Oʻzbekiston Respublikasi Prezidenti Shavkat Mirziyoyev Osiyo taraqqiyot banki Boshqaruvchilar kengashining navbatdagi yigʻilishi doirasida “ACWA Power” kompaniyasi rahbari Muhammad Abunayyan boshchiligidagi delegatsiyani qabul qildi.

Uchrashuvda sheriklik aloqalarini kengaytirish va qoʻshma loyihalarni jadallashtirish masalalari koʻrib chiqildi.

Davlatimiz rahbari Oʻzbekiston “yashil” energetika sohasining asosiy hamkori boʻlgan “ACWA Power” faoliyatini yuqori baholadi. Qayd etilganidek, oʻtgan yil dekabr oyida boshlangan yangi investitsiya tashabbuslari, jumladan, quyosh va shamol elektr stansiyalarini barpo etish loyihalari belgilangan rejalar asosida izchil amalga oshirilmoqda.

Muloqot davomida hamkorlikning istiqbolli yoʻnalishlariga ham alohida eʼtibor qaratildi. Xususan, “Yangi Toshkent” xalqaro aeroporti qurilishini boshlash, Fargʻona shahrida koʻp tarmoqli tibbiyot muassasasini barpo etish, IT-parkda zamonaviy maʼlumotlar markazini ishga tushirish kabi masalalar muhokama qilindi.

Uchrashuv yakunida saudiyalik investorlar Oʻzbekistondagi islohotlar va yaratilgan qulay investitsiya muhiti uchun minnatdorlik bildirib, loyihalarni sifatli va oʻz vaqtida amalga oshirishga tayyor ekanliklarini taʼkidladilar.