Prezident Shavkat Mirziyoyev 23-mart kuni ekologiya va atrof-muhitni muhofaza qilish sohasida 2026-2030-yillarga moʻljallangan ustuvor umummilliy loyihalar yuzasidan taqdimot bilan tanishdi.

Atmosfera havosining sifatini yaxshilash, shahar va hududlarda yashil maydonlarni kengaytirish, ekologik taʼlim va madaniyatni yuksaltirish, shuningdek, choʻllanishga qarshi kurashishning ilmiy va amaliy asoslarini mustahkamlashga qaratilgan tashabbuslar koʻrib chiqildi.

Avvalo, “Toza havo” umummilliy loyihasi doirasida rejalashtirilgan ishlar haqida axborot berildi.

Qayd etilganidek, bugungi kunda Toshkent shahrida havoning ifloslanish darajasi belgilangan meʼyordan yuqori boʻlishi holatlari kuzatilmoqda. Bu Navoiy, Fargʻona, Chirchiq va Termiz shaharlarida ham qayd etilmoqda. Havo ifloslanishining asosiy omillari sifatida sanoatning oʻsishi, uglerod yoqilgʻilaridan keng foydalanish, transport vositalari sonining koʻpayishi, tabiiy omillar va nazoratning yetarli emasligi koʻrsatib oʻtildi.

Shu munosabat bilan 2030-yilga qadar atmosferaga chiqarilayotgan ifloslantiruvchi moddalar hajmini qisqartirish, sanoat obyektlarida tashlamalarni ushlab qolish ulushini oshirish, transportdan chiqadigan zararli moddalarni kamaytirish hamda PM2,5 boʻyicha meʼyordan oshish kuzatiladigan kunlar sonini pasaytirish asosiy maqsadlar etib belgilangan.

Amalga oshirilgan tezkor choralar natijasida Toshkent shahrida havo sifati muayyan darajada yaxshilangan. Jumladan, 2026-yil yanvar-fevral oylarida PM2,5 konsentratsiyasi oʻtgan yilning shu davriga nisbatan sezilarli pasaygan. Endi bu yoʻnalishda hududiy dasturlar bosqichma-bosqich qabul qilinib, har bir viloyatda tahlil va diagnostika, yagona havo monitoringi hamda ifloslanish manbalarini inventarizatsiya qilish ishlari tashkil etiladi.

“Toza havo” loyihasida energetika va sanoat tarmoqlariga alohida eʼtibor qaratilgan. Mahsulotining maʼlum qismini muqobil energiya hisobiga ishlab chiqaradigan korxonalarga soliq imtiyozlari va moliyaviy ragʻbatlar berish, avtomatik monitoring stansiyalari, filtrlar, chang-gaz tozalash hamda energiya samarador uskunalarni keng joriy etish koʻzda tutilgan. Toshkent shahri va unga tutash hududlardagi sanoat korxonalarida majburiy avtomatik monitoring postlari oʻrnatilib, ularning maʼlumotlari yagona geoaxborot tizimiga integratsiya qilinadi. Bunday talablarga amal qilmagan subyektlar uchun kompensatsiya toʻlovlari keskin oshiriladi.

Qurilish sohasida ham ekologik talablar kuchaytiriladi. Yangi quriladigan yirik obyektlarni loyihalashtirishda koʻkalamzorlashtirish darajasini oshirish, qurilish materiallarini yopiq sharoitda saqlash, chiqindilarni maxsus quvur va konteynerlar orqali tushirish, maydonlarni himoya toʻsiqlari bilan oʻrash, onlayn kuzatuv kameralarini oʻrnatish kabi talablar belgilanmoqda.

Shuningdek, “shamol yoʻlaklari”ni saqlash, ekologik ekspertiza xulosasini qurilish jarayonlarida majburiy hisobga olish, shaharning ekologik va suv resurslarini boshqarish boʻyicha master-reja ishlab chiqish taklif etildi.

Tabiiy chang omillarini kamaytirish boʻyicha ham aniq choralar belgilangan. Toshkent shahri atrofida “yashil belbogʻ” barpo etish, Surxondaryo va Sirdaryoda chang boʻronlarining oldini olish uchun “yashil devor”lar tashkil qilish, sunʼiy koʻllar va suv havzalarini barpo etish, poytaxt tumanlarida favvoralarning sonini koʻpaytirish, barglarni kompost va mulcha sifatida qayta ishlash amaliyotini yoʻlga qoʻyish shular jumlasidandir. Bularning barchasi havo tarkibidagi chang zarrachalarini kamaytirish va shahar muhitini sogʻlomlashtirishga xizmat qiladi.

Transport sohasida havoni muhofaza qilish boʻyicha alohida yoʻnalishlar ham belgilangan. Motor yoqilgʻisi standartlarini bosqichma-bosqich kuchaytirish, avtotransport vositalarini “qizil”, “sariq” va “yashil” stikelarni bergan holda ekologik toifalarga ajratish, texnik koʻrikni ekologik talablar bilan bogʻlash, eski avtotransportni yangilash dasturlarini amalga oshirish, jamoat transporti ulushini oshirish nazarda tutilmoqda. Bu orqali yoʻl harakati bilan bogʻliq ifloslanish hajmini qisqartirish, ayniqsa, yirik shaharlar markazida havo sifatini yaxshilash maqsad qilingan.

“Toza havo” loyihasining muhim tarkibiy qismi sifatida issiqxonalar masalasi ham muhokama qilindi.

Toshkent shahri va Toshkent viloyatida issiqxona xo‘jaliklari juda ko‘p, ular orasida isitish manbalari sifatida ko‘mir, mazut va nostandart yoqilg‘idan foydalanuvchi issiqxonalar ulushi ham yuqori, ular chiqarayotgan NO2, SO2 va PM2,5 kabi xavfli moddalar havo sifatiga jiddiy ta’sir ko‘rsatayotgani qayd etildi. Qolaversa, Toshkent hududida yillik quyosh nurlanishi qolgan hududlarga qaraganda nisbatan past bo‘lgani sababli bu yerda issiqxonada mahsulot yetishtirish xarajati ancha baland. Masalan, yanvar oyida Toshkentda o‘rtacha harorat Selsiy bo‘yicha 6 daraja issiq bo‘lsa, Termizda – 10,8 daraja issiq. 1 tonna issiqxona mahsulotini yetishtirish xarajati Toshkent viloyatida 11,9 million so‘mni, Surxondaryoda esa 4,9 million so‘mni tashkil etadi.

Mahsulotlarni insolyatsiya darajasi yuqori bo‘lgan hududlarda yetishtirish issiqxona xo‘jaliklarining moliyaviy holati uchun ham, ichki bozordagi narx barqarorligi nuqtayi nazaridan ham manfaatli hisoblanadi. 

Shu bois, Toshkent shahri va unga tutash hududlardagi issiqxonalarni energiya tejamkor va tabiiy-iqlim sharoiti qulay boʻlgan hududlarga bosqichma-bosqich koʻchirish taklifi bildirildi. Xususan, Surxondaryo viloyatining Sherobod tumanida kamida 940 gektar maydonda agropark tashkil etish rejalashtirilgan. Bu hududda quyosh nurlanishi yuqori, qish nisbatan yumshoq, isitish xarajatlari ancha past boʻlib, bu mahsulot tannarxini keskin tushirish imkonini beradi.

2026-yil 1-oktabrdan boshlab Toshkent shahri va unga tutash hududlarda yangi issiqxona tashkil etishni cheklash, shu bilan birga, koʻchirilayotgan xoʻjaliklarga infratuzilma, kredit va logistika boʻyicha imtiyozlar berish nazarda tutilmoqda.

Taqdimotda “Yashil makon” doirasida botanika va dendrologiya bogʻlari konsepsiyasi yuzasidan axborot berildi. Qayd etilganidek, botanika bogʻlari mahalliy va xorijiy oʻsimliklarni oʻrganish, saqlash, koʻpaytirish va namoyish etishga xizmat qilsa, dendrologiya bogʻlari daraxt va buta turlarini introduksiya qilish, akklimatizatsiya qilish va ilmiy asosda parvarishlashga ixtisoslashgan hududlar hisoblanadi. Konsepsiyaga koʻra, botanika bogʻlarida turli floristik ekspozitsiyalar, oranjereya, koʻchatxona, koʻl, ichki yoʻlaklar, besedka va gulxona kabi obyektlar joylashtiriladi.

Hozirgi kunda mamlakatimizda 3 ta botanika bogʻi mavjud boʻlsa, loyiha doirasida yana 12 ta botanika va 16 ta dendrologiya bogʻini tashkil etish rejalashtirilgan. Bu jarayonda har bir hududning tuproq-iqlim sharoiti hisobga olinib, mos daraxt va butalar tanlanadi.

2028-yilga qadar Qoraqalpogʻiston Respublikasi, barcha viloyatlar va Toshkent shahrida maydoni 100 gektardan kam boʻlmagan botanika va dendrologiya bogʻlarini tashkil etish reja qilingan. Natijada 2030-yilgacha mamlakatda umumiy yashillik darajasini 14,2 foizdan 30 foizgacha oshirish, PM2,5 va PM10 konsentratsiyasini 20-25 foizga kamaytirish, iqlimi ogʻir hududlarda havo haroratini oʻrtacha 1,5-2 darajaga pasaytirish maqsad qilingan.

Shu bilan birga, poytaxtda Milliy dendrologiya bogʻini barpo etish konsepsiyasi ham taqdimot qilindi. Ushbu yirik yashil hududning umumiy maydoni 108 gektarni tashkil etishi belgilangan. Loyiha doirasida 50 ming tup daraxt koʻchati va 100 ming tup buta oʻsimliklari ekilishi nazarda tutilgan. Park biologik xilma-xillikni saqlash, havo sifatini yaxshilash, uglerod yutilishini oshirish, ilmiy tadqiqot va seleksiya ishlarini yoʻlga qoʻyish, shuningdek, shahar mikroiqlimini sogʻlomlashtirishga xizmat qiladi. Bogʻ havo haroratini 2-4 darajaga pasaytirib, namlikni 10-15 foizga oshirishi mumkin.

Milliy dendrologiya bogʻi faqat koʻkalamzor hudud emas, balki ilmiy, maʼrifiy va jamoat makoni sifatida ham shakllantiriladi. Unda “Dunyo daraxtlari” hududi, 6 ta iqlim mintaqasiga xos oʻsimliklar kolleksiyasi, mevali va mahalliy daraxtzorlar, dorivor oʻsimliklar bogʻi, oranjereya, gulzorlar, dam olish maydonlari, piyodalar va velosiped yoʻlaklari, avtoturargoh, tashrif buyuruvchilarni kutib olish maydoni barpo etiladi.

Bogʻning markaziy qismida 1 gektarlik sunʼiy koʻl va uning atrofida sakura bogʻi tashkil qilish rejalashtirilgan. Park infratuzilmasida quyosh panellari, qayta ishlangan materiallardan tayyorlangan skameyka va besedkalar, avtomatlashtirilgan tomchilatib sugʻorish tizimi kabi zamonaviy ekologik texnologiyalardan foydalanish koʻzda tutilgan. Bu yer Markaziy Osiyo atrof-muhit va iqlim oʻzgarishi universiteti (“Green University”) uchun tabiiy laboratoriya, aholi uchun esa bioturizm va ekotaʼlim markaziga aylanadi.

“Ekomadaniyat” umummilliy loyihasi doirasida ekologik taʼlim, ilm-fan va targʻibotni bir-biriga bogʻlagan holda yangi tizim yaratish rejalashtirilgan.

Mazkur sohada xalqaro standartlarga mos mutaxassislar yetishmayotgani, aholi oʻrtasida ekologik ong va barqaror odatlar hali yetarli darajada shakllanmagani, innovatsiya va iqlim texnologiyalarini amaliyotga joriy qila oladigan kadrlar taqchilligi mavjudligi qayd etildi. Shu munosabat bilan 2026/2027-oʻquv yilidan boshlab 14 ta hududda “yashil texnikumlar” tashkil etilib, ular “Green University” tizimiga akademik hamkorlik asosida biriktiriladi.

Loyihaga koʻra, tayyorlanadigan oʻquvchi va talabalar soni yil sayin oshirilib, 2028-2029-oʻquv yiliga borib, 10 ming nafarga yetkaziladi. Bakalavriat va magistraturada atrof-muhit va barqaror boshqaruv, yashil iqtisodiyot, atrof-muhit muhandisligi, iqlim oʻzgarishi, choʻllanishga qarshi kurashish, barqaror shaharsozlik, barqaror energiya almashinuvi kabi yangi yoʻnalishlar ochiladi. Taʼlim jarayonida dual tizim joriy qilinib, nazariy bilim bilan amaliyot uygʻunlashtiriladi. Universitet taʼlim tizimini rivojlantirish, ilmiy-innovatsion loyihalar va targʻibot ishlari uchun katta miqdorda mablagʻ ajratish koʻzda tutilgan.

Aholi orasida ekologik madaniyatni oshirish uchun “10 ming qadam piyoda” tashabbusini tiklash, “Sogʻlom turmush tarzi” platformasini ishga tushirish, shuningdek, Samarqand shahrida GEF-8 assambleyasi va “Eco Expo Central Asia 2026” xalqaro koʻrgazmasini oʻtkazish rejalashtirilgan.

Taqdimotda choʻllanishga qarshi kurash strategiyasi loyihasi ham alohida koʻrib chiqildi.

Qayd etilganidek, Oʻzbekiston hududining 70 foizi arid zonadan iborat boʻlib, yerlarning 70 foizdan ortigʻi degradatsiyaga uchragan. Yer resurslarining yomonlashuvi iqtisodiyotga har yili 830 million dollar zarar keltirmoqda. Orol dengizining qurishi natijasida 3 million gektar maydon yaroqsiz holga kelgan va hududning 56 foizi shamol eroziyasi taʼsiri ostida qolgan.

Shu munosabat bilan “Green University” huzurida mintaqaviy qoʻshma ilmiy-tadqiqot markazini tashkil etish taklif qilindi. Ushbu markaz choʻllanishni boshqarish boʻyicha Markaziy Osiyodagi birinchi ilmiy xabga aylanishi koʻzda tutilmoqda. Markaz tarkibida 15 ta ixtisoslashgan laboratoriya faoliyat yuritadi, sputnik maʼlumotlari, GIS va masofadan zondlash texnologiyalari asosida yerlar holatini raqamli monitoring qilish yoʻlga qoʻyiladi, qurgʻoqchilikka chidamli oʻsimliklar boʻyicha genetik bank shakllantiriladi, tuproqning kimyoviy va fizik tahlil tizimi takomillashtiriladi. Buning natijasida choʻllanishni prognoz qilish va xaritalash milliy tizimi yaratiladi, Orolboʻyi va qurgʻoq hududlarda yashil qoplama kengaytiriladi, yaylovlardan barqaror foydalanish hamda choʻl iqtisodiyoti modellari joriy etiladi.

Davlatimiz rahbari taqdimot qilingan loyihalarning ekologik barqarorlikni taʼminlash, aholi salomatligini muhofaza qilish, shahar va qishloq muhitini yanada qulaylashtirish, shuningdek, ushbu sohada ilm-fan va zamonaviy texnologiyalarni keng joriy etishdagi muhim ahamiyatini qayd etib, ularni maʼqulladi.

Tabiat uygʻonishi, hayotda yangi bosqich boshlanishining ramzi boʻlgan, ezgulik, mehr-oqibat, oʻzaro hurmat, mehmondoʻstlik, mehnatsevarlik va ona zaminga gʻamxoʻrlik kabi abadiy qadriyatlarni oʻzida mujassam etgan qadim bayram – Navroʻzi olam munosabati bilan Oʻzbekiston Respublikasi Prezidenti Shavkat Mirziyoyev nomiga samimiy tabriklar kelmoqda. Ularda yurtimizning koʻp millatli xalqiga tinchlik-osoyishtalik, farovonlik va ravnaq tilaklari bildirilgan.

Xorijiy davlatlar va hukumatlar, nufuzli xalqaro tashkilotlar rahbarlari, taniqli siyosat va jamoat arboblarining qutlovlarida mamlakatimizda Yangi Oʻzbekistonni barpo etish, barqaror taraqqiyotni taʼminlash va hayot sifatini yaxshilashga qaratilgan keng koʻlamli islohotlarga yuksak baho berilgan.

Ochiq, tinchliksevar va pragmatik tashqi siyosat olib borilayotgani, mintaqaviy hamkorlik, yaxshi qoʻshnichilik va oʻzaro anglashuvni mustahkamlashga qaratilgan tashabbuslar faol ilgari surilayotgani tufayli davlatimizning xalqaro maydondagi nufuzi izchil oʻsib borayotgani alohida taʼkidlangan.

Oʻzbekiston Respublikasi Prezidenti 

Shavkat Mirziyoyev Janobi Oliylariga

Hurmatli Shavkat Miromonovich!

Bahorgi uygʻonish ramzi boʻlgan Navroʻz bayrami munosabati bilan samimiy tabriklarimni qabul qilgaysiz.

Rossiya va Oʻzbekiston oʻrtasidagi munosabatlar yuksak darajaga chiqqan. Strategik sheriklik va ittifoqchiligimizni bundan buyon ham doʻst xalqlarimiz farovonligi, Markaziy Osiyo mintaqasida xavfsizlik va barqarorlikni mustahkamlash yoʻlida faol rivojlantiramiz deb ishonaman.

Ushbu qutlugʻ ayyomda Sizga mustahkam sogʻliq va muvaffaqiyatlar, barcha hamyurtlaringizga esa baxt-saodat hamda farovonlik tilayman.

Hurmat bilan,

Vladimir Putin, 

Rossiya Federatsiyasi Prezidenti

* * *

Oʻzbekiston Respublikasi Prezidenti 

Shavkat Mirziyoyev Janobi Oliylariga

Hurmatli Prezident janoblari!

Oy taqvimi boʻyicha Yangi yil munosabati bilan yoʻllagan tabrigingiz uchun Sizga samimiy minnatdorlik bildirishga ijozat bergaysiz. Xitoy hukumati va xalqi nomidan Sizni, hukumatingizni va Oʻzbekiston xalqini anʼanaviy bayramingiz – Navroʻz kirib kelishi munosabati bilan chin dildan qutlayman.

Men Xitoy – Oʻzbekiston munosabatlarini rivojlantirishga alohida eʼtibor qarataman. Oʻtgan yili biz Siz bilan ikki marta uchrashib, turli sohalardagi hamkorlikni chuqurlashtirish boʻyicha muhim kelishuvlarga erishdik. Bu yangi davrdagi Xitoy va Oʻzbekiston oʻrtasidagi barcha sharoitda har tomonlama strategik sheriklik munosabatlarini yangi rivojlanish bosqichiga olib chiqdi.

Men strategik oʻzaro ishonch va anʼanaviy doʻstlikni doimiy ravishda mustahkamlash, umumiy taqdirga ega Xitoy – Oʻzbekiston hamjamiyatini qurishni chuqurlashtirish va amaliy darajaga koʻtarish uchun har tomonlama hamkorlikni kengaytirish borasida Siz bilan birgalikda ishlashga tayyorman.

Sizga mustahkam sogʻliq va faoliyatingizda muvaffaqiyatlar tilayman.

Si Szinpin, 

Xitoy Xalq Respublikasi Raisi

* * *

Oʻzbekiston Respublikasi Prezidenti 

Shavkat Mirziyoyev Janobi Oliylariga

Assalomu alaykum va rahmatullohi va barokatuhu.

Navro‘z bayrami munosabati bilan Siz Janobi Oliylariga eng samimiy tabriklar va ezgu tilaklarni izhor etishdan xursandmiz. Sizga sihat-salomatlik, birodar Oʻzbekiston Respublikasi hukumati va xalqiga bardavom taraqqiyot va farovonlik tilaymiz.

Siz Janobi Oliylariga salomlarimiz va ehtiromlarimizni qabul qilgaysiz.

Salmon bin Abdulaziz Ol Saud,

Saudiya Arabistoni Podshohi

* * *

Oʻzbekiston Respublikasi Prezidenti 

Shavkat Mirziyoyev Janobi Oliylariga

Assalomu alaykum va rahmatullohi va barokatuhu.

Navro‘z bayrami munosabati bilan Siz Janobi Oliylariga eng samimiy tabrik va tilaklarimni izhor etishdan xursandman.

Sizga sihat-salomatlik, baxt-u saodat, qardosh Oʻzbekiston Respublikasi hukumati va xalqiga bardavom yuksalish va farovonlik tilayman.

Siz Janobi Oliylariga salomlarim va ehtiromlarimni qabul qilgaysiz.

Muhammad bin Salmon bin Abdulaziz Ol Saud,

Saudiya Arabistoni Valiahdi, Vazirlar Mahkamasi Raisi 

* * *

Oʻzbekiston Respublikasi Prezidenti

Shavkat Mirziyoyev Janobi Oliylariga

Aziz qardoshim!

Har yil tabiat uygʻonishining timsoli boʻlgan Navroʻz bayrami munosabati bilan Siz Janobi Oliylariga va qardosh Oʻzbekiston xalqiga xalqim va shaxsan oʻz nomimdan eng samimiy tabriklarimni izhor etaman.

Ildizlari uzoq oʻtmishga borib taqaladigan qadim Navroʻz anʼanamiz bashariyatga umid va barokat xushxabarini bermoqda. Mushtarak madaniyat makonimizda nishonlanadigan mazkur bayramda doʻstlik va qardoshlik rishtalarimizning yanada mustahkamlanishini tilayman.

Navroʻz hozirda ehtiyojimiz boʻlgan tinchlik, murosa va hamkorlikka boʻlgan umidlarni uchqunlatishi – eng katta orzumiz va tilagimizdir.

Bayram munosabati bilan Siz Janobi Oliylariga, oilangizga sogʻliq va baxt-saodat, qardosh Oʻzbekiston xalqiga omonlik va farovonlikka toʻla kelajak tilayman.

Rejep Tayyip Erdogʻan,

Turkiya Respublikasi Prezidenti 

* * *

Oʻzbekiston Respublikasi Prezidenti

Shavkat Mirziyoyev Janobi Oliylariga

Hurmatli Shavkat Miromonovich!

Sizga va qardosh Oʻzbekiston xalqiga Navroʻz bayrami munosabati bilan samimiy tabriklarim hamda eng ezgu tilaklarimni qabul qilgaysiz.

Yangilanish, bunyodkorlik va farovonlikni oʻzida mujassam etgan ushbu muqaddas bayram yuksak qadriyatlarga intiluvchi butun insoniyat hayotida alohida oʻrin tutadi. Qutlugʻ bahor ayyomi Navroʻz qardosh xalqlarimizga iliqlik, moʻl-koʻlchilik, quvonch va farovonlik olib kelsin.

Birgalikdagi saʼy-harakatlarimiz tufayli mustahkam doʻstlik va yaxshi qoʻshnichilikka asoslangan Qozogʻiston – Oʻzbekiston strategik sheriklik va ittifoqchilik munosabatlari bundan buyon ham xalqlarimiz farovonligi yoʻlida jadal rivojlanib borishiga ishonaman.

Hurmatli Shavkat Miromonovich, ushbu fursatdan foydalanib, Oʻzbekiston ravnaqi yoʻlidagi faoliyatingizda muvaffaqiyatlar, mamlakat xalqiga esa farovonlik va toʻkinlik tilayman.

Xalq baxtli-saodatli yashasin, farovonlik esa toʻkin va moʻl boʻlsin!

Qosim-Jomart Toqayev,

Qozogʻiston Respublikasi Prezidenti

* * *

Oʻzbekiston Respublikasi Prezidenti

Shavkat Mirziyoyev Janobi Oliylariga

Hurmatli Shavkat Miromonovich!

Navroʻz bayrami bilan Sizni va butun qardosh Oʻzbekiston xalqini chin dildan tabriklayman.

Bu yorqin va quvonchli bayram bahorda tabiat uygʻonishi, birlik va doʻstlik, tinchlik va farovonlik ramzidir. Ushbu ayyom xalqlarimizni bogʻlaydigan koʻp asrlik doʻstlik va mehr-oqibat anʼanalarini oʻzida mujassam etib, umumiy tarixga asoslangan qardoshlik munosabatlarini mustahkamlaydi.

Oʻzaro hurmat, ishonch va strategik sheriklikka asoslangan barcha darajalardagi hamkorligimiz bundan buyon ham birgalikdagi saʼy-harakatlar asosida davom etib, xalqlarimiz kelajagi porloq boʻlishini taʼminlashga hissa qoʻshishiga ishonchim komil.

Hurmatli Shavkat Miromonovich!

Sizga sihat-salomatlik va davlatchilik faoliyatingizda muvaffaqiyatlar, qardosh oʻzbek xalqiga esa tinchlik va taraqqiyot tilayman.

Hurmat bilan,

Sadir Japarov,

Qirgʻiz Respublikasi Prezidenti

* * *

Oʻzbekiston Respublikasi Prezidenti

Shavkat Mirziyoyev Janobi Oliylariga

Muhtaram Shavkat Miromonovich!

Xalqaro Navroʻz bayrami munosabati bilan eng ezgu va samimiy tilaklarga yoʻgʻrilgan qutlovlarimizni qabul qilgaysiz.

Qadimiy tarixga ega ushbu bayram madaniy meros va koʻp asrlik anʼanalarimiz mushtarakligi ifodasi sifatida uni nishonlaydigan xalqlar oʻrtasidagi aloqalarni tinchlik va xavfsizlik, yaxshi qoʻshnichilik, oʻzaro hurmat va qoʻllab-quvvatlash gʻoyalari asosida mustahkamlashda muhim rol oʻynaydi.

Navroʻzning boqiy bunyodkorlik anʼanalari bizni xalqlarimiz va mamlakatlarimiz oʻrtasidagi doʻstlik rishtalari hamda oʻzaro manfaatli hamkorlikni yanada mustahkamlash yoʻlida tinimsiz saʼy-harakat qilishga undaydi.

Tojikiston tomoni Oʻzbekiston bilan strategik sheriklik va ittifoqchilik doirasidagi davlatlararo munosabatlarning bugungi darajasidan mamnun.

Ishonchim komil, mamlakatlarimiz ushbu qadimiy bayramning yuksak umuminsoniy qadriyatlariga tayangan holda, koʻp qirrali munosabatlarni mazmunan boyitish yoʻlida bundan buyon ham birgalikda harakat qiladilar.

Ushbu qutlugʻ kunlarda Sizga mustahkam sogʻliq va masʼuliyatli davlatchilik faoliyatingizda yangi zafarlar, mamlakatingizning qardosh xalqiga esa baxt-saodat, farovonlik, tinchlik va barqarorlik, izchil taraqqiyot va ravnaq tilayman.

Navroʻz muborak!

Chuqur hurmat bilan,

Emomali Rahmon,

Tojikiston Respublikasi Prezidenti

* * *

Oʻzbekiston Respublikasi Prezidenti

Shavkat Mirziyoyev Janobi Oliylariga

Hurmatli Shavkat Miromonovich!

Xalqaro Navroʻz bayrami munosabati bilan Sizga va Siz orqali qardosh Oʻzbekiston xalqiga samimiy tabriklarim va eng ezgu tilaklarimni yoʻllayman!

Dunyoning koʻplab mamlakatlarida keng nishonlanadigan ushbu goʻzal bayram bahorning boshlanishi va tabiatning uygʻonishini anglatadi. Navroʻz bayrami turli xalqlar va madaniyatlar oʻrtasidagi yaxshi qoʻshnichilik munosabatlarini mustahkamlashda muhim oʻrin tutadi. Ushbu yorqin bayram umid ramzi boʻlib, bugungi dunyoda insonparvarlik tuygʻularini mustahkamlashga undaydi.

Ushbu ajoyib bayram Siz va butun mamlakatingiz xalqi uchun baxt, quvonch va yangi muvaffaqiyatlar olib kelsin!

Chuqur hurmat bilan,

Serdar Berdimuhamedov,

Turkmaniston Prezidenti

* * *

Oʻzbekiston Respublikasi Prezidenti

Shavkat Mirziyoyev Janobi Oliylariga

Hurmatli Shavkat Miromonovich!

Xalqaro Navroʻz bayrami munosabati bilan Sizga samimiy tabriklarim va eng ezgu tilaklarimni yoʻllayman.

Navroʻz hayotga muhabbat va yaxshi kelajakka ishonchning mustahkamlanishi ramzidir. Ushbu bayram koʻp asrlar davomida xalqlar oʻrtasidagi doʻstlik va hamkorlikni mustahkamlashga xizmat qilib kelmoqda.

Ushbu qutlugʻ ayyom Siz va butun mamlakatingiz xalqi uchun tinchlik, quvonch va yangi tashabbuslar bilan nishonlansin. Sizga mustahkam sogʻliq, baxt-saodat va masʼuliyatli davlatchilik faoliyatingizda yangi muvaffaqiyatlar tilayman.

Chuqur hurmat ila,

Gurbanguli Berdimuhamedov,

Turkman xalqining milliy yetakchisi, Turkmaniston Xalq Maslahati Raisi

* * *

Oʻzbekiston Respublikasi Prezidenti

Shavkat Mirziyoyev Janobi Oliylariga

Hurmatli Shavkat Miromonovich!

Aziz qardoshim!

Sizga va qardosh Oʻzbekiston xalqiga buyuk ajdodlarimizdan meros Navroʻz bayrami munosabati bilan shaxsan oʻz nomimdan va Ozarbayjon xalqi nomidan samimiy tabriklarimni yoʻllash menga katta mamnuniyat bagʻishlaydi.

Bahor kelganidan darak beruvchi, tabiatga mehr, ruhiy poklik va yangilanish shodiyonasi boʻlmish ushbu milliy bayram qardosh xalqlarimizga farovonlik, baxt va fayz-u baraka olib kelishini tilayman.

Biz doʻstlik va birodarlikning ajoyib namunasi boʻlgan Ozarbayjon – Oʻzbekiston munosabatlarining kun sayin rivojlanayotgani hamda ittifoqimizning mustahkamlanayotganidan juda mamnunmiz. Ishonchim komilki, umumiy kelib chiqish, tarix va madaniyat rishtalari bilan bogʻlangan qardosh Oʻzbekiston bilan keng koʻlamli munosabatlarimizni davlatlarimiz manfaatlari va xalqlarimiz farovonligi yoʻlida yanada chuqurlashtirish boʻyicha birgalikdagi saʼy-harakatlarimizni davom ettiramiz.

Ushbu fayzli kunlarda Sizga va oilangiz aʼzolariga mustahkam sogʻliq va baxt-saodat, qardosh Oʻzbekiston Respublikasi va uning xalqi ravnaqi yoʻlidagi faoliyatingizda muvaffaqiyatlar tilayman.

Hurmat bilan,

Ilhom Aliyev,

Ozarbayjon Respublikasi Prezidenti

* * *

Oʻzbekiston Respublikasi Prezidenti

Shavkat Mirziyoyev Janobi Oliylariga

Hurmatli Shavkat Miromonovich!

Sizni odamlar qalbini samimiylik, quvonch, baxt va porloq kelajakka umid bilan toʻldiruvchi Navroʻz bilan chin qalbimdan tabriklayman.

Ushbu bayramga xos oʻzaro hurmat va konstruktiv hamkorlik gʻoyalarini qoʻllab-quvvatlagan holda, Belarus Oʻzbekiston bilan doʻstlik va sheriklik munosabatlarini izchil mustahkamlab bormoqda. Davlatlararo muloqot va amaliy hamkorlikni rivojlantirish bundan buyon ham fuqarolarimiz manfaatlariga xizmat qilishi va Yevroosiyoda barqarorlikni taʼminlashga hissa qoʻshishiga ishonaman. 

Hurmatli Shavkat Miromonovich, ushbu muborak kunda Sizga mustahkam sogʻliq, masʼuliyatli faoliyatingizda tuganmas kuch-gʻayrat va muvaffaqiyatlar, doʻst oʻzbek xalqiga esa tinchlik va totuvlik tilayman.

Hurmat bilan,

Aleksandr Lukashenko,

Belarus Respublikasi Prezidenti

* * *

Oʻzbekiston Respublikasi Prezidenti

Shavkat Mirziyoyev Janobi Oliylariga

Janobi Oliylari!

Pokiston xalqi va hukumati nomidan, shuningdek, shaxsan oʻz nomimdan Siz, Janobi Oliylarini, yaqinlaringizni va qardosh Oʻzbekiston xalqini Navroʻz va Ramazon hayiti bilan samimiy muborakbod etaman va eng ezgu tilaklarimni izhor etaman.

Navroʻz va Ramazon hayiti umuminsoniy qadriyatlar – tinchlik, mehr-oqibat, hamjihatlik va shukronalikni oʻzida mujassam etadi. Ushbu quvonchli voqealar xalqlar oʻrtasidagi totuvlik, oʻzaro hurmat va hamkorlikka boʻlgan umumiy intilishimizni yangilash imkonini beradi.

Siz, Janobi Oliylarining joriy yil fevral oyida Pokistonga amalga oshirgan tarixiy tashrifingizni mamnuniyat bilan eslayman, yaqin kunlarda ikki tomonlama aloqalarimizni yanada mustahkamlash uchun oliy darajadagi almashinuvlarni davom ettirishimizni intiqlik bilan kutaman.

Fursatdan foydalanib, Siz, Janobi Oliylariga mustahkam sogʻliq va farovonlik, qardosh Oʻzbekiston xalqiga esa bardavom tinchlik, taraqqiyot va ravnaq tilayman.

Janobi Oliylari, Sizga boʻlgan yuksak ehtiromimni qabul qilgaysiz.

Shahboz Sharif,

Pokiston Islom Respublikasi Bosh vaziri

Shuningdek, quyidagilar oʻz qutlovlarini yoʻllagan:

Qozogʻiston Respublikasining birinchi Prezidenti Nursulton Nazarboyev,

Birlashgan Arab Amirliklari Bosh vaziri oʻrinbosari, ichki ishlar vaziri Shayx Sayf bin Zoid Ol Nahayon,

Falastin Davlati Prezidenti Mahmud Abbos,

Tatariston Respublikasi Raisi Rustam Minnixanov,

Shanxay hamkorlik tashkiloti bosh kotibi Nurlan Yermekbayev,

Turkiy davlatlar tashkiloti bosh kotibi Kubanichbek Omuraliyev,

Mustaqil Davlatlar Hamdoʻstligi aʼzo davlatlari Parlamentlararo assambleyasi bosh kotibi Dmitriy Kobiskiy, 

Shanxay hamkorlik tashkilotining Mintaqaviy aksilterror tuzilmasi Ijroiya qoʻmitasi direktori Ularbek Sharsheyev,

Rus pravoslav cherkovi Toshkent va Oʻzbekiston yeparxiyasi mitropoliti, Oʻrta Osiyo mitropoliya okrugi rahbari Vikentiy.

Qutlovlar kelishi davom etmoqda.

Prezident Shavkat Mirziyoyev poytaxtimizning Yakkasaroy tumanidagi Milliy madaniy markazlar pavilyoniga tashrif buyurdi.

Mamlakatimizda 130 dan ziyod millat va elat vakillari yagona va ahil oila boʻlib yashab kelmoqda, 157 ta milliy-madaniy markaz faoliyat koʻrsatmoqda. Bu xilma-xillik koʻp asrlik tarixiy jarayonlar natijasida shakllangan noyob ijtimoiy hodisa sanaladi.

Yurtimizda milliy madaniyatlarni rivojlantirish, millatlararo totuvlikni asrab-avaylash va mustahkamlash, shu orqali yosh avlodni bagʻrikenglik va hamjihatlik ruhida tarbiyalashga davlat siyosatining ustuvor yoʻnalishi sifatida doimiy eʼtibor qaratib kelinmoqda.

Do‘stlik bog‘i hamda Millatlararo munosabatlar va xorijiy mamlakatlar bilan do‘stlik aloqalari qo‘mitasi binosiga tutash maydonda barpo etilgan, yigirma ikki millatning o‘ziga xos arxitekturasi aks etgan pavilon ham ushbu e’tiborning yorqin tasdig‘idir.

Bu yerda qozoq, qirg‘iz, turkman va boshqird o‘tovlari, koreys, belarus, ukrain, grek, olmon, dungan, polyak, yahudiy, gruzin, arman, tatar va qrim-tatar, uyg‘ur, turk, tojik, xitoy, rus hamda ozarbayjon xalqlarining ikki qavatdan iborat do‘stlik uylari joylashgan.

Interyerlar oʻsha xalqning milliy anʼanalariga mos holda bezatilgan. Ekspozitsiyalarda esa milliy liboslar, cholgʻu asboblari, dekorativ-amaliy sanʼat namunasi, tarixiy maketlar va madaniy merosni aks ettiruvchi koʻplab eksponatlar oʻrin olgan.

Bugun pavilyonda Navroʻz shukuhi hukm surmoqda, zero, Navroʻz oʻzi bilan birdamlik, yangilanish va yaxshilikka daʼvat kabi ezgu gʻoyalarni olib keluvchi bayramdir.

Davlatimiz rahbari har bir milliy maskan faoliyati bilan tanishdi. Ishtirokchilar bilan samimiy muloqot qildi.

Uchrashuvlar chogʻida milliy-madaniy markazlarning umumxalq bayramlarini yuksak ruhda oʻtkazishdagi hissasi alohida eʼtirof etildi. Yuksak vatanparvarligi, fidoyi mehnati bilan respublikamizning ijtimoiy-iqtisodiy salohiyatini oshirishga qoʻshayotgan hissasi uchun turli millatga mansub yurtdoshlarimizga minnatdorlik bildirildi.

Prezidentimiz pavilyon mehmonlari uchun uchun tashkil etilgan badiiy dasturni tomosha qildi. Milliy madaniy markazlar vakillari bilan birgalikda suratga tushdi.

«Yangi Oʻzbekiston” bogʻida Navroʻz umumxalq bayramiga bagʻishlangan tantanali marosim boʻlib oʻtdi. Unda Prezident Shavkat Mirziyoyev ishtirok etib, butun xalqimizni qutladi.

Davlatimiz rahbari oʻz tabrigida bu yilgi Navroʻz ayyomi muborak Ramazon hayiti bilan bir pallada nishonlanayotganini alohida taʼkidlab, tabiat uygʻonishi va ruhiy poklanish ramzi boʻlgan ushbu qutlugʻ kunlar barcha yurtdoshlarimiz uchun ezgulik, birdamlik va xayr-baraka bayrami ekanini qayd etdi. Shuningdek, dunyoning olis va yaqin mamlakatlarida mehnat qilayotgan, tahsil olayotgan vatandoshlarimizga samimiy salom va tilaklar yoʻllandi.

Prezidentimiz millati, tili va dinidan qatʼi nazar, har bir yurtdoshimizni rozi qilish, xalqimiz farovonligini taʼminlash yoʻlidagi ishlar yangi bosqichga koʻtarilayotganini taʼkidladi. Bu yil bayram “Navroʻzni ulugʻlash – insonni ulugʻlashdir!” degan gʻoya asosida oʻtayotgani ham ana shu ezgu maqsadlarning amaliy ifodasi ekani qayd etildi.

Marosimda barcha hududlarga, qishloq va ovullar, mahallalarga yangi Oʻzbekiston nafasini olib kirish boʻyicha katta harakat boshlangani taʼkidlandi. Yangi ish oʻrinlari yaratish, kambagʻallikni qisqartirish, ijtimoiy himoyani kuchaytirish borasida ulkan qadamlar qoʻyilayotgani, yurtimizda zamonaviy korxonalar, kommunikatsiya tarmoqlari, shinam uy-joylar, taʼlim, tibbiyot, madaniyat va sport obyektlari barpo etilayotgani qayd etildi. Kelgusida bunday bunyodkorlik ishlari koʻlami yanada kengayishi taʼkidlandi.

Davlatimiz rahbari ushbu fayzli tongda mirishkor dehqon va fermerlarimizga yuksak hurmat va ehtirom bildirdi. Ularning xalqimiz dasturxonini toʻkin va farovon qilishdek sharafli mehnati eʼtirof etilib, bu borada davlat va jamiyat tomonidan doimiy qoʻllab-quvvatlash davom ettirilishi aytildi.

Prezidentimiz yangi Oʻzbekiston mamlakatimiz yoshlari uchun yuksak parvozlar va katta gʻalabalar maydoniga aylanib borayotganini alohida taʼkidladi. Bugun taʼlim, ilm-fan, madaniyat va sanʼat, sport, axborot texnologiyalari va biznes sohalarida yangi nomlar, yangi qahramonlar paydo boʻlayotgani, ana shunday bilimli, joʻshqin hamda izlanuvchan oʻgʻil-qizlar bilan butun xalqimiz haqli ravishda faxrlanishi qayd etildi.

Davlatimiz rahbari yoshlarga murojaat qilib, ularga Uchinchi Renessans bunyodkorlari boʻlishdek yuksak sharaf nasib etayotganini taʼkidladi. Ularni bugungi tinch va osoyishta hayotning, keng imkoniyatlar, ota-ona va ustoz-murabbiylar mehnatining qadriga yetib, tinimsiz oʻqib-oʻrganish, bilim va mahoratni doimiy oshirib borishga chaqirdi. Shu yoʻlda mamlakatimiz yoshlari uchun barcha zarur sharoitlarni yaratib berishga tayyorlik bildirildi.

Marosimda mahalla tizimining jamiyat hayotidagi oʻrniga ham alohida eʼtibor qaratildi. “Mahallani rivojlantirish va jamiyatni yuksaltirish yili”da katta dastur va rejalar amalga oshirilayotgani, bu ishlarga oila va jamiyatda tinchlik-totuvlikni, mehr-oqibatni mustahkamlash, ijtimoiy muammolarni joyida hal etish, ezgulik va adolatni qaror toptirishda otaxon va onaxonlar, “mahalla yettiligi” va faol fuqarolar yaqindan ishtirok etishlariga ishonch bildirildi.

Shu munosabat bilan Prezidentimiz ertaga nishonlanadigan Mahalla tizimi xodimlari kuni bilan jonkuyar mahalla raislari va faollarini, barcha yurtdoshlarimizni samimiy tabriklab, ularga yangi muvaffaqiyatlar tiladi.

Taʼkidlanganidek, ming yillar davomida xalqlar oʻrtasida maʼnaviy koʻprik boʻlib kelayotgan Navroʻzning tinchlik, doʻstlik va hamkorlik gʻoyalari bugungi notinch zamonda yanada dolzarb ahamiyat kasb etmoqda. Yurtimizda yashayotgan 130 dan ortiq millat va elat vakillari ushbu bayramni bir boʻlib, shod-u xurramlik bilan nishonlamoqda. Ana shunday ahillik va totuvlik yangi Oʻzbekistonni birgalikda barpo etishning eng ishonchli kafolati ekani taʼkidlandi.

Jamiyatimizda millatlararo va dinlararo hamjihatlikni bundan buyon ham mustahkamlash uchun bor kuch va imkoniyatlar safarbar etilishi qayd etildi. Shuningdek, qoʻshni va qardosh mamlakatlar bilan birga yagona Markaziy Osiyo ovozi boʻlib, mintaqamizning tinchlik, birodarlik va hamkorlik makoni sifatidagi nufuzini oshirishga ustuvor ahamiyat qaratilishi taʼkidlandi.

Davlatimiz rahbari tadbirda ishtirok etayotgan xorijiy davlatlar elchilari, xalqaro tashkilotlar vakillarini ham Xalqaro Navroʻz kuni bilan samimiy qutlab, ularning xalqlari va mamlakatlariga ezgu tilaklarini yoʻlladi.

Prezidentimiz butun xalqimizga yana bir bor murojaat qilib, shunday dedi:

“Azaliy anʼanalarimizni davom ettirib, koʻchat ekib, bogʻ yarataylik, uyimiz, mahallamizni obod qilib, hayotimizni yanada goʻzal va farovon etaylik!

Yaxshi qo‘shnichilik, ahilligimiz va ezgu ishlarimiz bilan yuksak marralarga intilayotgan xalq ekanimizni dunyoga namoyon etaylik!

Yagona Vatan, yagona xalq boʻlib, yangi hayot, yangi tarix, yangi kelajak yarataylik!”.

Bayram katta konsert dasturi bilan davom etdi. Folklor-etnografik jamoalar hamda sanʼatkorlarning chiqishlari, milliy oʻyin va askiyalar barchaga zavq-shavq ulashdi.

Tadbirda davlat va jamoat tashkilotlari vakillari, parlament va hukumat aʼzolari, turli hududlardan mehmonlar, mamlakatimizda faoliyat olib borayotgan diplomatik korpus vakillari ishtirok etdi.

Assalomu alaykum, qadrli vatandoshlar!

Muhtaram mehmonlar!

Butun dunyo nurga, go‘zallikka to‘lgan shu dilbar faslda jonajon diyorimizga sharqona yangi yil – Navro‘zi olam kirib kelmoqda.

Bugun bamisoli ikki azim daryo tutashmoqda – Navro‘z bayramini muborak Ramazon hayiti bilan birga nishonlamoqdamiz.

Tabiat uyg‘onishi va ruhiy poklanish ramzi bo‘lgan mana shunday qutlug‘ ayyomlar bilan sizlarni, ko‘pmillatli butun xalqimizni chin qalbimdan samimiy tabriklayman.

Dunyoning olis va yaqin mamlakatlarida ishlayotgan, tahsil olayotgan vatandoshlarimizni ham muborakbod etib, ularga ezgu salom va tilaklarimizni izhor etaman.

Bayram barchamizga muborak bo‘lsin!

Navro‘zi olam diyorimizga tinchlik va baxt olib kelsin!

Aziz do‘stlar!

Bugun bahorni sog‘ingan yuraklarimiz yangi kun, yangi hayot shukuhi bilan yashamoqda.

Osmondan obirahmat yog‘ilib, daryo va ko‘llarimiz suvga to‘lmoqda. Bog‘larimiz, qir va adirlarimiz o‘t-o‘lanlar bilan qoplanib, yilimiz barakali bo‘lishidan darak bermoqda.

Shahar va qishloqlarimiz, vodiy va vohalarimizda sayil-tomoshalar boshlanmoqda.

Yangilanish fasli bo‘lgan Navro‘z kunlarida xalqimizning umummilliy birdamligi, bunyodkorlik salohiyati yanada yaqqol namoyon bo‘lmoqda.

Navro‘z qadriyatlariga sodiq bo‘lib, millati, tili, dinidan qat’i nazar, har bir yurtdoshimizni, butun el-yurtimizni rozi qilish yo‘lidagi ishlarimizni yangi bosqichga ko‘tarmoqdamiz. Bu yilgi bayramga “Navro‘zni ulug‘lash – insonni ulug‘lashdir”, degan da’vatkor g‘oya asos bo‘lgani ham buning yaqqol tasdig‘idir.

Biz barcha hududlarimizga, qishloq va ovullar, mahallalarimizga Yangi O‘zbekiston nafasini olib kirish bo‘yicha katta harakat boshladik.

Yangi ish o‘rinlari yaratish, kambag‘allikni qisqartirish, ijtimoiy himoyani kuchaytirish borasida ham ulkan qadamlar qo‘ymoqdamiz. Yangi-yangi zamonaviy korxonalar, kommunikatsiya tarmoqlari, shinam uy-joylar, ta’lim, tibbiyot, madaniyat va sport obyektlari barpo etilmoqda.

Kelgusida bunday qurilishlar ko‘lamini yanada kengaytiramiz.

Ushbu fayzli tongda mirishkor dehqon va fermerlarimizga barchamiz yuksak hurmat va ehtirom bildiramiz.

Siz, azizlarning elimiz dasturxonini yanada to‘kin va farovon qilishdek ezgu ishlaringizda zafar va omadlar tilaymiz. Chunki, sizlarning olijanob mehnatingiz bilan xalqimizning rizqu nasibasi butun bo‘ladi. Bu borada davlatimiz, jamiyatimiz sizlarni doimo qo‘llab-quvvatlaydi.

Hurmatli yurtdoshlar!

Yangi O‘zbekiston mamlakatimiz yoshlari uchun yuksak parvozlar, katta-katta g‘alabalar maydoniga aylanib bormoqda. Yaqinda yoshlarimiz bilan uchrashib, bunga yana bir bor ishonch hosil qildim. Har bir yo‘nalishda – ta’lim, ilm-fan, madaniyat va san’at, sport, IT va biznes sohalarida yangi nomlar, yangi qahramonlar paydo bo‘lmoqda. Mana shunday bilimli, jo‘shqin va izlanuvchan o‘g‘il-qizlar bilan barchamiz haqli ravishda faxrlanamiz.

Aziz farzandlarim, bugun Uchinchi Renessans bunyodkorlari bo‘lishdek ulkan baxt va yuksak sharaf sizlarga nasib etmoqda. Qancha-qancha ajdodlarimiz intilib yashagan shu buyuk orzuni ro‘yobga chiqarishga sizlar albatta qodirsiz.

Bugungi tinch va osoyishta hayotning, yaratilgan katta imkoniyatlar, ota-onalar, ustoz-murabbiylaringiz mehnatining qadriga yetib, tinimsiz o‘qib-o‘rgansangiz, bilim va mahoratingizni doimo oshirib borsangiz –  kelajak albatta sizniki bo‘ladi.

Bu yo‘lda sizlarga, butun O‘zbekiston yoshlariga yana qanday sharoit zarur bo‘lsa, barchasini yaratib berishga tayyormiz.

Vatan uchun, millat uchun, xalq uchun deb yashasangiz – Vatan va xalq ham sizni e’zozlab, boshiga ko‘taradi!

Yangi O‘zbekistonning oltin avlodi bo‘lib, uning zafar bayrog‘ini baland ko‘tarishdan hech qachon to‘xtamang, aziz farzandlarim!

Qadrli yurtdoshlar!

Mahalla deganda, ko‘z oldimizda avvalo ona yurtimizning go‘zal timsoli namoyon bo‘ladi. Biz Mahallani rivojlantirish va jamiyatni yuksaltirish yilida yaxshi niyat bilan katta dastur va rejalarni amalga oshirmoqdamiz.

Bu ishlarda oila va jamiyatda tinchlik-totuvlik, o‘zaro mehr-oqibatni mustahkamlash, ijtimoiy muammolarni joyida hal etish, ezgulik va adolatni qaror toptirish uchun ko‘pni ko‘rgan otaxon va onaxonlarimiz, “mahalla yettiligi”, faol fuqarolarimiz yaqindan ishtirok etadilar, deb ishonaman.

Fursatdan foydalanib, ertaga nishonlanadigan Mahalla tizimi xodimlari kuni bilan jonkuyar mahalla raislari va faollarini, barcha yurtdoshlarimizni chin qalbimdan tabriklab, ularga yangi muvaffaqiyatlar tilayman.

Muhtaram do‘stlar!

Ming yillar davomida xalqlar o‘rtasida ma’naviy ko‘prik bo‘lib kelayotgan Navro‘zning tinchlik, do‘stlik va hamkorlik g‘oyalari bugungi notinch zamonda yanada dolzarb ahamiyat kasb etmoqda.

Yurtimizda yashayotgan 130 dan ortiq millat va elat vakillari bu bayramni bir bo‘lib, shodu xurramlik bilan nishonlamoqda. Mana shunday ahillik va totuvlik Yangi O‘zbekistonimizni birgalikda barpo etishning eng ishonchli kafolatidir.

Biz jamiyatimizda millatlar va dinlararo hamjihatlikni bundan buyon ham mustahkamlash uchun bor kuch va imkoniyatlarimizni safarbar etamiz. Bu borada qo‘shni va qardosh mamlakatlar bilan birga, yagona Markaziy Osiyo ovozi bo‘lib, mintaqamizning tinchlik, birodarlik va hamkorlik makoni sifatidagi nufuzini oshirishga ustuvor ahamiyat qaratamiz.

Fursatdan foydalanib, davramizda ishtirok etayotgan xorijiy davlatlarning muhtaram elchilarini, xalqaro tashkilotlar vakillarini Xalqaro Navro‘z kuni bilan samimiy qutlab, ularning o‘lkalari va xalqlariga qizg‘in tabriklarimizni yo‘llaymiz.

Qadrli do‘stlar!

Mana shu tarovatli lahzalarda barchangizga, butun el-yurtimizga murojaat qilib aytmoqchiman.

Azizlar, qarang, qanday go‘zal yurtimiz, qanday saxovatli zaminimiz, betakror tabiatimiz bor.

Bu bebaho boyliklarni ming yillar osha asrab-avaylab kelayotgan mehnatkash, oq ko‘ngil va olijanob xalqimiz bor.

Xudo bizga ato etgan yer-suvimizni, barcha imkoniyatlarimizni qadrlab, ulardan oqilona foydalansak, bir boyligimizga, albatta, o‘n boylik qo‘shiladi.

Shu bois azaliy an’analarimizni davom ettirib, ko‘chat ekib, bog‘ yarataylik, uyimiz, mahallamizni obod qilib, hayotimizni yanada go‘zal va farovon etaylik!

Yaxshi qo‘shnichilik, ahilligimiz va ezgu ishlarimiz bilan yuksak marralarga intilayotgan xalq ekanimizni dunyoga namoyon etaylik!

Yagona Vatan, yagona xalq bo‘lib, yangi hayot, yangi tarix, yangi kelajak yarataylik!

Aziz va muhtaram vatandoshlarim!

Siz, qadrdonlarimni, butun xalqimizni Navro‘zi olam bilan yana bir bor chin dildan tabriklayman.

Yangi O‘zbekiston Navro‘zi – yuksalish va taraqqiyot davri xalqimizga ravnaq va farovonlik ato etsin!

Barcha pok niyatlarimiz amalga oshsin!

Yaratgan Parvardigor jonajon Vatanimizni o‘z panohida asrasin!

Yangi kun, yangi baxt barchamizga muborak bo‘lsin!

2026 yil 19 mart kuni soat 16:00da, “Temir yo‘l mahsulotini sertifikatlashtirish markazi” MCHJ Rahbariyati tomonidan Muqaddas Ramazon hayiti bayrami va Navro‘z – Umumxalq bayrami munosabati bilan Jamiyat xodimlarini tabriklash tadbiri o‘tkazildi.

Rahbariyat tomonidan ushbu tadbirda Jamiyat xodimlari Muqaddas Ramazon hayiti bayrami va Navro‘z – Umumxalq bayrami bilan samimiy qutlandi.

Prezident Shavkat Mirziyoyev Imom Buxoriy majmuasida yakuniga yetgan bunyodkorlik ishlari va yaratilgan sharoitlar bilan tanishdi. 

Majmua davlatimiz rahbari tashabbusi bilan buyuk muhaddis bobomizning islom olamida tutgan yuksak mavqei, ulkan salohiyatiga munosib tarzda qaytadan bunyod etildi. Ziyoratchilarga har tomonlama qulay sharoit yaratildi. 

Xususan, majmua qoshida turizm markazi ochildi. Yondosh 15 gektar maydonda zamonaviy infratuzilma yaratilib, shinam mehmonxonalar, xizmat koʻrsatish va servis nuqtalari barpo etildi. Jumladan, 1 ta 115 oʻrinli toʻrt yulduzli, 2 ta uch yulduzli, 22 ta 176 oʻrinli oilaviy mehmon uylari hamda avtoturargoh qurilgan. Mazkur obyektlar toʻliq kommunikatsiya tarmoqlari bilan taʼminlanib, hududida obodonlashtirish ishlari amalga oshirilgan.

Natijada Imom Buxoriy majmuasi ilgari bir kunda 12 ming ziyoratchiga xizmat koʻrsatgan boʻlsa, hozir kuniga 65 ming nafar ziyoratchini qabul qilish quvvatiga ega.

Majmuaning oʻzi Samarqandning, yangi Oʻzbekistonning durdonasi boʻlib qad rostladi. Uning maydoni 45 gektarni tashkil etadi. 10 ming kishiga moʻljallangan ulkan masjid, maʼmuriyat binosi, 154 ustunli, milliy uslubdagi muhtasham ayvon qurildi.

Ziyoratgohning qoq markazida Imom Buxoriy bobomizning tabarruk maqbarasi oʻrin olgan. 

Majmua tarkibida eng ilgʻor axborot texnologiyalari asosida 9 pavilyondan iborat noyob innovatsion muzey barpo etildi. U islom olamida muhaddislar sultoni deya eʼtirof etilgan Imom Buxoriyning hayoti va ilmiy merosi, islom maʼrifati rivojiga qoʻshgan hissasini namoyon etadi. Shuningdek, muzeyda Qurʼoni karimda ismlari zikr qilingan 25 paygʻambar tarixi, Muhammad alayhissalomning shajarasi, Makka va Madinadagi hayoti, hadislarning jamlanishi va yozilishi haqidagi maʼlumotlar joylashtirilgan.

Qadamjoda 14 ta moviy gumbaz, 75 metrlik 4 ta minora unga ulugʻvor qiyofa bagʻishlab turibdi.

Davlatimiz rahbari turizm markazi va masjidda yaratilgan sharoitlarni koʻzdan kechirdi.

Maʼlumki, bir yarim ming yillik islom tarixini, ilm-maʼrifatini yurtimizdan yetishib chiqqan buyuk olim-u ulamolarning nomlarisiz tasavvur etib boʻlmaydi. Shu kunlarda rasman ochilgan Oʻzbekistondagi Islom sivilizatsiyasi markazi ham bu haqiqatni yana bir bor tasdiqlaydi.

Butun musulmon olamida hadis ilmi haqida gap ketsa, hech shubhasiz, bizning diyorimiz birinchilar qatorida tilga olinadi. Chunki Imom Buxoriy, Imom Termiziy kabi buyuk hadisshunos olimlar aynan mana shu zamin farzandlaridir.

Xususan, Imom Buxoriyning “Sahihi Buxoriy” kitobi dunyoda tan olingan eng moʻtabar oltita hadis kitobining biridir. Oʻn yoshidan boshlab hadis ilmini oʻrgangan alloma bobomiz 20 dan ortiq asar yozganlar. Ular to hanuz din-u diyonatimizni mustahkamlash yoʻlida islom ummatiga xizmat qilib kelmoqdalar.

Prezidentimiz har gal Samarqandga kelganida majmuaning qurilish jarayoni bilan tanishib, bu joy faqat ziyorat emas, ilm-maʼrifat, tarbiya va ibrat maskani boʻlishi, Imom Buxoriyning buyuk izlanishlari, bilimi hamda kamoloti ziyoratchilar, ayniqsa, yoshlar uchun ezgu namuna boʻlishi kerakligini taʼkidlagandi. 

– Ushbu betakror qurilish yangi Oʻzbekistonning ulkan imkoniyatlarini yaqqol namoyon etadi. Ziyoratgoh xalqimiz uchun, jahondagi barcha musulmonlar uchun ezgulik va maʼrifat nurini taratadigan qutlugʻ maskanga aylanadi deb ishonaman. Aminmanki, bu dargohni ziyorat qilib, uning maʼnaviy muhitidan bahramand boʻlgan inson, ayniqsa, yoshlar islom dinining asl maʼnosini anglab yetadi, toʻgʻri yoʻldan adashmaydi, – dedi Prezidentimiz.

Shuning uchun ham Imom Buxoriy majmuasida maʼnaviy-maʼrifiy ishlarni keng yoʻlga qoʻyish, uni chinakam tarbiya va ibrat maktabiga aylantirish, bu yerda imom-xatiblar, mahalla faollari uchun malaka oshirish dasturlarini kuchaytirish lozimligi taʼkidlandi.

Bu yerdagi barcha ishlar yakuniga yetganini hisobga olib, yangi qurilgan muhtasham masjidda Hayit namozini ado etish taklif qilindi, bu moʻmin-musulmonlarimiz, butun el-yurtimizning koʻnglidagi ish, xalqimizga munosib Ramazon sovgʻasi boʻlishi taʼkidlandi. 

Shuning bilan davlatimiz rahbarining Samarqand viloyatiga tashrifi yakunlandi.

Oʻzbekiston Respublikasi Prezidenti Shavkat Mirziyoyev 19-mart kuni Ozarbayjon Respublikasi Prezidenti Ilhom Aliyev bilan telefon orqali muloqot qildi.

Davlat rahbarlari yaqinlashib kelayotgan Ramazon hayiti va Navroʻz bayrami munosabati bilan bir-birlarini samimiy qutlab, birodar xalqlarimizga tinchlik-osoyishtalik, farovonlik va ravnaq tiladilar.

Suhbatda Oliy davlatlararo kengashning ikkinchi yigʻilishida erishilgan kelishuvlarni amalga oshirish doirasida Oʻzbekiston – Ozarbayjon strategik sheriklik va ittifoqchilik munosabatlarini yanada kengaytirish masalalariga alohida eʼtibor qaratildi.

Tovar ayirboshlash barqaror ortib borayotgani, savdo-iqtisodiy, investitsiyaviy, transport, madaniy-gumanitar va boshqa ustuvor sohalarda qoʻshma kooperatsiya loyihalari ilgari surilayotgani mamnuniyat bilan qayd etildi.

Tomonlar, shuningdek, Yaqin Sharqdagi vaziyatni muhokama qildilar. Uning yanada keskinlashishi keng mintaqa uchun oldindan aytib boʻlmaydigan oqibatlarga, jahon iqtisodiyoti retsessiyasiga olib kelishi mumkinligi, vaziyatni faqat siyosiy-diplomatik vositalar bilangina tez fursatda yumshatish zarurligi qayd etildi.

Boʻlajak ikki va koʻp tomonlama tadbirlar rejasi ham koʻrib chiqildi.