Bo'lim: Yangiliklar

Oʻzbekiston Respublikasi Prezidenti Shavkat Mirziyoyev 9-dekabr kuni Xalqaro avtomobil federatsiyasining (FIA) Toshkent shahrida boʻlib oʻtadigan Bosh assambleyasida ishtirok etish uchun mamlakatimizda boʻlib turgan ushbu nufuzli tashkilotning prezidenti Muhammad bin Sulaym boshchiligidagi delegatsiyani qabul qildi.

Uchrashuvda delegatsiya tarkibida FIA Senati prezidenti Karmelo Sans de Barros hamda mobillik va turizm boʻyicha vitse-prezidenti Tim Shirman ham ishtirok etdilar.

Avtosportni tartibga soluvchi va yoʻl harakati xavfsizligini targʻib qiluvchi ushbu global tashkilot bilan oʻzaro manfaatli hamkorlikni kengaytirishning dolzarb masalalari muhokama qilindi.

Muhammad bin Sulaym Oʻzbekistonda amalga oshirilayotgan professional va ommaviy sportni rivojlantirish, sogʻlom turmush tarzini targʻib qilish, aholi oʻrtasida jismoniy faollikni oshirish hamda barkamol avlodni tarbiyalashga qaratilgan keng koʻlamli islohotlarni yuqori baholadi.

Mamlakatimizda avtomobil sportining kartingdan tortib, to “Formula” poygalarigacha boʻlgan barcha yoʻnalishlarini rivojlantirishda yaqindan hamkorlik qilish muhimligi qayd etildi.

FIA universitetining imkoniyatlaridan foydalangan holda oʻzbekistonlik poygachilar, karting haydovchilari, muhandislar, konstruktor va mexaniklarni tayyorlash, Oʻzbekistonda zamonaviy avtosport infratuzilmasini yaratish, piyoda va transport vositalari harakati xavfsizligini taʼminlash dasturlarini amalga oshirishga koʻmaklashish hamda mazkur xalqaro tashkilot shafeligida xalqaro musobaqalar, avvalo, “Formula-1” bosqichlarini oʻtkazish masalalariga alohida eʼtibor qaratildi.

Uchrashuv yakunida mamlakatimiz yetakchisi Xalqaro avtomobil federatsiyasi bilan hamkorlikni rivojlantirish, shuningdek, Oʻzbekistonda avtosportni xalqaro standartlarga muvofiq ommalashtirishga qoʻshgan katta shaxsiy hissasi uchun FIA rahbariga davlatimizning yuksak mukofoti – “Doʻstlik” ordenini topshirdi.

Taʼkidlash joiz, Oʻzbekiston 2019-yildan buyon federatsiyaning faol aʼzosi hisoblanadi. Oʻtgan yili Samarqandda FIAning 120 yilligiga bagʻishlangan navbatdan tashqari Bosh assambleyasi boʻlib oʻtgan edi. Bu yilgi tadbir doirasida 12-dekabr kuni “Humo Arena” majmuasida yuqori martabali xorijiy mehmonlar va chempion poygachilar ishtirokida eng namunali sportchilar va jamoalarni taqdirlash marosimi oʻtkaziladi.

Prezident Shavkat Mirziyoyev 9-dekabr kuni avtomobil yoʻllari sohasida amalga oshirilayotgan ishlar va kelgusi rejalar yuzasidan taqdimot bilan tanishdi.

Oxirgi uch yilda sohada bajarilgan ishlar, moliyalashtirish hajmi va amaliy natijalar haqida maʼlumot berildi.

Ushbu davr mobaynida avtoyoʻl sohasiga qariyb 40 trillion soʻm ajratilib, 63 ming kilometr yoʻlda qurilish va taʼmirlash ishlari bajarildi. Sohaga xorijdan jalb qilinayotgan mablagʻlar 3 barobar oshib, 2025-yilda 1,2 milliard dollarga yetdi. Yoʻl qurilishida namunaviy andozalardan voz kechilib, har bir hududning geologik va ekologik xususiyatlaridan kelib chiqqan holda loyihalashtirish amaliyoti joriy etildi. Zamonaviy turdagi qoplamalar ishlab chiqilib, yoʻllarning xizmat muddati 1,5 barobarga oshirildi.

Taqdimotda sohada mavjud muammolarni hal etish yuzasidan taklif va rejalar taqdim qilindi. Avvalo, mavjud umumiy foydalanishdagi va ichki yoʻllar hamda koʻpriklarni taʼmirlash, yangilarini barpo etishda ilgʻor tajriba va jahonda oʻzini oqlagan texnologiyalardan foydalanish sustligi koʻrsatib oʻtildi.

Kelgusi yillarda 21 ming kilometr yoʻllarni qurish va taʼmirlash, 14 ming kilometr tuproq yoʻllarni shagʻallashtirish hamda 325 ta koʻprikni taʼmirlash rejalashtirilgan. Bunda xorijiy ekspertlar va texnologiyalarni keng jalb qilish, ilgʻor standartlarni joriy qilgan holda ishni tashkil etish topshirildi.

Ogʻirligi meʼyordan ortiq yuk avtomashinalarining harakatlangani oqibatida 1800 kilometr yoʻl taʼmirtalab holga kelib qolgani koʻrsatib oʻtildi.

Shu munosabat bilan yuk transporti vaznini nazorat qilish uchun oʻlchov tarozilari tarmogʻini kengaytirish zarurligi qayd etildi. Hozirda 9 ta shunday tarozi oʻrnatilgan, 8 tasini oʻrnatish ishlari davom etmoqda. Kelgusida yana 35 ta koʻchma va statsionar nazorat-oʻlchov maskanini barpo etishga topshiriq berildi.

Mutasaddilarga ogʻirlik va gabarit nazorati bilan bogʻliq barcha jarayonlarni qamrab olgan idoralararo elektron axborot tizimini ishga tushirish topshirildi. Shuningdek, ob-havo sharoitlaridan kelib chiqib, ogʻir vaznli transport vositalari harakatlanishini mavsumiy cheklash tartibini ishlab chiqish taklif etildi.

Bugungi kunda yangi yoʻllarning 61 foizini, “Tashabbusli budjet” doirasida esa ichki yoʻllarning 92 foizini xususiy sektor qurmoqda. Uzoq yillar davlat monopoliyasida boʻlgan yoʻllarni saqlash ishlari ham bosqichma-bosqich xususiy sheriklikka berilmoqda.

Bu ishlarni kengaytirib, kelgusi yilda 3 ming kilometr, 2030-yilga borib esa 6,3 ming kilometr yoʻllarni saqlashga tadbirkorlarni jalb qilish rejalashtirilgan. Shuningdek, Osiyo taraqqiyot banki ishtirokida 86 ta tumanda quriladigan yoʻllarni toʻliq mahalliy pudratchilarga berish zarurligi koʻrsatib oʻtildi.

Sohada raqamlashtirish darajasi past ekani, mavjud 59 ta xizmatning faqat 20 tasi raqamlashgani qayd etildi. Kelgusi yilda 28 ta xizmatni elektron shaklga oʻtkazish, intellektual transport tizimini joriy etish va 7 ta yangi elektron platformani ishlab chiqish muhimligi taʼkidlandi.

Taqdimot yakunida belgilangan vazifalardan kelib chiqqan holda, Oʻzbekiston avtomobil yoʻllarini 2035-yilgacha rivojlantirish strategiyasini ishlab chiqish topshirildi.

Prezident Shavkat Mirziyoyev mahallalarni ishsizlik va kambagʻallikdan xoli hududlarga aylantirish, aholi bandligini taʼminlash boʻyicha amalga oshirilayotgan ishlar yuzasidan axborot bilan tanishdi.

Tanqidiy ruhda oʻtgan yigʻilishda ishga solinmayotgan imkoniyatlar, bu boradagi sustkashliklar koʻrsatib oʻtildi.

Yigʻilishda “mahalla yettiligi” aʼzolarining ish samaradorligini baholash uchun aniq mezonlar mavjud emasligi, ularning asosiy vazifasi boʻlgan ishsizlik va kambagʻallikni qisqartirishda masʼuliyatini yanada oshirish zarurligi taʼkidlandi. “Yettilik” faoliyati aholi bandligi va daromadlari ortishida bevosita aks etishi shartligi, mazkur yoʻnalishda manzilli va natijaga yoʻnaltirilgan ishlarni kuchaytirish zarurligi qayd etildi.

Mahallalarda kambagʻallik va ishsizlikni qisqartirishda, avvalo, ularning muammolari va “oʻsish nuqtalari”ni aniqlab, tizimli chora-tadbirlarni ishlab chiqish va amalga oshirish topshirildi. Shuningdek, aholi murojaatlarini bevosita mahallaning oʻzida hal etishga eʼtiborni kuchaytirish vazifasi qoʻyildi.

Ogʻir toifadagi mahallalar boʻyicha amalga oshirilayotgan ishlar koʻrib chiqildi. Ushbu hududlarga alohida eʼtibor qaratib, infratuzilma, elektr taʼminoti, internet tarmogʻi, tomorqadan foydalanish imkoniyatlarini kengaytirish topshirildi.

Joriy yilda mamlakatimizda kambagʻallik darajasi 8,9 foizdan 6 foizga tushishi kutilmoqda. Kelgusi yilda bu koʻrsatkichni 4,5 foizgacha qisqartirish maqsad qilingan.

Buning uchun mahallalarda ishlarni tashkil qilishga kompleks yondashish, barqaror bandlik yoʻnalishidagi xizmatlar qamrovini kengaytirish, daromad manbalarini yaratish, aholini kasb-hunarga oʻqitish va tadbirkorlikka jalb qilish boʻyicha vazifalar belgilab berildi.

Har bir kambagʻal oila boʻyicha uning real imkoniyatlari va xohish-istaklarini inobatga olgan individual rejalarni ishlab chiqish muhim ekani taʼkidlandi.

Loyihaviy yondashuv doirasida “Bandlik organlari – ish beruvchilar hamkori”, “Teng imkon – inklyuziv bandlik”, “Barqaror kelajak sari”, “20 ta mahalliy brend”, “Bir kontur – bir mahsulot”, “Mahallada tadbirkorlikni rivojlantirish”, “Ijara yer va tomorqada suv taʼminotini yaxshilash”, “Eski bogʻlarni yangilash”, “1 ming gektar mevali bogʻ”, “Eksportchi kooperativlar” kabi dasturlar bilan 1 million nafar kambagʻal aholini qamrab olish rejalashtirilgan.

Kambagʻallik va ishsizlikni kamaytirishda mahallalarda kichik va oʻrta loyihalarni amalga oshirish, jumladan, chegara va anklav hududlarda infratuzilmani yaxshilash, tun-u kun ishlaydigan koʻchalar, turistik mahallalar, mikrosanoat markazlarini tashkil etish, sohil va yoʻl boʻyi infratuzilmani rivojlantirish chora-tadbirlari taqdimot qilindi.

Bandlik dasturining 2025-yildagi ijrosi va 2026-yilgi dasturni shakllantirish, norasmiy bandlikni qisqartirish masalalari ham koʻrib chiqildi.

Prezidentimiz mutasaddilarga mahallalardagi masalalarni manzilli hal qilish, aholi ehtiyojlari asosida amaliy ishlar samaradorligini oshirish, bandlik va kambagʻallikni qisqartirish borasidagi vazifalarning yuksak masʼuliyat bilan ijrosini taʼminlash yuzasidan topshiriqlar berdi.

Prezident Shavkat Mirziyoyev paxtachilik va gʻallachilikni moliyalashtirishni samarali tashkil etish hamda agrar sohada subsidiyalar ajratishning yangi tizimi haqidagi taqdimot bilan tanishdi.

Taqdimot avvalida joriy yilda sohaga yoʻnaltirilgan moliyaviy resurslar va ularning natijalari to‘g‘risida axborot berildi.

Qayd etilganidek, paxtachilik va gʻallachilikni moliyalashtirish, qishloq xoʻjaligi texnikalari bilan taʼminlash va suv tejovchi texnologiyalarni joriy etishga jami 29 trillion soʻm ajratildi. Sohaga 2,35 trillion soʻm subsidiyalar yoʻnaltirildi.

Oʻz mablagʻidan paxta yetishtirgan xoʻjaliklarga paxta qiymatining 10 foizi miqdorida subsidiya ajratilishi natijasida 3430 fermer va klasterlar 151 ming gektar maydonda oʻz mablagʻi hisobidan paxta yetishtirdi va 1,9 trillion soʻm resurs tejaldi.

Yoki paxta yetishtirishga olingan kreditni joriy yil yakuniga qadar toʻliq qaytargan fermerlarga foiz toʻlovining 4 foiz bandini qaytarib berish imkoniyati tufayli 9002 nafar fermer 2,5 trillion soʻm imtiyozli kreditlarni muddatidan oldin qaytardi.

Kelgusi yilda paxta va gʻalla hosili, subsidiya va boshqa xarajatlarga jami 34,2 trillion soʻm ajratish rejalashtirilgani, qoʻshimcha 200 million dollar mablagʻ jalb qilib, 800 ta paxta terish mashinasi xarid qilinishi maʼlum qilindi. Bu borada joriy qilinishi taklif etilayotgani yangi qoʻllab-quvvatlash mexanizmlari koʻrib chiqildi.

Jumladan, 2026-yilda agrotexnik tadbirlar, shu jumladan, plyonka va egiluvchan quvurlar uchun qoʻshimcha 5 trillion soʻm ajratish taklif qilindi. Hosil yetishtirishda kredit limitining 50 foizigacha foydalanganda, sotilgan paxta qiymatining 5 foizi miqdorida subsidiya ajratilsa, oʻz mablagʻi va qisman kredit hisobidan hosil yetishtiradigan fermerlar soni 4-4,5 mingga yetishi va ularning 2,5-3 trillion soʻm mablagʻi iqtisod boʻlishi taʼkidlandi.

Hozirda fermerlarga kredit ajratishda moliyaviy barqaror xoʻjaliklarga ham, toʻlov intizomiga rioya etmayotganlariga ham bir xil foiz stavkasi qoʻllanmoqda. Shu bois, fermerlar orasida “intizomli boʻlish – arzon kredit” modelini shakllantirish uchun “A” kredit reytingiga ega xoʻjaliklarga 2 foizga, “B” toifadagilarga 1 foizga pasaytirilgan stavkada kredit ajratish va shu orqali intizomli fermerlarning kredit yukini kamaytirish taklif qilindi.

Bundan tashqari, oʻz mablagʻi hisobidan bugʻdoy yetishtirgan fermerlarga uning qiymatining 10 foizi miqdorida subsidiya ajratish tashabbusi bildirildi.

Davlatimiz rahbari ta’kidlaganidek, fermerlarni rag‘batlantirish, ularda ishonch va iqtisodiy manfaatni kuchaytirish – qishloq xo‘jaligi rivojining asosiy tayanchi hisoblanadi, shu bois agrar sohada qo‘llab-quvvatlash vositalari doimiy ravishda kengaytirib boriladi.

Oʻzbekiston Prezidentining joriy yil 22-noyabrdagi “Agrar sohani davlat tomonidan qoʻllab-quvvatlash tizimini tubdan takomillashtirish chora-tadbirlari toʻgʻrisida”gi Farmoniga muvofiq, agrar sohada davlat tomonidan qoʻllab-quvvatlash mexanizmlarini takomillashtirish maqsadida Qishloq xoʻjaligi vazirligi huzurida Agrar sohada toʻlovlar agentligi tashkil etildi.

Taqdimotda agentlikka yuklatilgan vazifalar ijrosi qanday tashkil etilishi koʻrib chiqildi.

Hozirgi vaqtda qishloq xoʻjaligida 52 turdagi subsidiya ajratilmoqda. Yangi tizimda ushbu jarayon tubdan soddalashtirilib, inson omili tubdan qisqartirilib, byurokratiya kamaytiriladi, arizalarni koʻrib chiqish toʻliq raqamlashtiriladi va barcha jarayonlar “Agroportal” orqali amalga oshiriladi.

Buning uchun “Agrosubsidiya” axborot tizimiga 10 dan ortiq vazirlik va idoralarning axborot tizimlari integratsiya qilinadi.

Jumladan, 2026-yil uchun moʻljallangan 1,3 trillion soʻmlik subsidiyalarni talabgorlar ishtiroki zarur boʻlmagan holda davlat idoralari tomonidan proaktiv tarzda, qolgan subsidiyalar ayrim kelishish, xulosa olish va hujjatlarni rasmiylashtirish bosqichlarini chiqarib tashlagan holda soddalashtirilgan tartibda, ortiqcha ovoragarchiliksiz beriladi. Natijada subsidiya ajratish muddatlari keskin qisqaradi.

Davlatimiz rahbari moliyalashtirish mexanizmlarini yanada takomillashtirish, subsidiyalarning manzilliligi va tezkorligini taʼminlash, barcha jarayonlarni raqamlashtirish va fermerlar uchun qulay sharoit yaratish yuzasidan mutasaddilarga aniq topshiriqlar berdi.

O‘zbekiston Respublikasi Prezidentining Farmoni

Mamlakatimiz qishloq xo‘jaligi tizimidagi ko‘p yillik fidokorona mehnati, soha rivojini yangi bosqichga ko‘tarish, intensiv agrotexnik usullarni qo‘llash orqali yuqori hosildorlikka erishish, el-yurt farovonligini yuksaltirishga qo‘shgan munosib hissasi, ilg‘or innovatsion texnologiyalar va zamonaviy ilm-fan yutuqlarini amaliyotga keng joriy etish, yer va suv resurslaridan oqilona foydalanish, mahsulotlarni sifatli qayta ishlash, yurtimiz eksport salohiyatini oshirish yo‘lidagi samarali faoliyati, malakali mutaxassislarni tayyorlash borasidagi katta xizmatlari hamda ijtimoiy hayotdagi faol ishtiroki uchun quyidagilar mukofotlansin:

«O‘zbekiston Respublikasida xizmat ko‘rsatgan paxtakor» faxriy unvoni bilan

Abduraxmonov Abdunabi Abduraimovich – Sharof Rashidov tumanidagi «Qo‘rg‘ontepa» ko‘p tarmoqli fermer xo‘jaligi boshlig‘i, Jizzax viloyati

Matniyozov Po‘lat Yoqubovich – Bog‘ot tumanidagi «Yoqub bobo o‘g‘li Omon» ko‘p tarmoqli fermer xo‘jaligi boshlig‘i, Xorazm viloyati

«O‘zbekiston Respublikasida xizmat ko‘rsatgan qishloq xo‘jaligi xodimi» faxriy unvoni bilan

Komilov Tursunboy – To‘raqo‘rg‘on tumanidagi «Komilov Tursunboy» ko‘p tarmoqli fermer xo‘jaligi ish boshqaruvchisi, Namangan viloyati

Masharipov Uktam Rustamovich – Xorazm viloyati hokimining qishloq va suv xo‘jaligi masalalari bo‘yicha o‘rinbosari

Ruziyev Zafar Sharopovich – Jizzax viloyati hokimining qishloq va suv xo‘jaligi masalalari bo‘yicha o‘rinbosari

Sanoyev Yodgor  – Vobkent tumanidagi qishloq xo‘jaligi bo‘yicha «Xayrobod» hududi rahbari, Buxoro viloyati

G‘aniyev Shuxrat Madaminovich – O‘zbekiston Respublikasi Prezidentining agrar rivojlanish masalalari bo‘yicha maslahatchisi

«O‘zbekiston Respublikasida xizmat ko‘rsatgan irrigator» faxriy unvoni bilan

Nadjimov Marat Faxriyevich – «O‘zsuvloyiha» aksiyadorlik jamiyati bosh direktori

Saidov Yusup Mamatovich – Uzun tumani «Suv yetkazib berish xizmati» davlat muassasasi muhandis-gidrotexnigi, Surxondaryo viloyati

«O‘zbekiston Respublikasida xizmat ko‘rsatgan pillachi» faxriy unvoni bilan

Yusupova Gulbaxar Erkinovna – Beruniy tumanidagi «KKR Ipak Cluster» mas’uliyati cheklangan jamiyati pillachisi, Qoraqalpog‘iston Respublikasi

«Fidokorona xizmatlari uchun» ordeni bilan

Gaffurov Xusanboy Abdullayevich – Oltiariq tumanidagi shaxsiy tomorqa yer egasi, Farg‘ona viloyati

Dadajanov Abduvoxit Toshpulatovich – Uchqo‘rg‘on tumanidagi «Toshpo‘lat hoji ota» ko‘p tarmoqli fermer xo‘jaligi boshlig‘i, Namangan viloyati

«Mehnat shuhrati» ordeni bilan

Bekturayev Ummat Abbasovich – Xovos tumanidagi «Xovos gulshani» bog‘dorchilik yo‘nalishidagi mas’uliyati cheklangan jamiyati rahbari, Sirdaryo viloyati

Yormatova Dilarom – O‘zbekiston davlat jahon tillari universiteti ekologiya va yashil resurslar kafedrasi mudiri

Ismoilov Farxodjon Voxobovich – Surxondaryo viloyati hokimining qishloq va suv xo‘jaligi masalalari bo‘yicha o‘rinbosari

Komilova Zamira Shukulloyevna – «G‘ijduvon ipak tola» mas’uliyati cheklangan jamiyati hudud agronomi, Buxoro viloyati

Latipov Sultonboy Allayorovich – Davlatlararo «Amudaryo» irrigatsiya kanallari boshqarmasining Toshsoqa bo‘limi boshlig‘i, Xorazm viloyati

Madumarova Muxabbatxon Yusufjonovna – Ulug‘nor tumanidagi «Yusufjon yeri» ko‘p tarmoqli fermer xo‘jaligi boshlig‘i, Andijon viloyati

Nishanbayev Saidkarim Abduxokimovich – O‘zbekiston Respublikasi ichki ishlar vaziri o‘rinbosari

Normuradov Parda Boymirovich – G‘uzor tumanidagi «Pachkamar qorako‘lchilik» mas’uliyati cheklangan jamiyati bosh cho‘poni, Qashqadaryo viloyati

Raximova Manzura Rivojiddinovna – Norin tumanidagi «Norin agropilla» mas’uliyati cheklangan jamiyati rahbari, Namangan viloyati

Rizayev Abdurazok Mamanovich – Karmana tumanidagi «Sevoltepa ravnaqi» ko‘p tarmoqli fermer xo‘jaligi boshlig‘i, Navoiy viloyati

Seyfullayev Baxtiyar Kemalovich – Taxtako‘pir tumani «Suv yetkazib berish xizmati» davlat muassasasi yetakchi muhandis-gidrotexnigi, Qoraqalpog‘iston Respublikasi

Tuxtakuziyev Abdusalim – Qishloq xo‘jaligini mexanizatsiyalash ilmiy-tadqiqot institutining tuproqqa ishlov berish mashinalari laboratoriyasi mudiri

Uzakov Ulug‘bek Yuldashevich – Qashqadaryo viloyati hokimining qishloq va suv xo‘jaligi masalalari bo‘yicha o‘rinbosari

Xasanova Muxabbat Mamaraximovna – Baxmal tumanidagi «Gulbuloq sabzavotlar makoni» fermer xo‘jaligi boshlig‘i, Jizzax viloyati

Xatamov Jaxongir Jurayevich – O‘zbekiston Respublikasi Bosh prokurorining o‘rinbosari

Xolmirzayev Dustmuxammad – Samarqand davlat veterinariya meditsinasi, chorvachilik va biotexnologiyalar universitetining yaylov chorvachiligi, qorako‘lchilik, asalarichilik va ipakchilik kafedrasi professori

Chariyeva Xilal Dustmuratovna – Ingichka tolali paxtachilik ilmiy-tadqiqot institutining intensiv navlar seleksiyasi laboratoriyasi mudiri, Surxondaryo viloyati

Shenazarov Baxodir Mamanazarovich – «Norin-Farg‘ona» irrigatsiya tizimi boshqarmasi bosh mutaxassisi, Farg‘ona viloyati

Yusupov G‘afurjon – Bekobod tumanidagi «Yusupov Obid fayz» ko‘p tarmoqli fermer xo‘jaligi ish boshqaruvchisi, Toshkent viloyati

«Do‘stlik» ordeni bilan

Abdulazizov Oblaqul – «Mirza-Pay» irrigatsiya tizimi boshqarmasi kanallari katta muhandis-gidrotexnigi, Samarqand viloyati

Abdullayev Nurali Yusufaliyevich – Agrosanoatni rivojlantirish agentligi direktori

Abdurayimov Jasurbek Odilovich – Baliqchi tumani hokimi, Andijon viloyati

Abillayev Urazbay – Don va sholi ilmiy-ishlab chiqarish birlashmasi laboratoriya mudiri, Qoraqalpog‘iston Respublikasi

Darvishev Shavkat Turayevich – Do‘stlik tumani hokimi, Jizzax viloyati

Zaytov Ziyauatdin Imamatdinovich – Nukus tumani hokimi, Qoraqalpog‘iston Respublikasi

Zyaduloyev Abduraxim Norovich – Sariosiyo tumanidagi «Faxriddin asalchi» fermer xo‘jaligi boshlig‘i, Surxondaryo viloyati

Karimov Rahmon Qahorovich – Buxoro tumanidagi «Karim Qahhor» fermer xo‘jaligi boshlig‘i, Buxoro viloyati

Komilov Baxrom Urinovich – Farg‘ona viloyatidagi «Ferghana Spinning» paxta-to‘qimachilik klasteri rahbari

Qo‘ldasheva Muxtasarxon Abdumutalibovna – Buloqboshi tumanidagi shaxsiy tomorqa yer egasi, Andijon viloyati

Mavlyanov Dusyar Irgashevich – Koson tumanidagi «Koson» ko‘p tarmoqli fermer xo‘jaligi boshlig‘i, Qashqadaryo viloyati

Oljabayeva Salixa Izbasarovna – Tomdi tumanidagi «Aldiyar-Qalanbay» tuyachilik fermer xo‘jaligi cho‘poni, Navoiy viloyati

Rashidova Dilbar Karimovna – Paxta seleksiyasi, urug‘chiligi va yetishtirish agrotexnologiyalari ilmiy-tadqiqot institutining organik paxtachilik laboratoriyasi mudiri

Sayfudinova Shahnoza Shonazarovna – Mirzaobod tumanidagi «A  Master  fruit» mas’uliyati cheklangan jamiyati bosh direktori, Sirdaryo viloyati

Umarov Xalimjon Komilovich – Quva tumani hokimi, Farg‘ona viloyati

Xamidullayev Abdulla – Bo‘stonliq tumanidagi «Escalade biznes invest» mas’uliyati cheklangan jamiyati direktori, Toshkent viloyati

Xolmuradov Akmal Arslanovich – Quyi Chirchiq tumani hokimi, Toshkent viloyati

Shukurov Alisher Nematullayevich – O‘zbekiston Respublikasi qishloq xo‘jaligi vazirining o‘rinbosari

«Jasorat» medali bilan

Axmadqulov Muxammadzulun Muxammadali o‘g‘li – Qo‘rg‘ontepa tumanidagi «Ahmadqulibek» ko‘p tarmoqli fermer xo‘jaligi boshlig‘i, Andijon viloyati

Barotov Sobir To‘xtayevich – «Amu-Buxoro» irrigatsiya tizimlari havza boshqarmasi ekskavator mashinisti, Buxoro viloyati

Karimov Ikrom G‘ulomovich – Arnasoy tumanidagi shaxsiy tomorqa yer egasi, Jizzax viloyati

Otepbergenov Sarsenbay Niyetbayevich – Qonliko‘l tumanidagi shaxsiy tomorqa yer egasi, Qoraqalpog‘iston Respublikasi

Rajabov Tursunpo‘lot Safarovich – Qiziltepa tumanidagi «Safarobod bog‘i» ko‘p tarmoqli fermer xo‘jaligi boshlig‘i, Navoiy viloyati

Suvonov Nurmuxammat Bobomuradovich – Paxtachi tumanidagi «Mirzayev Shuhrat Kenjayevich» fermer xo‘jaligining g‘alla o‘rish kombayni operatori, Samarqand viloyati

Xasanov Avaz Tadjikulovich – Bekobod tumanidagi shaxsiy tomorqa yer egasi, Toshkent viloyati

Hasanov Akbar Muhammadiyevich – Shahrisabz tumanidagi «Hasanov Akbar Muhammadiyevich» bog‘dorchilik yo‘nalishidagi mas’uliyati cheklangan jamiyati rahbari, Qashqadaryo viloyati

Yaxyayev Utkirjon Tuychiyevich – Xovos tumanidagi «Saboxat Haydarovna» fermer xo‘jaligi boshlig‘i, Sirdaryo viloyati

«Kelajak bunyodkori» medali bilan

Axmedov Jamshid Baxtiyor o‘g‘li – Paxtakor tumanidagi «Bog‘ishamol tomorqa eksport» mas’uliyati cheklangan jamiyati rahbari, Jizzax viloyati

Turdiyev Akbarali Usmon o‘g‘li – «Toshkent irrigatsiya va qishloq xo‘jaligini mexanizatsiyalash muhandislari instituti» milliy tadqiqot universitetining tayanch doktoranti

«Shuhrat» medali bilan

Abdulmitalipov Abdushukur Shuxratjon o‘g‘li – Bag‘dod tumanidagi «A.Madaminov» ko‘p tarmoqli fermer xo‘jaligi ish boshqaruvchisi, Farg‘ona viloyati

Ashirova Tajigul Allanazarovna – Ellikqal’a tumanidagi «Amirobod Mardoni» ko‘p tarmoqli fermer xo‘jaligi boshlig‘i, Qoraqalpog‘iston Respublikasi

Bozarov Ahror Xudaykulovich – Qarshi tumanidagi «Xudoyqulov Sarvarbek Ahrorovich» ko‘p tarmoqli fermer xo‘jaligi boshlig‘i, Qashqadaryo viloyati

Bozorboyev Toshqinboy Mutalibovich – Mingbuloq tumanidagi «Gulchehra Ozodbek Abdumutal» parrandachilik oilaviy korxonasi rahbari, Namangan viloyati

Djumanazarova Komila Saydaxmatovna – O‘rta Chirchiq tumanidagi «Dostonbek Azizbek agro» ko‘p tarmoqli fermer xo‘jaligi boshlig‘i, Toshkent viloyati

Dosmuxamedova Muxayyo Xusnitdinovna – Toshkent davlat agrar universitetining umumiy zootexniya va zootexnologiyalar kafedrasi professori

Jobborov Burxonjon Abdusattorovich – Baliqchi tumanidagi «Burhon» ko‘p tarmoqli fermer xo‘jaligi boshlig‘i, Andijon viloyati

Jumabayev Umirbek Sultanovich – Xonqa tumanidagi «Bog‘ibek Jonibek» ko‘p tarmoqli fermer xo‘jaligi boshlig‘i, Xorazm viloyati

Ibodullayev Jumanazar Maxmatmurodovich – Mirishkor tumanidagi «Turon agrotexservis mashina-traktor parki» mas’uliyati cheklangan jamiyatining g‘alla o‘rish kombayni operatori, Qashqadaryo viloyati

Ilxambekov Kaxramon Kasimjonovich – Yuqori Chirchiq tumanidagi «Eco agro product» bog‘dorchilik fermer xo‘jaligi boshlig‘i, Toshkent viloyati

Ismailov Maksud Koshnazarovich – To‘rtko‘l tumanidagi «Qo‘shnazar paxtakor» fermer xo‘jaligi boshlig‘i, Qoraqalpog‘iston Respublikasi

Isroilov Abdurashid Abduraxmonovich – Qishloq xo‘jaligini davlat tomonidan qo‘llab-quvvatlash jamg‘armasini boshqarish departamenti direktori

Ishpulatov Zokir Eshkurbonovich – O‘zbekiston Respublikasi suv xo‘jaligi vazirining birinchi o‘rinbosari – Suv xo‘jaligi obyektlarini ekspluatatsiya qilish agentligi direktori

Kadirov Mexroj Usmonovich – Samarqand tumanidagi shaxsiy tomorqa yer egasi, Samarqand viloyati

Kuziyev Baxodir Tuxtayevich – Boyovut tumanidagi «Anvarbek Abbosbek» fermer xo‘jaligining paxta terish kombayni mexanizatori, Sirdaryo viloyati

Ko‘ldoshev Feruz Qo‘ldosh o‘g‘li – Kogon tumanidagi «Combo Profit» mas’uliyati cheklangan jamiyati rahbari, Buxoro viloyati

Qosimov Akmaljon Malikjonovich – O‘zbekiston Respublikasi qishloq xo‘jaligi vaziri o‘rinbosari

Mansurov Asror Mexriddinovich – Buxoro viloyatidagi «Qorako‘l kumush kalava» paxta-to‘qimachilik klasteri rahbari

Mirzayev Nuroli Abdiraimovich – Ko‘kdala tumanidagi «Chiroqchi istiqlol parrandachilik» mas’uliyati cheklangan jamiyati rahbari, Qashqadaryo viloyati

Muqimov Xasan Xursanovich – Angor tumanidagi «Ikki do‘st Surxon Angor» ko‘p tarmoqli fermer xo‘jaligi boshlig‘i, Surxondaryo viloyati

Mo‘minov Isoq Murataliyevich – Jarqo‘rg‘on tumanidagi «Ergash bobo» ko‘p tarmoqli fermer xo‘jaligi boshlig‘i, Surxondaryo viloyati

Muxtarova Jamila Shukurovna – Jomboy tumanidagi «Jomboy agropilla» mas’uliyati cheklangan jamiyati pillachisi, Samarqand viloyati

Nadirov Abdukadir – Ohangaron tumanidagi «Taraqqiyot Baxtiyor» mas’uliyati cheklangan jamiyati rahbari, Toshkent viloyati

Nematov Mannob Nuriddinovich – Qumqo‘rg‘on tumanidagi «Guliston» ko‘p tarmoqli fermer xo‘jaligi boshlig‘i, Surxondaryo viloyati

Otamuratov Shonazar Sultanovich – Qo‘shko‘pir tumani veterinariya va chorvachilikni rivojlantirish bo‘limining veterinariya uchastkasi mudiri, Xorazm viloyati

Ochilov Farhod Baxtiyarovich – Navbahor tumanidagi shaxsiy tomorqa yer egasi, Navoiy viloyati

Raimqulov Rustam Nazarqulovich – Zafarobod tumanidagi «Forish yo‘llari» ko‘p tarmoqli fermer xo‘jaligi boshlig‘i, Jizzax viloyati

Rasulov Tavakaljon Qodirjon o‘g‘li – «Norin-Qoradaryo» irrigatsiya tizimlari havza boshqarmasi ekskavator mashinisti, Andijon viloyati

Rasulov Toji Mamatxoliqovich – Sherobod tumanidagi «Rasulov Toji» anorchilik yo‘nalishidagi mas’uliyati cheklangan jamiyati rahbari, Surxondaryo viloyati

Raximov Axrorjon Ortikboyevich – Dang‘ara tumanidagi «Best cotton fields» ko‘p tarmoqli fermer xo‘jaligi boshlig‘i, Farg‘ona viloyati

Raxmanova Zoxida Turgunovna – Sayxunobod tumani «Suv yetkazib berish xizmati» davlat muassasasi bosh muhandisi, Sirdaryo viloyati

Raxmatov Odil Sharipxonovich – Uychi tumanidagi «Uychi parranda» mas’uliyati cheklangan jamiyati rahbari, Namangan viloyati

Rahmonov Muxiddin Mamurovich – Mirzaobod tumani veterinariya va chorvachilikni rivojlantirish bo‘limining «Toshkent» veterinariya uchastkasi mudiri, Sirdaryo viloyati

Rashidov Shohruh Farhod o‘g‘li – Xatirchi tumanidagi «Xatirchi invest export» mas’uliyati cheklangan jamiyati rahbari, Navoiy viloyati

Rizonov Azimxon Xolovich – Kattaqo‘rg‘on tumanidagi «Azimxon Rizonov» ko‘p tarmoqli fermer xo‘jaligi boshlig‘i, Samarqand viloyati

Sauitbayev Marat Shayniyazovich – «Karmana-Konimex» irrigatsiya tizimi boshqarmasining Konimex tumanlararo gidrouchastkasi kanali boshlig‘i, Navoiy viloyati

Sobirov Muzaffar Ravshanbekovich – Qo‘shko‘pir tumanidagi «Muattar» ko‘p tarmoqli fermer xo‘jaligi boshlig‘i, Xorazm viloyati

Turabov Kamolxon Ziyavidinovich – Uchko‘prik tumanidagi «Ziyovuddin ota orzusi» bog‘dorchilik fermer xo‘jaligi boshlig‘i, Farg‘ona viloyati

Umarov Gulmurod Normurodovich – Jondor tumanidagi «Arjumanbonu chorvasi» parrandachilik klasteri boshlig‘i, Buxoro viloyati

O‘rinov Ikrom Shukurulloyevich – Olot tumanidagi «Shukrullo O‘rinov» ko‘p tarmoqli fermer xo‘jaligi boshlig‘i, Buxoro viloyati

Usmonov Jo‘rabek To‘lanboyevich – Qo‘shtepa tumanidagi «Ismoil Jo‘rabek saxovati» ko‘p tarmoqli fermer xo‘jaligi boshlig‘i, Farg‘ona viloyati

Xamraev Bobir Zoxir o‘g‘li – O‘simliklar karantini va himoyasi agentligi direktorining birinchi o‘rinbosari

Xamidov Odil Raximjonovich – Piskent tumanidagi «Uch avlod» fermer xo‘jaligining paxta terish kombayni mexanizatori, Toshkent viloyati

Xasanova Zarafshon Matyokubovna – Xiva tumanidagi «Qiyot bioservis» mas’uliyati cheklangan jamiyati rahbari, Xorazm viloyati

Xoliqov Qodirjon Dadamirzayevich – Kosonsoy tumanidagi «Namangan paxta teks» mas’uliyati cheklangan jamiyatining g‘alla o‘rish kombayni operatori, Namangan viloyati

Choriyev Azamat Mahammadiyevich – Qamashi tumanidagi «BBU-Azamat» dorivor o‘simliklar yetishtiruvchi mas’uliyati cheklangan jamiyati direktori, Qashqadaryo viloyati

Shayzakov Ikrom Uralovich – Do‘stlik tumanidagi «Ilhom Sharif» ko‘p tarmoqli fermer xo‘jaligi boshlig‘i, Jizzax viloyati

Sherov Erkin Kurbanovich – Pastdarg‘om tumanidagi «Eldor» chorvachilik fermer xo‘jaligi boshlig‘i, Samarqand viloyati

Shuxratov Sardor Shuxratovich – Guliston tumanidagi «Jasur Sardor fayzi» ko‘p tarmoqli fermer xo‘jaligi boshlig‘i, Sirdaryo viloyati

Erkinov Inxamjon Usmonovich – Jalaquduq tumanidagi «Mirjahon Asliddin dalasi» fermer xo‘jaligi suvchisi, Andijon viloyati

O‘zbekiston Respublikasi Prezidenti

Sh.Mirziyoyev

O‘zbekiston Respublikasi Konstitutsiyasi kuni bilan tabriklaymiz! Ushbu muhim sana mustahkam huquqiy asoslar, jamiyat birligi va barqaror taraqqiyotga intilishni bildiradi. Fursatdan foydalanib, barchaning faoliyatida ulkan muvaffaqiyatlar, barqarorlik va farovonlik tilaymiz. Adolat, qonuniylik va fuqarolik mas’uliyati tamoyillari mehnat faoliyatimizdagi yangi yutuqlar uchun doimo ilhom manbai bo‘lsin.

O‘zbekiston Respublikasi Prezidenti Shavkat Mirziyoyev 5-dekabr kuni yangi energetika quvvatlari va infratuzilma obyektlarini ishga tushirish hamda navbatdagilarining qurilishini boshlashga bag‘ishlangan tantanali marosimda ishtirok etdi.

Tadbirda Birlashgan Arab Amirliklari energetika va infratuzilma vaziri Suhayl al-Mazruiy, Turkiya Respublikasi energetika va tabiiy resurslar vaziri Alparslan Bayraktar va Ozarbayjon Respublikasi energetika vaziri Parviz Shahbozov, Qirg‘iz Respublikasi energetika vaziri Taalaybek Ibrayev, shuningdek, Jahon banki, Yevropa tiklanish va taraqqiyot banki, Osiyo taraqqiyot banki, Osiyo infratuzilmaviy investitsiyalar banki, Islom taraqqiyot banki va boshqa moliya institutlari, “ACWA Power” (Saudiya Arabistoni), “Aksa Enerji”, “Cengiz Enerji” (Turkiya), “Masdar” (BAA), “China Energy”, “Datang”, “Sinoma”, “Poly”, “CNTIC”, “Eagle Rise” (Xitoy), “EDF”, “Voltalia”, “TotalEnergies” (Fransiya), “Siemens Energy” (Germaniya) va “Nebras Power” (Qatar) vakillari ham qatnashdi.

Yangi obyektlar – qariyb 11 milliard dollarlik 42 ta energiya ishlab chiqarish, saqlash quvvatlari va boshqa infratuzilma inshootlari – mamlakatimizda amalga oshirilayotgan milliy energetika tarmog‘i salohiyatini mustahkamlashga qaratilgan keng ko‘lamli strategiyaning bir qismidir.

Qoraqalpog‘iston, Buxoro, Qashqadaryo va Toshkent viloyatlarida umumiy qiymati 3,3 milliard dollarga teng jami 3 ming 500 megavattli 16 ta quyosh, shamol, issiqlik va gidro elektrostansiyalari shular jumlasidan.

To‘liq quvvatga chiqqach, ular yiliga 15 milliard kilovatt-soat elektr energiyasi ishlab chiqaradi.

Natijada kelgusi yilda “yashil” energiya ishlab chiqarish hajmi 23 milliard kilovatt-soatga yetadi. Ushbu quvvatlar O‘zbekiston aholisining yillik elektr energiya iste’moli to‘liq qoplanishiga xizmat qiladi.

Eng muhimi, toza energiya hisobiga tabiiy gaz sarfi salkam 7 milliard kub metrga kamayadi. Atmosferaga 11 million tonna zararli moddalar chiqishining oldi olinadi.

Foydalanishga topshirilayotgan loyihalar orasida 1 ming 245 megavattli 10 ta energiya saqlash tizimi ham bor. Bu energiya eng ko‘p iste’mol qilinadigan tig‘iz vaqtlarda qo‘shimcha 1,5 milliard kilovatt-soat elektr energiyasini tarmoqqa uzatish imkonini beradi.

Qo‘shimcha ravishda ishga tushirilayotgan 11 ta yirik podstansiya va 420 kilometr yuqori kuchlanishli tarmoqlar tizimning barqaror ishlashiga xizmat qiladi.

Yangi tashkil etilgan yiliga 15 mingta transformator ishlab chiqaradigan “Angren Energo” hamda 155 ta gidro-agregat tayyorlab beradigan “Uzhydopower” korxonalari iqtisodiyotimizga muhim hissa qo‘shadi.

Davlatimiz rahbari marosimdagi nutqida ushbu tarixiy voqea O‘zbekistonning barqaror rivojlanishi yo‘lidagi yana bir amaliy qadam bo‘lishiga ishonch bildirdi.

– Bugun jadal sur’atlarda o‘sib borayotgan iqtisodiyotimiz va aholining talab hamda ehtiyojidan kelib chiqib, energetika tizimida katta islohotlarni amalga oshiryapmiz. Biz bu yo‘nalishda ikkita muhim maqsadga erishishni asosiy vazifa qilib belgilaganmiz. Birinchisi – barcha tarmoq va hududlar uchun ishonchli va uzluksiz energiya ta’minotini yo‘lga qo‘yish. Ikkinchisi esa ana shu rejamizni zamonaviy, ekologik toza va qayta tiklanuvchi muqobil manbalar hisobidan amalga oshirishdir, – dedi Prezidentimiz.

So‘nggi yillarda energetika tizimiga 35 milliard dollar xorijiy investitsiya jalb qilinib, 9 ming megavatt yangi quvvatlar ishga tushirilgani ta’kidlandi.

Natijada elektr ishlab chiqarish hajmi 2017-yildagi 60 milliard kilovatt-soatdan joriy yilda 85 milliard kilovatt-soatga yetdi.

E’tiborli jihati, salkam 5 ming megavattli quyosh va shamol, 400 megavattli gidro elektr stansiyalari ishga tushirildi. Jami generatsiya quvvatlarida “yashil” energiyaning ulushi bu yil 30 foizga yetkaziladi.

Bundan tashqari, xususiy sektor, aholi xonadonlari va ijtimoiy soha obyektlarida 2 ming megavattli kichik quyosh panellari o‘rnatildi. Ularda shu yilning o‘zida qo‘shimcha ravishda 2 milliard kilovatt-soatga yaqin muqobil energiya ishlab chiqarildi. Shuningdek, butun mamlakatimiz bo‘ylab 69 ming kilometr elektr tarmoqlari, 14 mingta transformator va yuqori kuchlanishli podstansiyalar yangilandi.

Sohadagi bunday o‘zgarishlar mahalliy korxonalar rivojiga ham katta turtki bermoqda. Ushbu korxonalar tomonidan yangi qurilayotgan elektr stansiyalari va tarmoqlariga yil boshidan buyon 700 million dollarlik qurilish materiallari, metall konstruksiyalar, kabel o‘tkazgichlar, elektr qurilmalari yetkazib berildi, loyihalash-injiniring va qurilish xizmatlari ko‘rsatildi.

Misol uchun, Norin kaskad gidro elektr stansiyasining 38 megavattli ilk gidro elektr stansiyasi to‘liq mahalliy mahsulotlardan foydalangan holda ishga tushirildi.

Davlatimiz  energetika sohasida erishilayotgan ulkan yutuq va marralarda investorlar va mamlakatimizning xalqaro sheriklarining beqiyos hissasi borligini qayd etdi.

O‘zbekiston yetakchisi kelgusi 5-yilda 150 milliard dollardan ziyod xorijiy investitsiyalar hisobidan minglab sanoat va infratuzilma obyektlarini ishga tushirib, yuqori daromadli ish o‘rinlari yaratilishini ma’lum qildi.

IT, sun’iy intellekt va “buyumlar interneti” kabi yangi yo‘nalishlardagi kompaniyalarga jozibador muhit yaratish uchun zamonaviy superkompyuter klasteri va data-markazlar sonini ko‘paytirish nazarda tutilgan.

Buning uchun ayni paytda Saudiya Arabistonining “DataVolt” kompaniyasi 3 milliard dollarlik investitsiya hisobiga 500 megavattli data-markaz qurish bo‘yicha loyihani amalga oshirishga kirishgan.

Bunday keng ko‘lamli ishlar elektr energiyasiga bo‘lgan talab va ehtiyojni kamida 1,5 barobarga oshiradi. Shu bois, Prezident yaqin kelajakdagi rejalarga to‘xtalib o‘tdi.

Birinchidan, elektr energiyasiga oshib borayotgan ehtiyojni qoplash uchun 2030-yilgacha qo‘shimcha 17 ming megavattdan ortiq qayta tiklanuvchi energiya quvvatlari ishga tushiriladi. Natijada “yashil” energiyaning jami generatsiyadagi ulushi 54 foizga yetkaziladi.

Yangi quvvatlarni yagona energiya tizimiga bog‘lash uchun yuqori kuchlanishli 6 ming kilometr tarmoqlar tortiladi. Xususan, kelgusi yilning o‘zida 1 ming kilometr tarmoqlar o‘tkazilib, podstansiyalarda 6 ming megavatt qo‘shimcha quvvatlar yaratiladi.

Ikkinchidan, xorijiy sarmoyalarni davlat-xususiy sheriklik asosida jalb etishni kengaytirish. Joriy yildan xususiy sheriklik tamoyillari nafaqat elektr energiyasini ishlab chiqarish, balki uni iste’molchilarga yetkazib berishda ham qo‘llanmoqda.

Xususan, Turkiyaning “Aksa Elektrik” kompaniyasi bilan Samarqand hududiy elektr tarmoqlarini xususiy boshqaruvga berish bo‘yicha kelishuvga erishilgan.

Ushbu kompaniya loyiha doirasida tarmoqni operatsion boshqaruvga olib, investitsiya kiritadi, tarmoqlarni modernizatsiya qiladi, yo‘qotishlarni bosqichma-bosqich 2 barobarga kamaytiradi. Natijada har yili o‘rtacha 20 million dollar tejaladi.

Shunday tajriba asosida kelgusi yilda Jizzax va Sirdaryo, 2027-yilda Namangan va Toshkent viloyatlari elektr tarmoqlari boshqaruvi ham investorlarga taklif etiladi.

Uchinchidan, aholining muqobil energiya manbalaridan foydalanishini faol qo‘llab-quvvatlash.

Yangi yilda 300 ta mahalla hududida aholi bilan kooperatsiya orqali 107  megavattli quyosh stansiyalari o‘rnatiladi. Bu ijtimoiy loyiha 30 mingta kambag‘al oilani “yashil” energiya bilan ta’minlash imkonini beradi. Ular o‘z ehtiyojidan ortiqcha elektr energiyasini tarmoqqa uzatib, daromad topadi.

Mamlakatimiz tadbirkorlari bu yil 40 megavattli kichik va mikro GESlar qurdi. Natijada 120 million kilovatt-soat elektr energiyasi ishlab chiqarildi va ular qo‘shimcha daromad manbaiga ega bo‘lishdi.

Kelgusi yilda yana 65 megavattli kichik va mikro GESlar barpo etiladi. Ushbu loyihalar hisobiga 80 mingta xonadonda elektr ta’minoti tubdan yaxshilanadi.

To‘rtinchidan, yaqinda Braziliyada o‘tgan COP-30 iqlim konferensiyasida mamlakatimiz o‘z tashabbusi bilan Parij bitimi doirasida muhim majburiyatni zimmasiga oldi: O‘zbekistonda 2035-yilgacha zararli gazlar emissiyasi 50 foizga qisqartirilishi maqsad qilindi.

Bu borada Jahon banki bilan dunyoda ilk innovatsion “iCRAFT” loyihasi ishga tushirildi. Uning doirasida O‘zbekiston tomonidan kamaytirilgan 23 million tonna issiqxona gazi hisobga olindi. Xalqaro darajada uglerod birliklari savdosi yo‘lga qo‘yildi.

Ta’kidlash joiz, shu yilning o‘zida 17 ta yirik sanoat korxonamiz “yashil” energiya bo‘yicha xalqaro sertifikatlar tizimiga o‘tdi. Kelgusi ikki yilda bunday korxonalar soni 100 taga yetkaziladi.

Beshinchidan, qo‘shni davlatlar bilan yagona energetika bozorini yaratish bo‘yicha sheriklikni mustahkamlash.

Mintaqa gidroenergetika salohiyatidan samarali foydalanib, birgalikda boshqarish maqsadida kelgusi yili Qirg‘iziston va Qozog‘iston bilan “Qambar-ota GES-1” loyihasini moliyalashtirishga kirishiladi.

Davlatimiz rahbari Yevropaga elektr energiyasini eksport qilish bo‘yicha “yashil koridor” loyihasi doirasida yaqindan hamkorlik qilayotgan Ozarbayjon va Qozog‘iston rahbariyatining qat’iy sa’y-harakatlarini alohida e’tirof etdi.

– Biz bugun ishga tushirayotgan barcha loyihalar iqtisodiy o‘sishni ta’minlab, kelajak avlodlarimiz uchun yangi imkoniyatlar eshigini ochadi. Bunday jadal harakatlarimiz va tashabbuslarimiz bilan biz yangicha modeldagi zamonaviy energetika tizimini albatta to‘liq barpo etamiz, – deya ta’kidladi Prezidentimiz.

Tadbir yakunida O‘zbekiston Prezidenti ramziy dastakni bosib, 42 ta energetika obyektining ishga tushirilishi hamda navbatdagi 21 tasining qurilishi boshlanishiga start berdi.

Xalq deputatlari Sirdaryo viloyati Kengashining navbatdan tashqari sessiyasi boʻlib oʻtdi. Unda Prezident Shavkat Mirziyoyev ishtirok etdi.

Yigʻilish avvalida davlatimiz rahbari “Inson qadri uchun” degan ezgu tamoyil asosida amalga oshirilayotgan islohotlarning natijasi sifatida Sirdaryo viloyatidagi ulkan oʻzgarishlarni alohida taʼkidladi.

– Ilgari asosan qishloq xoʻjaligiga bogʻlanib qolgan bu zaminda soʻnggi yillarda sanoat, servis, turizm yoʻqdan bor boʻldi. Biznes muhiti butunlay oʻzgardi, ilgʻor tadbirkorlar qatlami shakllandi, – dedi davlatimiz rahbari.

Sakkiz yilda Sirdaryo viloyatiga 4 milliard dollar investitsiya kiritildi. Shu davr mobaynida 187 ta yirik quvvat ishga tushirilib, 120 ming yangi ish oʻrni yaratildi. 50 ga yaqin yangi turdagi mahsulotlarni ishlab chiqarish yoʻlga qoʻyildi. Natijada sanoat hajmi 4 trillion soʻmdan 25 trillion soʻmga yetdi.

Ilgari dotatsiya olgan Guliston, Yangiyer shaharlari, Boyovut, Mirzaobod, Sayxunobod, Sirdaryo va Xovos tumanlari bugun oʻz xarajatini oʻzi qoplash darajasiga yetgani qayd etildi.

Sirdaryo tumanida kelgusi yili xitoylik sheriklar bilan 122 million dollarlik avtomobilsozlik loyihasi ishga tushiriladi. Yaqinda Qozogʻiston bilan hamkorlikda Sirdaryo tumanida Markaziy Osiyo xalqaro sanoat kooperatsiyasi markaziga start berildi. Ushbu markaz hududida qiymati 300 million dollarlik 14 ta sanoat korxonasi kelasi yilning birinchi choragi yakuniga qadar ish boshlashi, 2026-yilda yana 720 million dollarlik 40 ta yangi loyiha joylashtirilishi belgilandi.

Davlatimiz rahbari Sirdaryoda bogʻcha, maktab, shifoxona oʻrinlarini koʻpaytirish, elektr, suv, kanalizatsiya va yoʻllarni yaxshilash borasida ham amalga oshirilgan ishlarga toʻxtalib oʻtdi. Birgina joriy yilning oʻzida aholi turmush sharoitini yaxshilash uchun 100 million dollar resurs yoʻnaltirildi. Natijada 47 ta maktab, 45 ta bolalar bogʻchasi, 31 ta tibbiyot muassasasi, 5 ta sport va madaniyat maskani tubdan taʼmirlanib, zamonaviy jihozlar bilan taʼminlandi. Bu ishlar izchil davom ettirilib, kelasi yili yana 100 million dollar ajratilishi eʼlon qilindi.

Sessiyada tashkiliy masala ham koʻrildi. Prezidentimiz hokim vazifasini bajarayotgan Erkin Turdimov nomzodini Sirdaryo viloyati hokimi lavozimiga ilgari surdi.

Viloyat faollarining fikr-mulohazalari tinglanib, nomzod ovozga qoʻyildi. Ovoz berish natijasiga koʻra, Erkin Turdimov Sirdaryo viloyati hokimi lavozimiga tasdiqlandi.

Davlatimiz rahbari yangi hokim oldiga Sirdaryoni rivojlantirish boʻyicha aniq vazifalar qoʻydi. Jumladan, kelasi yillar davomida viloyatga jami 3 milliard dollar investitsiya kiritish, eksport hajmini 500 million dollarga yetkazish, 185 ming aholini ish bilan taʼminlash boʻyicha qatʼiy ishlash zarurligi qayd etildi.

Yigʻilishda viloyatda sanoat, servis, qishloq xoʻjaligini yanada rivojlantirish, infratuzilmani yaxshilash masalalari koʻrib chiqildi.

Soʻnggi yillarda xitoylik investorlar bilan hamkorlikda umumiy qiymati 500 million dollar boʻlgan 31 ta korxona ishga tushirilib, 5 ming nafar fuqaro yuqori daromadli ish oʻrinlari bilan taʼminlandi. Xitoylik hamkorlar bilan yana 700 million dollarlik 40 ta loyiha boʻyicha ishlar jadal davom etmoqda.

Yangiyer, Guliston va Shirin shaharlari, Sirdaryo, Boyovut, Guliston, Mirzaobod, Oqoltin, Xovos tumanlari hisobiga Sirdaryo erkin sanoat zonasi hududi 1080 gektargacha kengaytirildi. Viloyat va tuman hokimlariga sanoat zonasiga qoʻshib berilgan maydonlarda kamida 4 milliard dollarlik loyihalarni boshlash muhimligi koʻrsatib oʻtildi.

Buning uchun loyihalarning samaradorligini puxta hisoblab, investorlarga taqdimot qilish maqsadida Sirdaryo, Boyovut, Guliston, Mirzaobod, Oqoltin, Xovos tumanlari, shuningdek, Yangiyer, Guliston va Shirin shaharlari hokimlaridan iborat delegatsiyani Xitoyga yuborish topshirildi.

Qurilish materiallari boʻyicha Szyansu, Shandun va Guandun, kimyo sanoati boʻyicha Tyanszin, elektrotexnikada Fuszyan va Gonkong, yengil sanoatda Shandun va Sinszyan, farmatsevtika sohasida Shanxay va Szyansi hududlari bilan toʻgʻridan-toʻgʻri hamkorlik oʻrnatish vazifasi qoʻyildi.

Shuningdek, Guliston shahrida kamida 5 ming ish oʻrniga ega “Oʻzbekiston – Shanxay hamkorlik tashkiloti” savdo va sanoat zonasi tashkil etilishi belgilandi. Bu yerdagi obyektlar tayyor loyiha sifatida tadbirkorlarga sanoat ipotekasi yoki lizing asosida taklif etiladi.

Toshkent shahridagi sanoat korxonalarini bosqichma-bosqich poytaxtdan tashqariga koʻchirish jarayonida Sirdaryo erkin iqtisodiy zonasidagi boʻsh yerlar mavjud quvvatlarni joylashtirish uchun katta imkoniyat ekani taʼkidlandi.

Shu bois, poytaxtdan oʻz korxonasini Sirdaryoga koʻchirish istagida boʻlgan tadbirkorlarga sanoat zonasidagi yerlar soddalashtirilgan tartibda, chegirma bilan taqdim etiladi, ularga 10 milliard soʻmgacha imtiyozli kredit ajratiladi, xomashyoni temir yoʻl orqali tashishda arzonlashtirilgan tariflar qoʻllanadi.

Yigʻilishda tadbirkorlik va servis infratuzilmasini rivojlantirish masalalari ham koʻrib chiqildi.

2026-yilda viloyat infratuzilmasini yaxshilashga 1,5 trillion soʻm, tadbirkorlik loyihalari uchun 10 trillion soʻm resurs ajratish rejalashtirilgan. Shuning 753 milliard soʻmi ilk bor Sirdaryo viloyati va tuman budjetlariga mahallalar sharoitini yaxshilash uchun yoʻnaltiriladi.

Prezidentimiz aholi bandligini taʼminlash va kambagʻallikni qisqartirish boʻyicha yangicha yondashuvlar, samarali yechimlarni joriy etish uchun doim izlanish, oʻrganish va tajriba orttirish juda muhimligini taʼkidladi.

Shu maqsadda 11 ta tuman hokimining birinchi oʻrinbosarini Pekindagi Kambagʻallikka qarshi kurashish boʻyicha xalqaro markazda amaliyot oʻtashini tashkil qilish, sirdaryolik 50 yoshni Pekin shahrida avtomobillarga texnik xizmat koʻrsatish boʻyicha kurslarda oʻqitish topshirildi.

Shuningdek, Guliston universiteti qoshida Xitoyning “Lu Ban ustaxonasi” dasturi doirasida kasb-hunarga oʻqitish markazini, Sirdaryo tumanidagi tibbiyot texnikumi negizida esa Xitoy bilan hamkorlikda farmatsevtika texnologiyalari yoʻnalishida oliygoh tashkil etish boʻyicha koʻrsatmalar berildi.

Qishloq xoʻjaligini rivojlantirish masalalari ham atroflicha koʻrib chiqildi.

Ekin yerlarida suv taʼminotini yaxshilash maqsadida kelasi yili Boyovut tumanida sigʻimi 100 million kub metr boʻlgan “Sultonhovuz” suv ombori qurilishi boshlanadi. Bu orqali Boyovut, Guliston, Sayxunobod, Sirdaryo va Mirzaobod tumanlaridagi 110 ming gektarda yiliga ikki marta hosil olish imkoniyati yaratiladi.

Yigʻilishda aholi va tadbirkorlarning hayotini yengillashtirishga qaratilgan tashabbuslarga ham alohida toʻxtalib oʻtildi.

A-373 yoʻlining Sayxunobod va Guliston tumanlaridan oʻtuvchi 37 kilometr qismini oltita tasmali qilib rekonstruksiya qilish ishlarini boshlash topshirildi. Boyovut, Guliston, Xovos, Mirzaobod, Sirdaryo va Sayxunobodning 18 ta mahallasidagi 67 kilometr yoʻlni sement-beton qoplamaga oʻtkazish rejalashtirilgan.

Ikki kun oldin Guliston shahri Taraqqiyot mahallasidagi buyum bozori hududida joylashgan umumiy ovqatlanish shoxobchalaridan birida gaz balloni portlashi natijasida 29 nafar fuqaro jarohat oldi.

Afsuski, mazkur baxtsiz hodisada qurbonlar ham bor. Prezidentimiz halok boʻlganlarning oila aʼzolariga chuqur hamdardlik bildirdi. Uch kun muddatda qurbonlarning oilasiga 100 million soʻmdan moddiy yordam ajratish topshirildi.

– Bugun sizlar bilan viloyatni yanada rivojlantirish, aholi va tadbirkorlarning ogʻirini yengil, uzogʻini yaqin qilish boʻyicha katta-katta reja va maqsadlarni belgilab oldik. Hech shubhasiz, sirdaryoliklarning bunyodkorlik, tashabbuskorlik va fidoyilik fazilatlariga tayanib, bu marralarga albatta erishamiz, – dedi Prezidentimiz yigʻilish yakunida.

Sessiya davomida mutasaddilarning hisobotlari, ishtirokchilarning fikr va takliflari tinglandi.

Shu bilan davlatimiz rahbarining hududga tashrifi yakunlandi, Prezidentimiz Toshkentga qaytib keldi.

Prezident Shavkat Mirziyoyev Guliston shahri jamoat transporti infratuzilmasini takomillashtirish maqsadida olib kelingan zamonaviy avtobuslar taqdimoti bilan tanishdi.

Guliston shahridagi ichki yoʻllar boʻylab qatnovlarni amalga oshirish maqsadida 52 ta avtobus olib kelindi. Ular “Yevro-5” standarti talablariga toʻliq javob beradi hamda tabiiy siqilgan gazda harakatlanadi.

Har biri 65 nafar yoʻlovchini qulay sharoitlarda manziliga yetkazishga moʻljallangan ushbu avtobuslar past polli boʻlib, nogironligi boʻlgan shaxslarning harakatlanishi uchun maxsus pandus uskunalari va alohida oʻrindiqlar bilan jihozlangan. Yoʻl haqi toʻlovlarini elektron tarzda ham amalga oshirish uchun “ATTO” tizimi oʻrnatilgan.

Aholining jamoat transportiga boʻlgan ehtiyoji hisobga olinib, avtobuslar harakati Guliston shahrining 23 ta mahallasini toʻliq qamrab oluvchi jami 7 ta shahar ichki yoʻnalishida brutto-shartnoma asosida harakatlanadi.

Natijada avtobuslarning harakat intervali avvalgiga nisbatan 2 barobarga qisqarib, kuniga 29 ming nafar aholiga qulay, xavfsiz va arzon transport xizmatlari koʻrsatilishi taʼminlanadi.

Yana bir jihat: mazkur qatnovlar orqali yiliga 38 milliard soʻmdan ziyod transport xizmatlari koʻrsatiladi, 120 nafar ish oʻrni yaratiladi.

Davlatimiz rahbari mutasaddilarga yurtimiz shaharlarining jamoat transporti parklarini shunday zamonaviy avtobuslar bilan toʻldirish ishlarini izchil davom ettirish, fuqarolarga sifatli xizmat koʻrsatish boʻyicha koʻrsatmalar berdi.

Shu yerda kelgusida 11 metrli, uzoq masofaga moʻljallangan yana 30 ta avtobusni olib kelish rejasi haqida maʼlumot berildi. Ushbu loyiha amalga oshirilsa, qoʻshimcha yana 150 dan ortiq ish oʻrni yaratiladi.

Prezident Shavkat Mirziyoyev Respublika shoshilinch tibbiy yordam ilmiy markazining Sirdaryo viloyat filialiga bordi.

Bu yerda ikki kun oldin Guliston shahridagi umumiy ovqatlanish shoxobchalaridan birida gaz balloni portlashi oqibatida jarohat olganlar davolanmoqda.

Markaz rahbariyati va shifokorlar Prezidentimizga bemorlarning ahvoli va davolash jarayonlarining borishi haqida axborot berdi. Davlatimiz rahbari baxtsiz voqeada turli darajada tan jarohati olgan fuqarolar davolanayotgan palatalarga kirib, ulardan xabar oldi, oila aʼzolari bilan suhbatlashdi.

Prezidentimiz mutasaddilarga jabrlanganlarga zarur barcha tibbiy yordam koʻrsatilishini qatʼiy nazoratga olish boʻyicha topshiriq berdi. Baxtsiz hodisa oqibatida qurbon boʻlganlarning oila aʼzolariga hamdardlik bildirib, ularga moddiy yordam koʻrsatish zarurligini qayd etdi.

Masʼullar oldiga sodir boʻlgan voqeaning sabablarini puxta oʻrganish, qonun ustuvorligini taʼminlash, kelgusida bunday holatlarning oldini olish va yongʻin xavfsizligi ustidan nazorat ishlarini kuchaytirish vazifasi qoʻyildi.