Bo'lim: Yangiliklar

---

---

Hurmatli delegatsiyalar rahbarlari!

Sammitni yuksak darajada tashkil etgani va an’anaviy mehmondo‘stlik uchun Qozog‘iston Respublikasi Prezidenti, hurmatli Qosim-Jomart Kemelovich Toqayev sha’niga aytilgan minnatdorlik so‘zlariga qo‘shilaman.

Italiya Vazirlar Kengashi Raisi, hurmatli Jorjia Meloni xonimga bugungi uchrashuvni tashkil etish haqidagi tashabbusi uchun yana bir bor tashakkur izhor etaman.

Biz ushbu anjumanni yaqinda Samarqand shahrida o‘tkazilgan sammitda Markaziy Osiyo mintaqasining Yevropa bilan strategik sherikligi haqida erishilgan kelishuvlar natijasi, deb bilishimizni ta’kidlab o‘tmoqchiman.

O‘zbekiston tomoni ushbu formatdagi samarali amaliy hamkorlikni, avvalo, mamlakatlarimizning texnologik, sanoat va intellektual salohiyatini hisobga olgan holda rivojlantirishga qat’iy azmu qaror qilgan.

Hurmatli sammit ishtirokchilari!

Uchrashuvimiz uchun taklif etilgan kun tartibini to‘liq qo‘llab-quvvatlayman.

Global va mintaqaviy siyosiy jarayonlarning bugungi real sharoitida, xavfsizlik va taraqqiyotga umumiy tahdidlar kuchayib borayotgan bir paytda Italiya bilan ko‘ptomonlama muloqot maydonini ishga tushirishimiz nihoyatda zarur edi, deb hisoblayman.

Mamlakatlarimizni ko‘p asrlik savdo va madaniy aloqalar tarixi o‘zaro bog‘lab turishini ham alohida qayd etishni istar edim. Ilk diplomatik almashuvlar Kushonlar podshohligi va imperator Avgust hukmronligi davriga to‘g‘ri keladi. Bundan ming yillar muqaddam solnomachilar, shoir va mutafakkirlar shaharlarimiz yuqori darajadagi sivilizatsiyaviy taraqqiyotga erishganini qayd etishgan.

Yana bir dalil – XII asrdan boshlab italiyalik olimlar Muhammad Xorazmiy, Ahmad Farg‘oniy, Abu Ali ibn Sinoning bebaho asarlarini o‘rganishgan va tarjima qilishgan. Mintaqamizdan yetishib chiqqan Abu Nasr Forobiy, Abu Rayhon Beruniy, Abdurahmon Jomiy, Mahtumquli Firog‘iy va boshqa mashhur mutafakkirlar asarlarining noyob nusxalari Italiya kutubxonalarida asrab-avaylab saqlanmoqda.

Munosabatlarimizning bunday boy tarixi yangi bosqichda keng ko‘lamli sheriklik uchun mustahkam asos bo‘lib xizmat qilmoqda.

Hurmatli hamkasblar!

“Markaziy Osiyo – Italiya” formatida o‘zaro hamkorlikning ustuvor jihatlari haqidagi qarashlarimiz haqida qisqacha to‘xtalib o‘tmoqchiman.

Siyosiy sohada tashqi siyosat idoralari darajasida doimiy muloqotlarni davom ettirish tarafdorimiz. Xalqaro kun tartibida o‘zaro muvofiqlashtirish va kelishilgan yondashuvlarni talab etadigan bir qator dolzarb masalalar mavjud.

Italiya Bosh vaziri, hurmatli Meloni xonimning Ukraina atrofidagi vaziyatni tinch yo‘l bilan hal etish uchun to‘g‘ridan to‘g‘ri muzokaralarni tezroq boshlash bo‘yicha faol diplomatik sa’y-harakatlarini olqishlaymiz.

Sizning Yaqin Sharq muammosi va Afg‘oniston bilan hamkorlik istiqbollariga oid qarashlaringiz uchun minnatdorlik bildiraman.

Kecha Samarqandda biz bu nozik masalalarni batafsil muhokama qildik va yondashuvlarimiz o‘xshash ekanini qayd etdik.

Terrorizm, ekstremizm, radikalizm, narkotrafik va noqonuniy migratsiyaga qarshi kurashishda ko‘ptomonlama formatlarda ishchi mexanizmlarni va maxsus xizmatlarimiz o‘rtasida axborot almashishni yo‘lga qo‘yishni taklif etaman.

Iqtisodiyot sohasida so‘nggi yillarda O‘zbekiston va Italiya o‘rtasidagi o‘zaro savdo aylanmasi va investitsiyalar hajmi salkam uch barobar o‘sganini ta’kidlayman.

Italiyaning yetakchi kompaniyalari bilan birgalikda texnologik kooperatsiya loyihalari amalga oshirilmoqda.

Mamlakatni innovatsion rivojlantirishda Italiya ishbilarmonlar hamjamiyatining an’anaviy kuchli pozitsiyasini inobatga olib, savdo-sanoat palatalarimiz shafeligida biznes-muloqot uchun doimiy maydon – “Markaziy Osiyo – Italiya” ishbilarmonlar klubini tuzishni taklif etaman. Tadbirkorlarning keng ishtirokidagi bunday uchrashuvlar har yili mamlakatlarimiz poytaxtlarida o‘tkazilishi hamda savdo va investitsiya sohasidagi hamkorlik uchun yangi imkoniyatlar ochishi mumkin.

Biz, shuningdek, ko‘p tomonlama Sanoat va texnologik kooperatsiya dasturi ishlab chiqilishi va qabul qilinishi muhim, deb hisoblaymiz. Bu o‘rinda gap texnologiyalar transferi, ilg‘or bilimlar va eng yaxshi amaliyotlarni joriy etish, yuqori texnologik sanoat korxonalarini yaratish uchun qulay sharoitlarni shakllantirish haqida bormoqda.

Mavjud muvaffaqiyatli tajribani inobatga olib, mineral resurslar va qishloq xo‘jaligi xomashyosini chuqur qayta ishlash, elektrotexnika, kimyo, to‘qimachilik, charm-poyabzal, oziq-ovqat va boshqa qayta ishlash sohalari uchun zamonaviy asbob-uskunalarni ishlab chiqarish, ehtiyot qismlar va sanoat mahsulotlarini mahalliylashtirish, Italiyaning yetakchi brendlari bilan hamkorlikda dizayn markazlarini yaratish kooperatsiyaning muhim yo‘nalishlariga aylanishi mumkin.

Mintaqaviy ahamiyatga molik bo‘lgan loyihalarni amalga oshirish uchun Toshkent hududida Yevropa operatori boshqaruvi ostida maxsus sanoat parkini yaratish ishlariga kirishdik.

Kooperatsiya loyihalarini qo‘llab-quvvatlash uchun Italiyaning «SACE» va «SIMEST» davlat agentliklari, shuningdek, qo‘shma investitsiya jamg‘armalarini jalb qilish zarur, deb hisoblaymiz.

Biz Italiya hukumati bilan “yashil” transformatsiya sohasidagi samarali hamkorlikni yuksak qadrlaymiz. Zararli gazlar chiqarishni qisqartirish bo‘yicha milliy dasturlar ijrosiga ko‘maklashishga qaratilgan ko‘ptomonlama platformalarni ishga tushirish orqali keng ko‘lamli sheriklikni rivojlantirishga umid qilamiz.

Italiyaning yetakchi ishlab chiqarish va muhandislik kompaniyalarini jalb etgan holda, qayta tiklanadigan energetika, jumladan, Yevropa Ittifoqi mamlakatlariga “yashil” energiya yetkazib berish, korxonalar auditi va energiya samaradorligini oshirish, suv infratuzilmalari obyektlarini modernizatsiya qilish, vodorod texnologiyalarini rivojlantirish sohalaridagi loyihalarni amalga oshirishga tayyormiz.

Gumanitar sohadagi hamkorlik haqida so‘z yuritganda, o‘zining ta’lim dasturlarini sezilarli ravishda kengaytirib borayotgan Turin politexnika va Piza universitetlarining Toshkentdagi filiallari samarali faoliyat ko‘rsatayotganini alohida ta’kidlashni istar edim. Italiyaning boshqa yetakchi oliy ta’lim muassasalarining mintaqamizga nisbatan ortib borayotgan qiziqishini olqishlaymiz.

Muhandislik, dizayn, suvni tejash va biologik texnologiyalar kabi yo‘nalishlarda ilmiy ishlanmalar yaratish va moliyalashtirish, akademik almashuvlar va kadrlar tayyorlash dasturlari uchun “Markaziy Osiyo – Italiya” ilmiy-ta’lim konsorsiumini tashkil etish tashabbusini ilgari suramiz.

Yetakchi operatorlar o‘rtasida sheriklik aloqalarini yo‘lga qo‘yish va qo‘shma turistik mahsulotlarni yaratish uchun sayyohlik alyansini ishga tushirishdan manfaatdormiz.

Yaqinda Rim va Florensiya shaharlarida o‘tkazilgan ko‘rgazma va madaniy tadbirlar italiyalik do‘stlarimizda juda katta qiziqish uyg‘otganini ta’kidlash o‘rinlidir.

Shu munosabat bilan kelgusi yili Xivada mintaqa mamlakatlari va Italiya yoshlarining Kreativ iqtisodiyot va madaniy almashuvlar forumini o‘tkazishni taklif etaman.

Hurmatli delegatsiyalar rahbarlari!

Nutqimning yakunida O‘zbekiston “Markaziy Osiyo – Italiya” formatida o‘zaro manfaatli va ko‘pqirrali hamkorlikni yanada rivojlantirishga sodiq ekanini yana bir bor tasdiqlayman.

---

---

O‘zbekiston Respublikasi Prezidenti Shavkat Mirziyoyev amaliy tashrif bilan Qozog‘istonga keldi.

Ostona xalqaro aeroportida davlatimiz rahbarini Qozog‘iston Bosh vaziri Oljas Bektenov va boshqa rasmiy shaxslar kutib oldi.

Bugun O‘zbekiston yetakchisi «Markaziy Osiyo – Italiya» sammiti tadbirlarida ishtirok etadi.

---

---

O‘zbekiston Respublikasi Prezidenti Shavkat Mirziyoyev Qozog‘iston Respublikasi Prezidenti Qasim-Jomart Toqayevning taklifiga binoan 30-may kuni Ostona shahrida bo‘lib o‘tadigan «Markaziy Osiyo – Italiya» formatidagi oliy darajadagi sammitda ishtirok etadi.

Tadbirda mintaqa mamlakatlari yetakchilari va Italiya Bosh vaziri ishtirok etishi ko‘zda tutilgan.

Kun tartibiga muvofiq, ko‘p qirrali hamkorlikni, eng avvalo «yashil» iqtisodiyot, investitsiyalar, innovatsiyalar, fan va ta’lim sohalarida yanada rivojlantirish masalalari ko‘rib chiqiladi.

---

---

O‘zbekiston Respublikasi Prezidenti Shavkat Mirziyoyev va Italiya Respublikasi Bosh vaziri Jorja Meloni Samarqand shahridagi Kongress markazida tashkil etilgan «O‘zbekiston va Italiya: sivilizatsiyalar muloqoti» ko‘rgazmasini tomosha qildilar.

Noyob ekspozitsiya ikki mamlakat o‘rtasidagi chuqur tarixiy, ilmiy va madaniy aloqalarga bag‘ishlangan. U «Rim va Kushon imperiyalarining savdo munosabatlari», «Birinchi Uyg‘onish davri», «Marko Polo», «Amir Temur», «Mirzo Ulug‘bek» va «Zahiriddin Muhammad Bobur», «XIX asrda O‘zbekistondagi italiyaliklar», «Ikkinchi jahon urushida o‘zbekistonliklarning Italiyani ozod qilishga qo‘shgan hissasi», «O‘zbekiston va Italiya: madaniy merosni asrash» kabi 9 ta mavzuli bo‘limdan tashkil topgan.

Mehmonlarga Afrosiyobning «Samarqand hukmdori tomonidan elchilarni qabul qilish marosimi» nomli devoriy suratning mashhur italiyalik usta Mauro Pellitsonni tomonidan Florensiya mozaikasi uslubida ishlangan noyob nusxasi namoyish etildi.

Shuningdek, yetakchilar turli tarixiy yodgorliklar, grafik tasvirlar, qo‘lyozma va miniatyuralar, nodir adabiy nashrlar, haykallar, arxiv suratlari va hujjatlari bilan tanishdilar.

---

---

Samarqand shahrida bo‘lib o‘tgan muzokaralar yakunida O‘zbekiston Respublikasi Prezidenti Shavkat Mirziyoyev va Italiya Respublikasi Bosh vaziri Jorja Meloni Strategik sheriklik munosabatlarini mustahkamlash to‘g‘risidagi qo‘shma deklaratsiyani qabul qildilar.

Ular huzurida tashrif doirasida imzolangan, jumladan:

– investitsiyalarni rag‘batlantirish va o‘zaro himoya qilish to‘g‘risida;

– strategik ahamiyatga ega xomashyo sohasida hamkorlik to‘g‘risida;

– migratsiya va harakatlanish erkinligi sohasida hamkorlik to‘g‘risida;

– barqaror rivojlanish va atrof-muhitni muhofaza qilish, shuningdek, madaniy merosni saqlash sohalarida hamkorlik to‘g‘risida;

– Iqlim jamg‘armasi va Italiya qishloq xo‘jaligi konfederatsiyasi bilan hamkorlik, «Sogesid» va «Ansaldo» kompaniyalari bilan «yashil» rivojlanish sohasida hamkorlik to‘g‘risida;

– Tushia, Piza va Turin universitetlari bilan sheriklik to‘g‘risidagi ikki tomonlama bitimlarni almashish marosimi ham o‘tkazildi.

Shuningdek, rasmiy tashrif doirasida Italiya Milliy tadqiqotlar markazi, «SIMEST» va «Danieli» kompaniyalari, Peruja universiteti hamda boshqa tashkilotlar bilan qator hujjatlar imzolandi.

---

---

Hurmatli Forum ishtirokchilari!

Hurmatli mehmonlar!

Avvalambor, sizlarni “Raqamli texnologiyalar davri: kelajakka huquqiy nazar” mavzusidagi “Tashkent Law Spring” IV xalqaro yuridik forumining ochilishi bilan samimiy qutlayman.

Anjumanda jahonning nufuzli tashkilotlari va 40 dan ortiq davlatlaridan yuqori martabali delegatlar, yetakchi oliygohlar va “aql markazlari”ning taniqli olimlari va ekspertlari ishtirok etayotgani uning nufuzi va ahamiyati tobora oshib borayotganini yaqqol ko‘rsatmoqda.

Yuksak texnologik taraqqiyot jarayonida inson manfaatlari va adolat tamoyillariga amal qilish, samarali huquqiy mexanizmlarni yaratish, raqamli suverenitetni ta’minlash bo‘yicha xalqaro hamkorlikni har tomonlama kuchaytirishni davrning o‘zi taqozo qilmoqda.

Texnologiyalar va virtual munosabatlar shiddat bilan hayotimizga kirib kelayotgan bugungi kunda sun’iy intellekt kabi taraqqiyotning eng ilg‘or yutuqlarini umumbashariyat manfaatlari yo‘lida oqilona va samarali foydalanish zarur, deb hisoblaymiz.

Yangi O‘zbekistonda raqamli texnologiyalar yordamida davlat boshqaruvi modernizatsiyasi va davlat xizmatlarini elektronlashtirish, ochiqlik va shaffoflikni ta’minlash hisobiga “xizmat ko‘rsatuvchi davlat” tamoyilini ro‘yobga chiqarishga katta e’tibor berilmoqda.

Oddiy odamlarga keng qulayliklar yaratayotgan sun’iy intellekt hayotimizga chuqur kirib kelmoqda. Shuni inobatga olib, biz Sun’iy intellekt texnologiyalarini 2030-yilga qadar rivojlantirish strategiyasini qabul qildik, onlayn-rejimda ishlovchi platformalar hamda integratsiyalashgan bilimlar bazalarini ishga tushirdik.

Shaxsiy daxlsizlik huquqi va taraqqiyot ehtiyojlari o‘rtasida nozik muvozanatni topish, intellektual mulk himoyasi, sohada qulay investitsiyaviy muhitni ta’minlash, shuningdek, yangi voqelik – “raqamli dunyo” sharoitida davlatlarning huquqiy transformatsiya jarayonlariga muvaffaqiyatli o‘tishi, ayniqsa, sun’iy intellekt yo‘nalishida tizimli hamkorlikni kuchaytirish va undan foydalanish etikasi bo‘yicha namunaviy qoidalar ishlab chiqish ustuvor ahamiyatga egadir. Ushbu innovatsion huquqiy asos mazkur sohani samarali tartibga solishda barcha davlatlar uchun o‘ziga xos namuna bo‘lib xizmat qilishi shubhasiz.

Forumda ana shu muhim jihatlarni alohida hisobga olib, eng dolzarb masalalar muhokama qilinishi hamda amaliy taklif hamda tashabbuslar ishlab chiqilishi raqamli kelajakning mustahkam poydevorini yaratish va raqamli transformatsiya yo‘lida yana bir muhim qadam bo‘ladi, deb ishonaman.

Anjuman doirasida ilk bor Yoshlar forumi o‘tkazilayotgani ham diqqatga sazovordir. Chunki bu sohalar rivojini yosh avlodning faol ishtirokisiz tasavvur etib bo‘lmaydi. Zero, navqiron huquqshunoslarning innovatsion g‘oyalarini qo‘llab-quvvatlash va ularni qonun ijodkorligi jarayoniga keng jalb etishda bunday samarali muloqot maydonlarining ahamiyati g‘oyat kattadir.

Ana shunday ezgu ishlarda sizlarga kuch-g‘ayrat, mustahkam sog‘liq va yangi yutuqlar, Forum ishiga esa muvaffaqiyat tilayman.

Shavkat Mirziyoyev,

O‘zbekiston Respublikasi Prezidenti

---

---

Italiya Respublikasi Bosh vaziri Jorja Meloni rasmiy tashrif bilan mamlakatimizga kelgach, O‘zbekiston Respublikasi Prezidenti Shavkat Mirziyoyev hamrohligida Samarqand shahridagi Registon maydonida bo‘ldi.

YUNESKOning Butunjahon merosi ro‘yxatiga kiritilgan, dunyoga mashhur Registon maydoni buyuk ajdodlarimizning bunyodkorlik salohiyatini aks ettiruvchi mamlakatimizning asosiy tashrif qog‘ozidir. Majmuadagi Mirzo Ulug‘bek, Sherdor va Tillakori madrasalari o‘zining ulug‘vorligi, boy tarixi va betakror me’morchiligi bilan yurtimiz mehmonlarida chuqur taassurot qoldirmoqda.

Oliy martabali mehmonga ushbu Sharq shaharsozligi durdonasining qurilish tarixi, me’moriy yechimlari va bezaklarining o‘ziga xos jihatlari, ushbu maskan bilan bog‘liq muhim voqealar va shaxslar, shuningdek, o‘zbek xalqining madaniy merosi haqida batafsil ma’lumot berildi.

So‘ngra davlat rahbarlari «Silk Road Samarkand» xalqaro turizm markazidagi «Boqiy shahar» tarixiy-etnografik bog‘ida bo‘ldilar. Xalqimizning boy madaniy merosi, hunarmandchilik va amaliy san’atini aks ettiruvchi ko‘rgazmalar tomosha qilindi. Raqs jamoalarining chiqishlaridan iborat madaniy dastur namoyish etildi.

---

---

O‘zbekiston Respublikasi Prezidenti Shavkat Mirziyoyevning taklifiga binoan Italiya Respublikasi Bosh vaziri Jorja Meloni 28-may kuni rasmiy tashrif bilan mamlakatimizga keldi.

Samarqand xalqaro aeroportida Bosh vazirni davlatimiz rahbari kutib oldi.

Oliy martabali mehmon sharafiga ikki davlat bayroqlari ko‘tarildi va faxriy qorovul saf tortdi.

Tashrifning asosiy tadbirlari ertaga, 29-may kuni bo‘lib o‘tadi.

Oliy darajadagi muzokaralar va boshqa qator ikki tomonlama tadbirlar o‘tkazilishi ko‘zda tutilgan.

---

---

O‘zbekiston Respublikasi Prezidenti Shavkat Mirziyoyev Samarqand shahriga jo‘nab ketdi.

28-29-may kunlari Italiya Respublikasi Bosh vaziri Jorja Meloni rasmiy tashrif bilan mamlakatimizda bo‘ladi.

Samarqandda bo‘lib o‘tadigan oliy darajadagi muzokaralarda O‘zbekiston-Italiya strategik sheriklik munosabatlarini yanada mustahkamlash va ko‘p qirrali hamkorlikni kengaytirish masalalari ko‘rib chiqilishi rejalashtirilgan.

---

---

Prezident Shavkat Mirziyoyev 27-may kuni temir yo‘llarni rivojlantirish chora-tadbirlari bo‘yicha taqdimot bilan tanishdi.

Davlatimiz rahbarining 2023-yil 10-oktyabrdagi qaroriga muvofiq, bu soha tubdan isloh qilinmoqda. “O‘zbekiston temir yo‘llari” aksiyadorlik jamiyati tarkibiy jihatdan o‘zgartirilib, nosohaviy bino, yondosh yer va ortiqcha vazifalar qisqartirildi. Natijada ilgari zarar bilan ishlagan kompaniya o‘tgan yili 47 milliard so‘m sof foyda bilan chiqdi. “Temiryo‘lkargo” kompaniyasi tashkil etilgach, yuk vagonlaridan foydalanish samaradorligi 2 karra oshdi.

Lekin hali imkoniyatlar ko‘p. Taqdimotda soha infratuzilmasini rivojlantirish va daromadni oshirish vazifalari ko‘rsatib o‘tildi.

Xususan, tranzit yuklarini tashish quvvatidan to‘liq foydanilmayapti. Buni kelgusi yillarda 40 foizga oshirish orqali daromadni 2 karra ko‘paytirish mumkin.

Masalan, ilk bor Xitoy – Turkiya yo‘nalishi bo‘yicha yuk poyezdlari qatnovi yo‘lga qo‘yildi. Yurtimizda yangi poyezdlar olib kelinib, qatnovlar yildan yilga ko‘paymoqda. Shu bois temir yo‘l infratuzilmasi o‘tkazuvchanligini izchil oshirib borish zarurligi ta’kidlandi.

Bu masala, ayniqsa, Toshkent atrofida dolzarb. Hozir tashqi yuklarning 70 foizi “Chuqursoy” stansiyasi orqali tashilmoqda. Ba’zan bunga bir necha kun vaqt sarflanib, ortiqcha xarajat va navbatga sabab bo‘layapti.

Shu bois yuk stansiyalarini poytaxt hududidan tashqariga chiqarish, Yangiyo‘l tumani va Yangi Toshkent yaqinida yirik stansiyalar barpo etish taklif qilinmoqda. Shuningdek, poytaxtimizni aylanib o‘tuvchi “Ozodlik – Yangiyer” temir yo‘li qurilishi ko‘zda tutilgan. Natijada Farg‘ona vodiysi bilan boshqa viloyatlar o‘rtasidagi yuk tashuvlari Toshkent shahriga kirmasdan amalga oshiriladi.

Yangi loyihalardan yana biri Samarqand – Urgut yo‘lidir. Hozirda ishlar boshlanib, 7 kilometr temir izlar yotqizilgan. Bu yo‘nalish uzunligi jami 54 kilometr bo‘lib, 2 ta vokzal, “Urgut” iqtisodiy zonasida 2 ta yuk stansiyasi quriladi.

Vokzallarga kirib-chiqish tartibi, xizmatlar sifati masalalariga ham to‘xtalib o‘tildi. Yo‘lovchilar harakatiga qulaylik yaratish, turistlar uchun sharoitni yaxshilash, avtoturargohlarni kengaytirish vazifalari qayd etildi.

Mutasaddilar, shuningdek, elektropoyezdlar olib kelish, xizmat sifatini yaxshilash rejalari bo‘yicha axborot berdi.