muhandis va mutaxassislar, soha faxriylari!

Avvalo, siz, azizlarni bugungi qutlug‘ kasb bayramingiz bilan samimiy tabriklab, barchangizga yuksak hurmatim va ezgu tilaklarimni izhor etaman.

Sizlar kabi ming-minglab mohir quruvchi va muhandislar, usta va me’morlar, loyihachi va mutaxassislarning mashaqqatli mehnati bilan Yangi O‘zbekistonning yangi, obod va ko‘rkam qiyofasi shakllanmoqda, xalqimizning hayoti tobora farovon bo‘lib bormoqda. Buning uchun barchangizga chin dildan minnatdorlik bildiraman.

Keyingi yillarda qurilish industriyasi rivoji yangi bosqichga ko‘tarilib, ushbu soha milliy iqtisodiyotimizning drayverlaridan biriga aylandi. So‘nggi sakkiz yil davomida qurilish ishlari hajmi bir necha barobar ortib, 2016-yildagi 30 trillion so‘mdan 2024-yilda qariyb 234 trillion so‘mga yetgani ham bu fikrni tasdiqlaydi.

O‘tgan yili yurtimizda jami 40 million 500 ming kvadrat metr bino va inshoot qurilgan bo‘lsa, joriy yilda ushbu raqam 45 million kvadrat metrdan oshishi kutilmoqda.

Xalqimizning o‘sib borayotgan talab va ehtiyojlaridan kelib chiqib, 2024-yili 100 mingdan ziyod xonadonga ega bo‘lgan 2 ming 44 ta ko‘p qavatli uy barpo etildi. Bugungi kunda aholi jon boshiga to‘g‘ri keladigan uy-joy hajmi 2020-yildagi 16 kvadrat metrdan 19 kvadrat metrga yetganini alohida ta’kidlash lozim.

E’tiborlisi, bu boradagi ishlar izchil davom ettirilib, 56 ta hududdagi “Yangi O‘zbekiston” massivlarida qurilish ishlari jadal olib borilmoqda. Joriy yilda xalqimiz ixtiyoriga 135 mingta xonadon topshiriladi. 2030-yilgacha “Yangi O‘zbekiston” massivlari sonini 100 taga yetkazish maqsad qilingan, bu esa 250 mingta xonadon degani.

Dunyoning ilg‘or kompaniyalari bilan hamkorlikda “Yangi Toshkent” loyihasi doirasida 20 ming gektar maydonda 2 million aholi uchun qulay infratuzilma yaratilmoqda.

Ayni vaqtda Yangi Toshkent shahri qurilishining birinchi bosqichida O‘zbekiston Milliy kutubxonasi, Yangi O‘zbekiston universiteti, Alisher Navoiy nomidagi xalqaro ilmiy-tadqiqot markazi, muzeyi, ixtisoslashtirilgan maktab va maqom markazi, Nizomiy nomidagi Toshkent davlat pedagogika universiteti kabi yirik bino va inshootlar qad rostlamoqda.

Bularning barchasi qo‘ligul bunyodkorlarimiz qanday ulkan marralarga erishayotganini yaqqol namoyon etadi.

Qadrli do‘stlar!

Boshqa sohalar qatori qurilish tarmog‘ida ham davr talabi asosida raqamlashtirish jarayoni jadal rivojlanmoqda. Sohada 30 dan ortiq axborot tizimi joriy qilindi. “Shaffof qurilish” milliy axborot tizimida 22 ta davlat xizmati raqamlashtirilgani natijasida ortiqcha qog‘ozbozlik va ovoragarchiliklarga chek qo‘yildi. Tender platformasi joriy etilishi tufayli inson omilining aralashuviga barham berildi, shaffoflik, ochiq raqobat muhiti shakllantirildi.

Uy-joy qurilishida ulushdor sifatida ishtirok etadigan fuqarolarimizning huquqlarini himoya qilish maqsadida “Eskrou” tizimi tatbiq etilmoqda. Shu asosda ishonchli developerlar bozori shakllantiriladi.

Bugungi kunda shaharsozlik sohasida ham yangi davr boshlandi, desak, to‘g‘ri bo‘ladi. Endilikda bosh rejalar mutlaqo yangi mazmun va ko‘rinishda ishlab chiqilib, geoaxborot tizimiga joylashtirish uchun raqamlashtirilmoqda. Xususan, 2024-yilda 146 ta shaharsozlik hujjatlari raqamlashtirildi. 2025-yilda ushbu ko‘rsatkich 180 taga yetkaziladi.

Qurilish resurslari milliy klassifikatori yaratilib, narxlarni shakllantirish va obyektlar smeta qiymatini aniqlash ham elektron tizimga o‘tkazilmoqda.

Qurilish jarayonlarining barcha bosqichlarida jamoatchilik fikrini inobatga olish, nazorat jarayonida ishtirokini ta’minlash hamda qurilish sifatini yaxshilash maqsadida nazorat mexanizmlari samaradorligini oshirish muhim ahamiyatga ega.

Shu borada nazorat faoliyatini to‘liq raqamlashtirish, obyektlarda ishlarning borishini kunlik nazorat qilib borish hamda real vaqt rejimida kuzatish imkonini yaratgan holda kamchiliklarni o‘z vaqtida bartaraf etish soha vakillari oldida turgan muhim vazifalardan biridir.

Aminmanki, sizlar bugungi zamonning o‘zi oldimizga qo‘yayotgan ana shunday muhim talablarni chuqur anglab, yuksak natijadorlik bilan mehnat qilasizlar. Zahmatkash quruvchilarimizning mehnat va turmush sharoitlarini yaxshilash, ularni munosib rag‘batlantirish masalalari bundan buyon ham doimiy e’tiborimiz markazida bo‘lib qoladi.

Har bir qurilgan bino – bu bizning kelajak avlodlarga qoldiradigan buyuk merosimiz, har bir ko‘cha va shaharchaning ko‘rinishida sizlarning qo‘l izingiz borligini, insonlar baxti va quvonchi aynan sizlarning mehnatingiz bilan bog‘liqligini hech qachon unutmang.

Yangi O‘zbekistonni bunyod etishda oldimizda zamonaviy shaharlar, qulay turar-joy massivlari, insonlarga shodlik baxsh etuvchi betakror imoratlar qurish kabi ulkan vazifalar turibdi va buni amalga oshirishda biz sizdek – mo‘jizakor, mohir va zahmatkash quruvchilarimizga ishonamiz hamda suyanamiz!

Hurmatli quruvchilar!

Sizlarni – mamlakatimizni har tomonlama go‘zal va betakror diyorga aylantirishdek sharafli ishga sidqidildan hissa qo‘shib kelayotgan barcha yurtdoshlarimizni bugungi bayram bilan yana bir bor chin yurakdan muborakbod etaman.

El-yurtimiz ravnaqi va farovonligi yo‘lida siz, azizlarga yangi yutuq va omadlar yor bo‘lsin!

Shavkat Mirziyoyev,

O‘zbekiston Respublikasi Prezidenti

---

---

Davlatimiz rahbariga Toshkent shahrida energetika tizimining barqarorligini ta’minlash chora-tadbirlari bo‘yicha axborot berildi.

Poytaxtimizda aholi soni ham, bunyodkorlik ko‘lami ham oshib bormoqda. Bir yil ichida 12 mingta yangi quvvat, savdo va servis majmualari ishga tushdi. Odamlarning turmush tarzi yaxshilanib, maishiy texnikalardan foydalanish ko‘payyapti.

Bularning barchasi energiyaga talabni oshiradi. Shuni hisobga olib, oxirgi ikki yilda Toshkentda elektr ta’minotini yaxshilash uchun 2 trillion 800 milliard so‘m yo‘naltirilgan. 36 ta podstansiya, 665 ta transformator, 2 ming kilometrdan ziyod tarmoq yangilangan.

Lekin hali qilinadigan ishlar ko‘p. 46 ta podstansiya va 207 ta transformator ortiqcha yuklama bilan ishlayapti. Yil boshidan beri poytaxtimizda elektr iste’molchilari yana 40 mingtaga ko‘paygan, talab 6 foiz o‘sgan.

Shu bilan birga, ilgari yozdagi jazirama kunlar davomiyligi bir haftadan oshmagan bo‘lsa, bu yil 20 kungacha cho‘zilgan. Oqibatda iyul oyida Toshkent shahrida iste’mol miqdori 900 million kilovatt-soatdan oshgan.

Bu omillar modernizatsiya jarayonlarini izchil davom ettirishni talab qiladi. Taqdimotda energetika vaziri poytaxtimizdagi har bir tuman va mahallalar kesimida rejalarni bayon qildi.

Unga ko‘ra, bu yil birinchi bosqichda 374 kilometr tarmoq, 11 ta podstansiya, 62 ta transformatorni yangilash ko‘zda tutilgan. Kelasi yil yana 788 kilometr tarmoq, 35 ta podstansiya va 145 ta transformator modernizatsiya qilinadi. Jumladan, mahallalardagi transformator va tarmoqlar ta’mirlanib, yangilari o‘rnatiladi.

Prezidentimiz kuz-qish mavsumiga oz fursat qolganiga e’tibor qaratib, bu yilgi rejani 1-noyabrgacha yakunlash zarurligini ta’kidladi.

So‘nggi yillarda barcha hududlarda generatsiya ko‘paytirib borilmoqda. Shu bilan birga, sanoat korxonalarini muqobil energiya tizimiga o‘tkazish choralari ko‘rilmoqda. Xususan, 2027-yilgacha yirik korxonalar va turizm maskanlarida 752 megavattli quyosh stansiyasi hamda 812 megavattli saqlash quvvatlarini tashkil etish rejalashtirilgan.

Mutasaddilar atom energetikasi yo‘nalishidagi ishlar haqida ham axborot berdi.

Ma’lumki, yurtimizda kichik quvvatli atom elektr stansiyasi qurish bo‘yicha ish olib borilmoqda. Bo‘lajak stansiyaning har bir bosqichi – loyihalashtirishdan to bitgunga qadar Xalqaro atom energiyasi agentligining qat’iy nazorati ostida bo‘ladi, eng ilg‘or xavfsizlik talablari tatbiq etiladi.

Prezidentimiz rejadagi inshootlarni sifat va muddatga amal qilgan holda ishga tushirib, barqaror energiya quvvatlarini yaratish bo‘yicha ko‘rsatmalar berdi. Vazirlar Mahkamasiga energiya samaradorlikni oshirish masalasini har hafta muhokama qilib borish topshirildi.