Muallif: master

---

---

Nizomiy Ganjaviy nomidagi xalqaro markazning hurmatli hamraislari!

Xonimlar va janoblar!

Siz, azizlarni qadimiy va go‘zal O‘zbekiston zaminida samimiy qutlashdan g‘oyat mamnunman.

Biz o‘z mamlakatlarining ravnaqiga, xalqaro hamkorlik va o‘zaro ishonchni mustahkamlashga beqiyos hissa qo‘shib kelayotgan atoqli siyosatchilar va davlat arboblari, xalqaro tashkilotlar rahbarlaridan iborat nufuzli tarkibni Toshkentda, bir davrada to‘plash borasidagi tashabbusi uchun Nizomiy Ganjaviy nomidagi xalqaro markazga chuqur minnatdorlik bildiramiz.

Ushbu markaz, ulug‘ o‘zbek shoiri Alisher Navoiy “shoirlarning sultoni”, deb ta’riflagan buyuk ozarbayjon mutafakkiri Nizomiy Ganjaviyning betakror ijodiy merosini asrab-avaylash va keng targ‘ib etishda muhim o‘rin tutib kelayotganini alohida qayd etmoqchiman.

Ta’kidlash kerakki, Nizomiy Ganjaviyning teran falsafasi, odam va olam o‘rtasidagi uyg‘unlik hamda adolat haqidagi o‘lmas g‘oyalari doimo dolzarb bo‘lib, bugungi murakkab sharoitda yanada katta ahamiyat kasb etmoqda.

Nizomiy Ganjaviy nomidagi markazning xalqaro kun tartibidagi masalalarni o‘rganishdagi faol ishtiroki alohida e’tiborga loyiqdir. Uning shafeligida har yili o‘tkazib kelinayotgan Global Boku forumi xalqaro va mintaqaviy taraqqiyotning eng dolzarb muammolarini hal etish uchun yangi g‘oyalar ilgari suriladigan, dunyo miqyosida tan olingan nufuzli muloqot maydonlaridan biriga aylandi.

Markaziy Osiyo va Janubiy Kavkaz o‘rtasidagi o‘zaro bog‘liqlik masalalari, ushbu ikki yirik mintaqaning Yevropa bilan hamkorlik istiqbollari bugungi anjumanning bosh mavzusi etib belgilangani g‘oyat muhim, deb hisoblaymiz.

Biz buni o‘zaro hamjihatlik va hamkorlik jarayonlari jadallashib borayotgan Markaziy Osiyoni jahonga yanada kengroq tanishtirish, mintaqalararo o‘zaro bog‘liqlikni mustahkamlash, shuningdek, O‘zbekiston va Ozarbayjonning salohiyat hamda imkoniyatlaridan to‘liq foydalanish yuzasidan fikr almashish uchun noyob imkoniyat sifatida qabul qilamiz.

Ta’kidlash kerakki, so‘nggi yillarda Ozarbayjon bilan o‘zaro ishonch va bir-birini qo‘llab-quvvatlash ruhidagi munosabatlarimiz faol rivojlanmoqda, Ittifoqchilik munosabatlari to‘g‘risidagi shartnoma imzolandi, Davlatlararo oliy kengash faoliyat ko‘rsatmoqda.

Shu bilan birga, Ozarbayjon Markaziy Osiyo va Yevropani bog‘lashda strategik ko‘prik vazifasini bajarib kelayotganini ham alohida qayd etishni istar edim.

Bugungi forumda ko‘plab vakillari ishtirok etayotgan Yevropa bilan munosabatlarimiz o‘zining mutlaqo yangi rivojlanish davrini boshidan kechirayotganini qayd etmoqchiman.

Yaqinda biz yurtimizda ilk bor “Markaziy Osiyo – Yevropa Ittifoqi” sammitini o‘tkazdik. Unda mintaqamiz va Yevropa Ittifoqi mamlakatlari o‘rtasida strategik sheriklik o‘rnatish to‘g‘risida tarixiy qaror qabul qilindi. Yaqin oylarda Yevropa Ittifoqi bilan Kengaytirilgan sheriklik va hamkorlik to‘g‘risidagi bitimni imzolaymiz.

Biz Yevropa Ittifoqi va boshqa sheriklarimiz bilan birgalikda samarali transport-logistika va energetika yo‘laklarini rivojlantirish bo‘yicha aniq maqsadga yo‘naltirilgan ishlarni davom ettiramiz. Ishonamizki, ushbu chora-tadbirlar mintaqamizning G‘arb va Sharq o‘rtasidagi xab sifatidagi rolini qayta tiklash imkonini beradi.

Biz Ozarbayjon Respublikasi Prezidenti hurmatli Ilhom Haydarovich Aliyevning yangi umummintaqaviy jarayonlarni rivojlantirishda ishtirok etishga tayyor ekanini yuqori baholaymiz hamda uning Janubiy Kavkaz va Markaziy Osiyo hamkorligini mustahkamlash borasidagi sa’y-harakatlarini yuksak qadrlaymiz.

Fursatdan foydalanib, do‘st Ozarbayjon xalqini ulkan tarixiy yutuq – yaqinda Vashingtonda AQSH vositachiligida Armaniston bilan uch tomonlama Qo‘shma deklaratsiya imzolangani bilan yana bir bor chin dildan qutlaymiz.

Hurmatli anjuman ishtirokchilari!

Bugungi kunda O‘zbekiston jadal islohotlarni qat’iy davom ettirmoqda va biz bu yo‘lda ulkan natijalarga erishdik. “O‘zbekiston – jahonga ochiq va o‘zi uchun dunyoni kashf etayotgan mamlakat” degan tamoyil hayotimizdan mustahkam o‘rin egallamoqda.

Biz xorijiy hamkorlar va xalqaro tashkilotlar bilan uzoq muddatli aloqalarni izchil mustahkamlamoqdamiz, hamkorlik ufqlarini kengaytirmoqdamiz, yangi ilg‘or g‘oyalar uchun har doim ochiqmiz. Biz huquqiy, dunyoviy, demokratik va ijtimoiy davlat bo‘lgan Yangi O‘zbekistonni barpo etish siyosatini izchil davom ettiramiz.

O‘zbekiston va Markaziy Osiyo mintaqasi hozirgi murakkab davrda xalqaro hamjamiyatga bebaho boylik – barqarorlik, ishonch va taraqqiyotni taklif etmoqda.

Bugungi yangi sharoitda oldimizda hamkorlik bo‘yicha keng ufqlar ochilmoqda, o‘zaro manfaatli va ikki tomonga ham foyda keltiradigan masalalar yuzasidan birgalikda ishlash uchun yangi imkoniyatlar paydo bo‘lmoqda, deb hisoblayman. Bu borada sizlarning qo‘llab-quvvatlashingiz va kelgusidagi hamkorligingizga umid qilamiz.

Bugungi nufuzli uchrashuvning barcha ishtirokchilariga samarali muhokamalar va anjuman ishiga muvaffaqiyat tilayman.

Shavkat Mirziyoyev,

O‘zbekiston Respublikasi Prezidenti

---

---

O‘zbekiston Respublikasi Prezidenti Shavkat Mirziyoyev 18-avgust kuni Toshkent shahrida qurib bitkazilgan Olimpiya shaharchasiga tashrif buyurdi. 

Uning qurilishiga 2022-yil 9-noyabrda tamal toshi qo‘yilgan edi. O‘shanda davlatimiz rahbari Olimpiya shaharchasi xalqimizning yuksak bunyodkorlik salohiyati va o‘zbek sportining olamshumul yutuqlari ramziga aylanishi, me’moriy jihatdan mukammal, energiya tejamkor va eng ilg‘or innovatsion yechimlarni mujassam qilgan zamonaviy majmua bo‘lishini ta’kidlagandi.

Shunday ham bo‘ldi – qisqa vaqt ichida 100 gektardan ziyod maydonda muhtasham majmua qad rostladi. Qariyb 290 million dollarlik ushbu noyob loyiha “CAMC Engineering” kompaniyasi tomonidan xalqaro talablarga muvofiq amalga oshirildi. 

Shaharchada 5 ta asosiy sport majmuasi joylashgan.

Xususan, Velodrom murakkab muhandislik yechimlari asosida, o‘ziga xos dizaynda qurilgan. Uning yog‘och qoplamasi sifati, trayektoriyasi va burilish burchaklari Xalqaro Olimpiya qo‘mitasi talablariga javob beradi. Jumladan, yo‘lak eng mustahkam daraxtlardan yasalgan, qavatma-qavat yotqizilgan. Bu sifat muntazam saqlanishi uchun velodromda yil davomida bir xil harorat ta’minlanadi. Hatto velosportchilarga havo qarshiligigacha inobatga olingan.

Trekka yorug‘lik bir xil va teng darajada tushadi. Bu sportchilarga qulaylik bo‘lishi bilan birga, tomosha va televizion translyatsiya me’yorlariga ham mos. O‘rindiqlar 2 ming 200 kishiga mo‘ljallangan. Xalqaro Olimpiya qo‘mitasining yangi talabi bo‘yicha tomosha joylariga himoya to‘sig‘i o‘rnatilgan.

Shuningdek, majmua ko‘p funksiyali bo‘lib, bu yerda stol tennisi, qilichbozlik bo‘yicha musobaqa va mashg‘ulotlar o‘tkazish ham mumkin. Bunday darajadagi velodrom O‘zbekistonda birinchisi.

Mutasaddilarga hududlarda sharoit yaratib, velosportni rivojlantirish bo‘yicha dastur tayyorlash vazifasi qo‘yildi.

Prezidentimiz stol tennisi hammabop, arzon va qulay sport ekanini ta’kidlab, har bir maktab va mahallada uni ommalashtirish, anjomlarini ishlab chiqarish yuzasidan ko‘rsatmalar berildi.

Shaharcha markazida 12 ming o‘rinli stadion joylashgan. Xalqaro turnirlar paytida bu yerda tantanali marosimlar tashkil etiladi. Asosiysi, yashil maydon va 9 qatorli yugurish yo‘lagida yengil atletikaning 48 ta yo‘nalishi bo‘yicha musobaqalar o‘tkaziladi. Jumladan, jahon chempionati, Brilliant ligasi, paraatletika bahslari, ko‘zi ojizlar o‘rtasida IBSA o‘yinlarini tashkil etish mumkin. Boshqa paytlarda stadiondan mahalliy o‘quv-yig‘inlar, amaliy mashg‘ulotlar orqali dual ta’limda foydalaniladi.

Stadiondagi to‘rt qavatli binoda terma jamoalar mutaxassislari va sport federatsiyalari faoliyat yuritadi.

Yengil atletika va para sport turlari aholi salomatligini mustahkamlashda juda samarali. Olimpiya va Osiyo o‘yinlarida ular bo‘yicha dastur ham keng. Lekin yurtimizda bu imkoniyatlar to‘la ishga solinmayotgani ko‘rsatib o‘tildi.

Shu bois yengil atletikaning barcha yo‘nalishlarini rivojlantirish bo‘yicha topshiriq berildi. Unga ko‘ra, viloyatlardagi stadionlar rekonstruksiya qilinib, yengil atletika uchun sharoitlar yaxshilanadi, xorijdan murabbiylar olib kelinadi, sportchilar mahoratini oshirish maqsad qilib qo‘yiladi.

Ulkan suv sporti saroyi ham zamonaviy va qulay. Unda 25×50 metrli suzish va 25×20 metrli suvga sakrash havzalari, mashg‘ulotlar uchun basseyn va trenajyor zallari bor. Barcha sharoitlar va o‘lchamlar xalqaro olimpiya standarti talablariga javob beradi.

Yaqinda «World Aquatics» federatsiyasi delegatsiyasi majmuani ko‘rikdan o‘tkazdi va buni tasdiqladi. Ya’ni, bu yerda suzish, suvga sakrash, sinxron suzish, suv polosi bo‘yicha qit’a va jahon chempionatlari, Olimpiya dasturidagi nufuzli musobaqalarni tashkil etish imkoniyati bor. Ularni 2 mingdan ziyod muxlislar tomosha qilishi mumkin.

Davlatimiz rahbari suv sport turlarini rivojlantirish, xalqaro turnirlarda natijalarni yaxshilash bo‘yicha o‘z fikrlarini bildirdi.

Jamoaviy va yakkakurash sport turlari majmualari ham xalqaro talablar darajasida bunyod etilgan. Ularning har biri uch qavatli, 2 ming o‘rinli. Jumladan, birinchisida voleybol, basketbol va gandbol bo‘yicha mashg‘ulot va xalqaro musobaqalarni o‘tkazish mumkin. Yakkakurashlar majmuasi dzyudo, boks, taekvondo kabi sport turlarini rivojlantirishga asos bo‘ladi.

Prezidentimiz shu yerda sportchilar bilan suhbatlashdi.

– Xalqaro musobaqalarda bayrog‘imizni baland ko‘tarib, mamlakatimiz rivojini namoyon etyapsizlar. Sizning har bir yutug‘ingiz xalqimiz uchun katta g‘urur, yoshlarimizga kuch, dalda. Bu harakatlarni davom ettirib, bolalarni ortingizdan ergashtirib, sportimizni yanada yuksaltirishingizni tilaymiz, – dedi Shavkat Mirziyoyev.

Olimpiya shaharchasida futbol, voleybol, tennis, chim ustida xokkey, yengil atletika kabilar bo‘yicha 15 ta ochiq maydon ham barpo etildi.

Bundan tashqari, 400 o‘rinli paralimpiya yotoqxonasi, sport tibbiyoti ilmiy-amaliy markazi qurilishi yakuniy bosqichda.

Shaharchadagi barcha inshootlar energiya tejamkor bo‘ladi. Avtoturargohlar ustida quyosh panellari o‘rnatiladi.

---

O‘zbekiston Respublikasi Prezidentining Farmoyishi

Milliy iqtisodiyotimizda barqaror o‘sish sur’atlarini ta’minlash, yurtimizda tadbirkorlik rivojini yangi bosqichga ko‘tarish, mamlakatimizning ishlab chiqarish va eksport salohiyatini yuksaltirish borasidagi xizmatlari, sohaga ilg‘or innovatsion, «yashil» va raqamli texnologiyalarni joriy etish, investitsiyalarni jalb qilish, ish o‘rinlari yaratish, aholi farovonligini oshirishga qo‘shgan katta hissasi, shuningdek, biznesda erishayotgan salmoqli natijalari hamda ijtimoiy hayotdagi munosib ishtiroki uchun quyidagilar «Faol tadbirkor» ko‘krak nishoni bilan taqdirlansin:

Atadjanov Ne’matjan Taxirovich – To‘rtko‘l tumanidagi «Real montaj» mas’uliyati cheklangan jamiyati rahbari, Qoraqalpog‘iston Respublikasi

Yeshanov Zulfat Kadirbergenovich – Qonliko‘l tumanidagi  «Zamira Kazayakli» fermer xo‘jaligi boshlig‘i, Qoraqalpog‘iston Respublikasi

Jarilkasinov Ruslan Xojabayevich – Shumanay tumanidagi «Promservis Shumanay» xususiy korxonasi rahbari, Qoraqalpog‘iston Respublikasi

Ismaylov Nurman Djanabayevich – Chimboy tumanidagi yakka tartibdagi tadbirkor, hunarmand-o‘tov yasovchi, Qoraqalpog‘iston Respublikasi

Kaljanov Sarsenbay Kalbayevich – Nukus shahridagi «Jayhun Turon Super Servis» mas’uliyati cheklangan jamiyati direktori, Qoraqalpog‘iston Respublikasi

Xabibullayev Xojiakbar Malik o‘g‘li – Nukus shahridagi «Nukus lak-bo‘yoqlari» mas’uliyati cheklangan jamiyati direktori, Qoraqalpog‘iston Respublikasi

Atabekov Shaxzod G‘ayratovich – Paxtabod tumanidagi «The Besttex» mas’uliyati cheklangan jamiyati ta’sischisi, Andijon viloyati

Axmedov Ravshanbek Alijonovich – Qo‘rg‘ontepa tumanidagi «Oqsuv» fermer xo‘jaligi boshlig‘i, Andijon viloyati

Ibaydullayev Ulug‘bek Qurbonaliyevich – Andijon tumanidagi «Sity-Stroy» mas’uliyati cheklangan jamiyati direktori, Andijon viloyati

Mirzayev Farxodjon Alijanovich – Andijon tumanidagi «Texno-innovator» mas’uliyati cheklangan jamiyati ta’sischisi, Andijon viloyati

Moitov Xikmatillo Xabibullayevich – Jalaquduq tumanidagi «Ulug‘ qudrat sohibi» fermer xo‘jaligi boshlig‘i, Andijon viloyati

Siparova Svetlana Gennadevna – Oltinko‘l tumanidagi «Mark Formelli IT» mas’uliyati cheklangan jamiyati ta’sischisi, Andijon viloyati

Eshonxujayeva Noira Jo‘rayevna – Xo‘jaobod tumanidagi yakka tartibdagi tadbirkor, Andijon viloyati

G‘aybullayev Doniyor Ixtiyor o‘g‘li – Shofirkon tumanidagi xususiy o‘quv markazi rahbari, Buxoro viloyati

Quvatov Elamon Choriyevich – Olot tumanidagi «Buxoro Gold Star Moto» mas’uliyati cheklangan jamiyati ta’sischisi, Buxoro viloyati

Ravshanov Abdulaziz Xamitovich – Kogon tumanidagi «Parravshantrans» mas’uliyati cheklangan jamiyati rahbari, Buxoro viloyati

Sayidova Dilnavoz Shavkatovna – G‘ijduvon tumanidagi «Ortiq Dilnavoz» mas’uliyati cheklangan jamiyati rahbari, Buxoro viloyati

To‘xtayev Erdon Isoyevich – Buxoro shahridagi «Rushan Teks» mas’uliyati cheklangan jamiyati direktori, Buxoro viloyati

Fayziyev Yaxyo Sharafovich – Romitan tumanidagi «Fayz-2000» fermer xo‘jaligi boshlig‘i, Buxoro viloyati

Choriyev Malikbek Muhamadovich – Buxoro tumanidagi «Sledopyt» mas’uliyati cheklangan jamiyati direktori, Buxoro viloyati

Bayxurazov Sunnatulla Raxmatkulovich – Jizzax shahridagi «Maqsuda Nazokat» mas’uliyati cheklangan jamiyati direktori, Jizzax viloyati

Djurayeva Komila Mavlanovna – Zarbdor tumanidagi «Zarbdor zirapchasi gul ko‘chatlarini yetishtirish tomorqa xizmati» mas’uliyati cheklangan jamiyati rahbari, Jizzax viloyati

Mannonov Umidjon Ulug‘bek o‘g‘li – Jizzax shahridagi «Euroasia gilamlari» mas’uliyati cheklangan jamiyati bosh direktori, Jizzax viloyati

Mo‘minov Sardor Shuxrat o‘g‘li – Zafarobod tumanidagi «Tasty Broyler Industry» mas’uliyati cheklangan jamiyati rahbari, Jizzax viloyati

Suvanova Yulduz Usmonovna – Jizzax shahridagi «Atlant Architects Group» mas’uliyati cheklangan jamiyati rahbari, Jizzax viloyati

Tojiboyev Maqsud Mahmudovich – Zomin tumanidagi «MJN Hous» xususiy korxonasi rahbari, Jizzax viloyati

Xodjayev Rustam Maxamadaliyevich – Baxmal tumanidagi «Baxmal Natural Juice» mas’uliyati cheklangan jamiyati rahbari, Jizzax viloyati

Astonova Marxabo Xurramovna – Shahrisabz tumanidagi «Hisor mebel» mas’uliyati cheklangan jamiyati ta’sischisi, Qashqadaryo viloyati

A’lamov Azimiddin Aslonovich – Kasbi tumanidagi «Saidazimxon» mas’uliyati cheklangan jamiyati rahbari, Qashqadaryo viloyati

Ganiyev Sanjar Xudoyberdiyevich – Kitob tumanidagi «Voha mash’ali» mas’uliyati cheklangan jamiyati direktori, Qashqadaryo viloyati

Inogamdjanov Davrug Davronovich – Ko‘kdala tumanidagi «Cotonella» mas’uliyati cheklangan jamiyati direktori, Qashqadaryo viloyati

Xurramov Nodirbek Normo‘minovich – Mirishkor tumanidagi «Normo‘min o‘g‘li Nodirbek» mas’uliyati cheklangan jamiyati rahbari, Qashqadaryo viloyati

Eshtemirov Sobir Abdullayevich – Ko‘kdala tumanidagi «Comfort Industrial Area» mas’uliyati cheklangan jamiyati ta’sischisi, Qashqadaryo viloyati

Gapparov Husniddin Shaxridinovich – Navoiy shahridagi «Xovandamir Holding» mas’uliyati cheklangan jamiyati rahbari, Navoiy viloyati

Jumaboyev Qudratjon Jumaboy o‘g‘li – Qiziltepa tumanidagi «SVS Navoiy» mas’uliyati cheklangan jamiyati rahbari, Navoiy viloyati

Karimov Zohid Zoirovich – Navbahor tumanidagi «Navbahor Agrolimon» mas’uliyati cheklangan jamiyati direktori, Navoiy viloyati

Kendjayev Elmurad Saidovich – Karmana tumanidagi shaxsiy tomorqa yer egasi, Navoiy viloyati

Tashbenbetov Yerjan Yermaxanovich – Konimex tumanidagi «Kanimex Max Drive» xususiy korxonasi rahbari, Navoiy viloyati

Umarov Shomurot Islomovich – Navbahor tumanidagi shaxsiy tomorqa yer egasi, Navoiy viloyati

Azizov Abdulxodi Rustamjonovich – To‘raqo‘rg‘on tumanidagi «Gold Fresh Fruits» mas’uliyati cheklangan jamiyati rahbari, Namangan viloyati

Axadov Adxam Akramovich – Yangi Namangan tumanidagi «Mexmash» mas’uliyati cheklangan jamiyati direktori, Namangan viloyati

Dadaxonov Murtaza Tursunxonovich – Kosonsoy tumanidagi «Osmon sayyorasi» fermer xo‘jaligi boshlig‘i, Namangan viloyati

Djurayev Toxir Turashxanovich – Namangan shahridagi «Fazman Tekstil» mas’uliyati cheklangan jamiyati bosh direktori, Namangan viloyati

Mayunusov Ildorjon Xakimjonovich – Davlatobod tumanidagi «Anturage-tex» mas’uliyati cheklangan jamiyati rahbari, Namangan viloyati

Muratov Bori Irgashevich – Chust tumanidagi «Megaton» mas’uliyati cheklangan jamiyati ta’sischisi, Namangan viloyati

Xodjimatov Baxrom Vaxidovich – Chust tumanidagi «Siberian Wellness-Namangan» mas’uliyati cheklangan jamiyati bosh direktori, Namangan viloyati

Ergashev Xurshidbek Yuldashevich – Pop tumanidagi «Active Chorkesar Light» mas’uliyati cheklangan jamiyati ta’sischisi, Namangan viloyati

Ganiyev Feruz Normamatovich – Samarqand tumanidagi «Asia Carpet Textile» mas’uliyati cheklangan jamiyati direktori, Samarqand viloyati

Zayniyev Muxriddin Mexrojiddin o‘g‘li – Urgut tumanidagi «Yec gilam» mas’uliyati cheklangan jamiyati bosh direktori, Samarqand viloyati

Ilmurotov Kudrat Urolovich – Pastdarg‘om tumanidagi «Qudrat zamin durdonasi» fermer xo‘jaligi boshlig‘i, Samarqand viloyati

Kazakova Mariya Rafailovna – Samarqand shahridagi «Prime Ceramics» mas’uliyati cheklangan jamiyati bosh direktori, Samarqand viloyati

Karimov Abdunabi Abduxakimovich – Kattaqo‘rg‘on tumanidagi «Nurli Miyonkol» fermer xo‘jaligi boshlig‘i, Samarqand viloyati

Norov Sunnatulla Alimdjanovich – Urgut tumanidagi «Gardencells» mas’uliyati cheklangan jamiyati rahbari, Samarqand viloyati

O‘rolov Alisher Shuxrat o‘g‘li – Samarqand shahridagi «Enjoy Fly» mas’uliyati cheklangan jamiyati ta’sischisi, Samarqand viloyati

Xushiyev Shohzodjon Inatilla o‘g‘li – Narpay tumanidagi «Agro Gold Spring» fermer xo‘jaligi boshlig‘i, Samarqand viloyati

Yusubayev Azizbek Maxamadjon o‘g‘li – Bulung‘ur tumanidagi «Samarkand Garden Plast» mas’uliyati cheklangan jamiyati rahbari, Samarqand viloyati

Yalgashev Baxtiyor Tashtemirovich – Oqdaryo tumanidagi «Meganut food dried fruits import-export trading LTD» xorijiy korxonasi direktori, Samarqand viloyati

Ganiyev Aziz Salimovich – Guliston shahridagi «Don Miks» mas’uliyati cheklangan jamiyati direktori, Sirdaryo viloyati

Dushabayev Akmal Nurmatovich – Mirzaobod tumanidagi «Navro‘z total textile» mas’uliyati cheklangan jamiyati direktori, Sirdaryo viloyati

Ibragimova Robiya Shavkatovna – Xovos tumanidagi «RS Success Agro» mas’uliyati cheklangan jamiyati ta’sischisi, Sirdaryo viloyati

Kuduzov Maxmud Salamovich – Sirdaryo tumanidagi «River Med Pharm» mas’uliyati cheklangan jamiyatining ishlab chiqarish bo‘yicha direktori, Sirdaryo viloyati

Mamatkulov Jaxongir Arifdjanovich – Mirzaobod tumanidagi «Fs Logistics» mas’uliyati cheklangan jamiyati direktori, Sirdaryo viloyati

Abdukerimov Zafarjon Baxtiyer o‘g‘li – Termiz tumanidagi «Termiz International Trade Centre» mas’uliyati cheklangan jamiyati direktorining o‘rinbosari, Surxondaryo viloyati

Anorov Sherzod Xolmurzayevich – Termiz shahridagi «Me’mor Inter Stroy» mas’uliyati cheklangan jamiyati rahbari, Surxondaryo viloyati

Djurayev Baxodir Ismailovich – Qumqo‘rg‘on tumanidagi «Joziba mebel» xususiy korxonasi rahbari, Surxondaryo viloyati

Ochilov Murodjon Maxamadiyevich – Termiz tumanidagi «Gold Dried Fruits Export» mas’uliyati cheklangan jamiyati rahbari, Surxondaryo viloyati

Xolmuminov Axrorjon Ilxomovich – Denov tumanidagi «Inter Prof City Stroy» mas’uliyati cheklangan jamiyati direktori, Surxondaryo viloyati

Abdullayev Jamshid Zafarovich – Zangiota tumanidagi «Zangiota tomorqa xizmati export» mas’uliyati cheklangan jamiyati ta’sischisi, Toshkent viloyati

Ataxanov Abduraxim Latifovich – Chirchiq shahridagi «Alkim Tekstil» mas’uliyati cheklangan jamiyati rahbari, Toshkent viloyati

Zakirov Sanjar Taxirovich – Yangiyo‘l tumanidagi «International Paper» mas’uliyati cheklangan jamiyati ta’sischisi, Toshkent viloyati

Kushbakov Ilxom Zakirjanovich – Bekobod tumanidagi «Qo‘shboq ota» fermer xo‘jaligi boshlig‘i, Toshkent viloyati

Muxsinov Fayoz Munisovich – Chirchiq shahridagi «Indigo Garments» mas’uliyati cheklangan jamiyati ta’sischisi, Toshkent viloyati

Nazarov Baxram Absatarovich – Oqqo‘rg‘on tumanidagi «Qo‘chqor chavandoz» fermer xo‘jaligi boshlig‘i, Toshkent viloyati

Normatov Ravshan Ishmatovich – Bo‘stonliq tumanidagi «Osborn Textile» xorijiy korxonasi direktori, Toshkent viloyati

Jorayev Rustam Polatxanovich – Farg‘ona shahridagi «Zhongming Metal Products» mas’uliyati cheklangan jamiyati ta’sischisi, Farg‘ona viloyati

Zakirov Kamoliddin Yunusaliyevich – Farg‘ona shahridagi «Xayrixon Kamol orzu» oilaviy korxonasi rahbari, Farg‘ona viloyati

Kim Aleksandr Vyacheslavovich – Quvasoy shahridagi «Quvasoyshifer Hrizotil» mas’uliyati cheklangan jamiyati bosh direktori, Farg‘ona viloyati

Nasimov Elmurod Voxidovich – Buvayda tumanidagi «Wire cable system group» xususiy korxonasi rahbari, Farg‘ona viloyati

Temirov Qurbonbek Abdumalikovich – Furqat tumanidagi «Oybek Temirov» fermer xo‘jaligi boshlig‘i, Farg‘ona viloyati

To‘xtaboyev Orifjon Odiljonovich – O‘zbekiston tumanidagi «Star Genius» mas’uliyati cheklangan jamiyati ta’sischisi, Farg‘ona viloyati

Xamzayev Shavkat Xamidovich – Uchko‘prik tumanidagi «Great Kokand» mas’uliyati cheklangan jamiyati ta’sischisi, Farg‘ona viloyati

Djumaniyazov Raxim Ilxamovich – Urganch shahridagi «Matbaa Paper» mas’uliyati cheklangan jamiyati rahbari, Xorazm viloyati

Mirzayeva Lola Shavkatovna – Xiva shahridagi «Khiva Plaza» mas’uliyati cheklangan jamiyati direktori, Xorazm viloyati

Raximov Muzaffar Baxramovich – Xiva tumanidagi «Khiva Silk Fabris» mas’uliyati cheklangan jamiyati rahbari, Xorazm viloyati

Ro‘zmetov Bahodir Boyjonovich – Yangiariq tumanidagi «Bahodir and sons» bog‘dorchilik fermer xo‘jaligi boshlig‘i, Xorazm viloyati

Ro‘zmetov Xursandbek Yo‘ldoshevich – Yangiariq tumanidagi «Ostona mebel servis» xususiy korxonasi rahbari, Xorazm viloyati

Rustamov Ollashukur Shuxratovich – Xiva shahridagi «Sofra» mas’uliyati cheklangan jamiyati rahbari, Xorazm viloyati

Abdullayev Farrux Xabibulla o‘g‘li – Yakkasaroy tumanidagi «Bellissimo Pizza International» mas’uliyati cheklangan jamiyati ta’sischisi, Toshkent shahri

Abdullayev Elmurod Toxirmirzaevich – Yunusobod tumanidagi «Sun-Hightech» mas’uliyati cheklangan jamiyati bosh direktori, Toshkent shahri

Abdullayeva Frangiza Abdullayevna – O‘zbekiston mehmonxonalar uyushmasi raisi

Abidov Rustam Abdukaxarovich – Toshkent shahridagi «Black Pilaf» mas’uliyati cheklangan jamiyati direktori

Akramov Alisher Djamshedovich – Toshkent shahridagi «Sirovarnya Super Food» mas’uliyati cheklangan jamiyati ta’sischisi

Alimuxamedov Alisher Baxtiyarovich – Bektemir tumanidagi «Rio International» xususiy korxonasi direktori, Toshkent shahri

Djalilov Otabek Zafarbekovich – Mirobod tumanidagi «Avrud» mas’uliyati cheklangan jamiyati rahbari, Toshkent shahri

Isayev Alisher Maxmudxodjayevich – Mirobod tumanidagi «Sales Doctor» mas’uliyati cheklangan jamiyati rahbari, Toshkent shahri

Ismailov Kaxraman Kambulovich – Toshkent shahridagi «Sazanchik Premium» mas’uliyati cheklangan jamiyati ta’sischisi

Israilova Gulchexra Baxodirovna – O‘zbekiston xususiy sayyohlik tashkilotlari uyushmasi raisi

Kadirov Rovshan Baxramovich – Chilonzor tumanidagi «Metal Processing Technology» mas’uliyati cheklangan jamiyati ta’sischisi, Toshkent shahri

Karimov Abdugafur Abduvaxobovich – Chilonzor tumanidagi «Radiks» mas’uliyati cheklangan jamiyati direktori, Toshkent shahri

Karimova Diora Orifovna – Mirobod tumanidagi «Artisan bread» mas’uliyati cheklangan jamiyati bosh texnologi, Toshkent shahri

Kasimova Dildora Mirgiyosovna – Toshkent shahridagi yakka tartibdagi tadbirkor, hunarmand-tikuvchi

Kayumov Shoxrux Shavkatovich – Toshkent shahridagi «Trusted Textile Marketplace» mas’uliyati cheklangan jamiyati ta’sischisi

Latipov Maxmudjan Nadjimidinovich – Shayxontohur tumanidagi «Mediapark Group» mas’uliyati cheklangan jamiyati ta’sischisi, Toshkent shahri

Malikov Yorqinjon Erkindjanovich – O‘zbekiston eksportchilari uyushmasi raisi

Mirzaaxmedov Diyor Akramovich – O‘zbekiston marketing uyushmasi raisi

Nasretdinov Saidvali Saidnabiyevich – Shayxontohur tumanidagi «Agro Prodex Group» mas’uliyati cheklangan jamiyati ta’sischisi, Toshkent shahri

Nuritdinov Sardorbek Maxammatjonovich – Toshkent shahridagi «Marco Polo Central Asia Travel» mas’uliyati cheklangan jamiyati rahbari

Rasulev Farxod Kaxramanovich – Yakkasaroy tumanidagi «Dolores Travel Services» mas’uliyati cheklangan jamiyati ta’sischisi, Toshkent shahri

Sabirov Nigmatullo Zakirovich – Chilonzor tumanidagi «Finland Butter» mas’uliyati cheklangan jamiyati ta’sischisi, Toshkent shahri

Saliyev Umidillo Xabibullayevich – Yangihayot tumanidagi «Original Textile and Print» mas’uliyati cheklangan jamiyati bosh direktori, Toshkent shahri

Usmanov Sardarbek Yigitaliyevich – Toshkent shahridagi «Saas Teks Invest» mas’uliyati cheklangan jamiyati rahbari

Xolboyev Shavkatbek Xumaydullayevich – Toshkent shahridagi «Metsol» mas’uliyati cheklangan jamiyati direktori

O‘zbekiston Respublikasi Prezidenti   

Sh.Mirziyoyev

---

---

O‘zbekiston Respublikasi Prezidenti Shavkat Mirziyoyev 17-avgust kuni Rossiya Federatsiyasi Prezidenti Vladimir Putin bilan telefon orqali muloqot qildi.

Xalqaro va ikki tomonlama kun tartibining dolzarb jihatlari muhokama qilindi.

Rossiya Prezidenti davlatimiz rahbariga 15-avgust kuni Ankorij shahrida o‘tgan Rossiya-AQSH sammitining asosiy natijalari to‘g‘risida ma’lumot berdi.

Davlatimiz rahbari erishilgan kelishuvlarni qo‘llab-quvvatlab, Ukraina atrofidagi vaziyat tez fursatda tartibga solinishiga umid bildirdi.

Savdo-iqtisodiy hamkorlikning hozirgi sur’atini saqlab qolish hamda O‘zbekiston va Rossiya korxonalarining ustuvor kooperatsiya loyihalarini jadallashtirishga qaratilgan muvofiqlashtirilgan choralar ko‘rish masalalari ham ko‘rib chiqildi. Barcha darajalarda faol muloqot va almashinuvlarni davom ettirish muhimligi qayd etildi.

---

---

Prezident Shavkat Mirziyoyev 14-avgust kuni chiqindilarni qayta ishlashni kengaytirish chora-tadbirlari bo‘yicha taqdimot bilan tanishdi.

Yurt obodligi va aholi salomatligida katta o‘rin tutadigan bu sohaga zamonaviy yondashuvlar olib kirilmoqda. Oxirgi uch yilda barcha manbalardan 2 trillion so‘mdan ziyod mablag‘ yo‘naltirildi. O‘tgan yili Chiqindilarni boshqarish va sirkulyar iqtisodiyotni rivojlantirish agentligi tashkil etildi.

Chiqindi korxonalari uchun 1 ming 200 ta yangi texnika olib berildi. Mahallalarda chiqindi maydonchalari qurildi. To‘plash va tashib ketish yaxshilangani natijasida bu tarmoq ikkilamchi xomashyo manbaiga aylandi.

Avvallari davlat monopoliyasida bo‘lgan sohada tadbirkorlikka yo‘l ochilib, qulay biznes muhiti yaratildi. Jumladan, sanitar-tozalash hamda chiqindini qayta ishlash korxonalari uchun foyda solig‘i va ijtimoiy soliq stavkalari 1 foiz etib belgilandi. Chetdan olib kelinadigan texnika va uskunalar import bojidan ozod qilindi. Natijada 200 ga yaqin sanitar-tozalash va 290 ta chiqindini qayta ishlash korxonalari ochildi.

Taqdimotda mutasaddilar sohadagi loyihalarning borishi va galdagi rejalar haqida axborot berdi.

Yurtimizda yiliga 14 million tonna maishiy chiqindi hosil bo‘ladi. Lekin ularni qayta ishlash darajasi past. So‘nggi yillardagi loyihalar natijasida bu endi 5 foizga yetdi.

Chiqindini yoqish orqali energiya ishlab chiqarish loyihalari qo‘llab-quvvatlanmoqda. Xitoylik investorlar 6 ta viloyatda shunday zavodlar qurayapti. Davlat chiqindi utilizatsiyasi uchun ularga to‘lov qilish bilan birga, hosil bo‘lgan energiyani sotib olish bo‘yicha ham majburiyat olayapti.

Yaqinda Toshkent shahrida tibbiyot chiqindisini yoqib, issiqlik oladigan ikkita korxona ishga tushirildi. Yana Samarqandda 2 ta, qolgan hududlarda bittadan shunday zavodlar qurilishi mo‘ljallangan.

Maishiy chiqindilarning to‘rtdan biri qog‘oz, plastik, rezina, shisha, to‘qimachilik qoldiqlariga to‘g‘ri keladi. Ularni qayta ishlab, 1 trillion so‘mlik mahsulot olish mumkinligi aytildi. Bundan tashqari, yurtimizda qayta ishlanmaydigan qurilish, kimyo, elektron, texnik va sanoat moylari bo‘yicha katta zaxira borligi ko‘rsatib o‘tildi.

Chiqindini tashib ketish xizmatlari aholini rozi qiladigan darajada bo‘lishi kerakligi ta’kidlandi. Shu bois mahallaga chiqindi texnikasining kelish vaqti va harakatini onlayn ko‘rish imkoniyatini yaratish vazifasi qo‘yildi.

Ijtimoiy muassasalar va mahallalarni chiqindi konteynerlari bilan to‘liq ta’minlash bo‘yicha ikki yillik dastur ishlab chiqilishi belgilandi. Aholida ekologik madaniyatni bog‘cha va maktabdan boshlab shakllantirish muhimligi ta’kidlandi.

---

---

O‘zbekiston Respublikasi Prezidenti Shavkat Mirziyoyev 14-avgust kuni mamlakatimizdagi diplomatik missiyasini yakunlayotgan Fransiya Respublikasining Favqulodda va Muxtor Elchisi Oreliya Bushezni qabul qildi.

Davlatimiz rahbari Fransiya elchisining samarali faoliyati hamda mamlakatlarimiz o‘rtasidagi strategik sheriklik munosabatlarini rivojlantirish va mustahkamlashga qo‘shgan shaxsiy hissasini alohida qayd etdi.

Bo‘lib o‘tgan oliy darajadagi o‘zaro tashriflar O‘zbekiston-Fransiya hamkorligini sifat jihatidan yangi bosqichga ko‘tarish, uning kun tartibini aniq mazmun bilan boyitishga xizmat qilgani ta’kidlandi.

Turli darajalarda tizimli muloqot va faol aloqalar yo‘lga qo‘yilgan. Savdo-iqtisodiy sohada sezilarli muvaffaqiyatlarga erishildi: keyingi yillarda tovar ayirboshlash 4 barobar ko‘paydi, Fransiyaning yetakchi kompaniya va tashkilotlari bilan umumiy qiymati 10 milliard dollardan ziyod loyihalar amalga oshirilmoqda.

Ta’lim, sog‘liqni saqlash va madaniy-gumanitar almashinuv sohalarida muhim dasturlar amalga oshirilmoqda. Luvr muzeyi va Arab dunyosi institutida ko‘rgazmalar katta muvaffaqiyat bilan o‘tdi.

Parij shahri yaqinida Beruniy haykali ochildi. Fransiya poytaxtidagi ko‘chaga Samarqand nomi berildi. Joriy yilda Toshkent shahrida O‘zbekiston-Fransiya universiteti o‘z ishini boshlaydi.

Uchrashuv yakunida O‘zbekiston Prezidenti Fransiya Favqulodda va Muxtor Elchisi Oreliya Bushezga mamlakatlarimiz o‘rtasida do‘stlik va strategik sheriklik munosabatlarini mustahkamlashga qo‘shgan katta hissasi uchun «Do‘stlik» ordenini topshirdi.

Elchi xonim uning diplomatik missiyasi yuksak baholangani hamda O‘zbekiston va Fransiya o‘rtasidagi keng ko‘lamli hamkorlikni rivojlantirishni har tomonlama qo‘llab-quvvatlayotgani uchun davlatimiz rahbariga samimiy minnatdorlik bildirdi.

---

O‘zbekiston Respublikasi Prezidentining Farmoni

O‘zbekiston va Fransiya o‘rtasida strategik sheriklik munosabatlarini o‘rnatish va chuqurlashtirishga qo‘shgan shaxsiy hissasi, siyosiy muloqot va davlatlararo hamkorlikni rivojlantirish, savdo-iqtisodiy, investitsiyaviy, ta’lim, sog‘liqni saqlash, sayyohlik, ilmiy-texnikaviy sohalarda o‘zaro manfaatli qo‘shma dastur va loyihalarni amalga oshirish, mamlakatimizning global va mintaqaviy tashabbuslarini faol qo‘llab-quvvatlash borasidagi alohida xizmatlari, shuningdek, xalqlarimiz orasida do‘stlik rishtalari, hamjihatlik va madaniy-gumanitar aloqalarni mustahkamlash yo‘lidagi amaliy sa’y-harakatlari uchun Fransiya Respublikasining O‘zbekiston Respublikasidagi Favqulodda va Muxtor Elchisi Oreliya Bushez xonim O‘zbekiston Respublikasining «Do‘stlik» ordeni bilan mukofotlansin.

O‘zbekiston Respublikasi Prezidenti

Sh.Mirziyoyev

---

---

Prezident Shavkat Mirziyoyev raisligida 13-avgust kuni to‘qimachilik sohasida eksport imkoniyatlari va zaxiralarni ishga solish masalalari bo‘yicha videoselektor yig‘ilishi o‘tkazildi.

To‘qimachilik mamlakatimiz iqtisodiyoti hajmining 3 foizini, sanoatning 14 foizini yaratayotgan yirik tarmoqdir. Bu yo‘nalishda 500 mingdan ortiq odam ish bilan band. So‘nggi besh yilda 3,5 milliard dollarlik 396 ta korxona ishga tushdi. Ishlab chiqarish hajmi 10 milliard dollarga yetdi.

Lekin dunyo bozoridagi o‘zgaruvchan vaziyat, talab va narx pasayishi sohani qo‘llab-quvvatlash bo‘yicha tezkor choralar ko‘rishni taqozo etmoqda.

So‘nggi uch yilda jahonda paxta narxi tonnasiga o‘rtacha 3 ming dollardan 1,5 ming dollarga tushdi. Bunga moslashish uchun 2022-2023-yillar uchun paxta xomashyosiga berilgan imtiyozli kredit 3 marta uzaytirildi, o‘tgan yili har bir tonnaga 1 million so‘mdan subsidiya berildi.

Ko‘plab to‘qimachilik korxonalarining tijorat kreditidan qarzdorligi bor. Atigi 16 foiz korxona xalqaro sertifikatga ega. Oqibatda ularning tashqi bozorda raqobat qilishi qiyin kechmoqda.

O‘zbekistonga nisbatan “paxta boykoti” bekor qilinganiga ancha bo‘ldi. Shuningdek, mamlakatimiz Yevropaga bojsiz eksport qilish imkonini beruvchi “GSP+” imtiyozlar tizimiga qo‘shilgan. Lekin brendlar bilan hamkorlik va eksport miqyosi bunga yarasha emas.

Sohadagi shu kabi muammolarni o‘rganish uchun, Prezident topshirig‘iga ko‘ra, 200 dan ortiq tadbirkorlar bilan muloqot qilindi. Yig‘ilishda ularning tahlilidan kelib chiqib, yangi imkoniyat va vazifalar belgilandi.

Avvalo, moliyaviy sog‘lomlashtirish va tannarxni kamaytirish masalalariga e’tibor qaratildi.

Bu yil klasterlarning 2022-2023-yillar hosili uchun kreditdan qarzdorligi garov qo‘yish sharti bilan besh yilgacha uzaytirilgan edi. Endi, 1-avgustdan garovi tayin klasterlar faqat asosiy qarzni to‘laydi. Qishloq xo‘jaligi jamg‘armasi va banklarga hisoblanadigan foizlar esa asosiy qarz to‘liq qoplanganidan keyin undiriladi. Agar klasterlar ham asosiy qarz, ham foizini o‘z vaqtida to‘lasa, foizning jamg‘armaga ketadigan qismining yarmi tadbirkorga qaytariladi.

Shuningdek, klasterlarga 2022-2023-yillar hosili uchun berilgan kredit bo‘yicha 1-avgust holatiga yuzaga kelgan 377 milliard so‘mlik penyadan voz kechiladi. Tijorat kreditidan majburiyati bo‘lgan 144 ta korxonani moliyaviy sog‘lomlashtirishga ko‘maklashiladi.

Bu yilgi paxta hosilini o‘z vaqtida terib olish uchun fermerlarga tonnasiga 1 million so‘mdan subsidiya beriladi. Korxonalar o‘z mablag‘i hisobidan paxta yetishtirsa yoki xarid qilsa, xomashyo qiymatining 10 foizi qoplab beriladi.

Endilikda to‘qimachilik zanjiridagi barcha korxonalarga ijtimoiy soliq stavkasi 1 foiz qilib belgilanadi. Bunda ijtimoiy reyestr bo‘yicha talab bekor qilinadi, umumiy faoliyatda to‘qimachilik ulushiga talab esa 90 foizdan 70 foizga tushiriladi.

O‘z xodimlarining bolalari uchun bog‘cha tashkil qilgan korxonalarga, xuddi xususiylardagi kabi, har bir tarbiyalanuvchi bo‘yicha subsidiya ajratiladi.

Ip-kalavaning tannarxiga elektr energiyasi qiymati ham ta’sir qilyapti. Shu bois endi korxonalarga o‘z ehtiyoji uchun o‘rnatilgan quyosh panellarini tarmoqqa ulashga ruxsat beriladi.

Bunday imkoniyatlar faoliyatni rivojlantirish uchun tayanch bo‘ladi. O‘zida tolani qayta ishlash quvvati yo‘q klasterlar ip-yigiruv korxonalari bilan samarali kooperatsiya tizimini yo‘lga qo‘yishi zarur. Aks holda, keyingi yildan ularning klaster maqomi bekor qilinadi va paxta hosili uchun imtiyozli kredit berilmaydi.

Hukumatga bunday klasterlar uchun jozibador moliyaviy choralar joriy qilish topshirildi.

Yig‘ilishda ishlab chiqarish va eksportni oshirish masalalari ham atroflicha tahlil qilindi.

Yurtimizda tayyorlanayotgan ip-kalava va matoning narxi raqobatchilarga nisbatan o‘rtacha 10-15 foiz yuqori. Chunki mahsulotlarimiz tarkibining 90 foizi paxta. Dunyoda esa sun’iy tola va aralash mato ko‘p ishlatiladi.

Shu bois korxonalarimizni arzon xomashyo bilan ta’minlash maqsadida 2028-yil 1-yanvargacha aralash mato va gazlama bojxona bojidan ozod etilishi belgilandi.

Endi bir nechta bo‘yoq korxonalari birlashib, suv tozalash inshootini qurmoqchi bo‘lsa, xarajatining bir qismi Savdoni rivojlantirish kompaniyasidan qoplab beriladi.

Eksportchi korxonalarga tumanlarda filial ochish uchun Savdoni rivojlantirish kompaniyasidan besh yil muddatga 10 milliard so‘mgacha Markaziy bank asosiy stavkasida kredit ajratiladi. Xorijlik dizayner, texnolog, konstruktor va marketologlarning oylik maoshi qoplab beriladi. Faqat sharti – 200 ta ish o‘rni ochish va odamlarga munosib ish haqi to‘lash kerak.

Dunyo bozorlariga chiqishda eng muhim masala – sifat va standart. Shu bois Texnik tartibga solish agentligiga to‘qimachilik korxonalarining xalqaro sertifikat olishiga ko‘maklashib, ularni 300 taga yetkazish vazifasi qo‘yildi.

Yevropa va AQSH bozoriga tayyor kiyim-kechak eksportini kengaytirish muhimligi ta’kidlandi. Xususan, Amerikada yiliga qariyb 100 milliard dollarlik to‘qimachilik bozori bor. Talabga moslashish orqali unda o‘rin egallash mumkin. Shu maqsadda Nyu-York va Sent-Luis shaharlarida savdo uylari ochish bo‘yicha ko‘rsatma berildi.

Tashqi ishlar vazirligi va elchilarga yirik brendlar bilan hamkorlik bo‘yicha “yo‘l xaritasi” ishlab chiqish, ularni Toshkentda bo‘ladigan yirik ko‘rgazmaga taklif qilish topshirildi.

Korxonalar faoliyatida sun’iy intellektni qo‘llash orqali daromadni 20-30 foizga oshirish hamda yashirin iqtisodiyot omilini kamaytirish mumkinligi qayd etildi. Bu borada to‘qimachilik korxonalarida “ERP” tizimini joriy qilish bo‘yicha dastur ishlab chiqiladi.

Yig‘ilishda tashkiliy masala ham ko‘rildi. Jahonda savdo qoidalari tez o‘zgarayotgan sharoitda soha boshqaruvida alohida yondashuvga zarurat tug‘ilayotgani aytildi.

Shu bois Yengil sanoatni rivojlantirish agentligi tashkil qilinadigan bo‘ldi. U to‘qimachilik, charm va ipaksanoat tarmoqlariga mas’ul bo‘ladi.

Agentlik uchun alohida jamg‘arma tuzilib, davlat ko‘magi va korxonalarga arzon aylanma mablag‘ u orqali beriladi. Jamg‘armaga 200 million dollar ajratiladi. Tashkilot huzurida tajribali tadbirkorlardan iborat kengash ham tuziladi.

Yangi agentlikka mazkur kengash bilan birga tannarx, ishlab chiqarish va eksport bo‘yicha natijadorlikni oshirish, kooperatsiyani kuchaytirib, past quvvatda ishlayotgan korxonalarni sog‘lomlashtirish vazifasi qo‘yildi. Xalqaro maslahatchilarni jalb etib, to‘qimachilikni 2030-yilgacha rivojlantirish dasturini ishlab chiqish, shuningdek, charm, ipak va gilamchilik sanoatini kengaytirish bo‘yicha topshiriqlar berildi.

Bosh vazirga belgilangan vazifalar ijrosi ustidan qat’iy nazorat o‘rnatish topshirildi.

Yig‘ilishda sohadagi namunali tajribalar ko‘rib chiqildi, tarmoq rahbarlari va tadbirkorlarning fikrlari eshitildi.

---

---

Prezident Shavkat Mirziyoyev 12-avgust kuni Buxoro viloyatida islohotlar natijadorligi va yangi loyihalar muhokamasi yuzasidan yig‘ilish o‘tkazdi.

Ilgari bu hudud iqtisodiyoti sanoqli tarmoqlar bilan cheklangan edi. So‘nggi sakkiz yilda viloyatga 8 milliard dollardan ortiq investitsiya jalb etilib, iqtisodiyot tarkibi kengaydi. Birgina sanoat sohasida 6 mingta yangi korxona ochildi. Sanoat mahsulotlari ishlab chiqarish hajmi 6 barobardan ziyod oshdi.

Turizm infratuzilmasi yaxshilanib, yangi maskanlar tashkil etildi. Nufuzli mehmonxona brendlari kirib keldi. Yillik sayyohlar soni 1 million 700 ming nafarga yetdi.

O‘zbekiston Prezidentining 2024-yil 5-dekabrdagi qarori bilan Buxoro viloyatida sanoat va xizmat ko‘rsatish sohasini rivojlantirish bo‘yicha qo‘shimcha chora-tadbirlar belgilangan edi. Natijada joriy yil 6 oyda sanoat mahsulotlari ishlab chiqarish 7,3 foizga oshdi. 198 ta yangi sanoat korxonasii tashkil topdi. Yalpi hududiy mahsulot hajmi 6,4 foizga o‘sdi.

Davlatimiz rahbari tashabbusiga muvofiq tuzilgan “Islohotlar shtabi” Buxoroda ham qo‘shimcha imkoniyatlarni yuzaga chiqarmoqda. Taqdimotda mutasaddilar ana shunday yangi loyihalar to‘g‘risida axborot berdi.

Masalan, turkiyalik tadbirkorlar Peshku tumanida grafit qazib olish va qayta ishlashga qiziqish bildirgan. Vetnam kompaniyasi zamonaviy turar joy, Hindiston korxonasi jarrohlik markazi qurishni rejalashtirgan. 217 gektar maydonda 260 ta loyihani amalga oshirib, 10 mingdan ortiq yangi ish o‘rni yaratish mo‘ljallangan.

Umuman, viloyatda 1 milliard 700 million dollarlik 21 ta yangi loyiha shakllantirilgan. Ularning natijasida 32 ming ish o‘rni, 180 million dollarlik eksport imkoniyati ochilishi ko‘zda tutilgan.

Prezidentimiz hudud iqtisodiyotini rivojlantirish va aholi bandligini ta’minlash bo‘yicha qo‘shimcha imkoniyatlarni ko‘rsatib o‘tdi.

Xususan, Peshku tumanida aholiga ijaraga berilgan yerlarda arzon issiqxonalar qurib, eksportbop ekinlar yetishtirish yo‘lga qo‘yilgan. Bu tajribani ommalashtirib, viloyat bo‘yicha qo‘shimcha 5 ming xonadonda shunday issiqxonalar tashkil etish vazifasi qo‘yildi.

Shofirkon, G‘ijduvon, Peshku va Buxoro tumanlaridagi 10 ming gektarda uzum, Vobkent, G‘ijduvon, Jondor, Romitan va Kogonda 5 ming gektarda o‘rik, gilos, anjir kabi eksportbop meva bog‘larini barpo qilish bo‘yicha topshiriq berildi.

Buxoroning qadim ziyoratgohlari mashhur. Lekin sayyohlarni ko‘p vaqt olib qoladigan yirik majmualar yo‘q. Xorijlik investorlarni jalb etib, savdo va ko‘lgilochar park ochish zarurligi ko‘rsatib o‘tildi.

Yana bir katta yo‘nalish – sanoat. Viloyatda 2 ta yirik neft-gaz korxonasi bor, yana biri barpo etilayapti, 10 ta yirik quyosh va shamol stansiyalari qurilishi jadallashgan. Bu majmualar atrofida kichik-kichik korxonalarni joylashtirib, investitsiya, sanoat va eksport hajmini oshirish mumkinligi aytildi.

Buxoro viloyati va tuman hokimlari aholi uchun daromad manbalarini ko‘paytirib, kambag‘allik va ishsizlikni kamaytirish bo‘yicha rejalarini bayon qildi.

---

---

Prezident Shavkat Mirziyoyev 12-avgust kuni suv resurslarini boshqarish va irrigatsiya sektorini rivojlantirishga oid takliflar taqdimoti bilan tanishdi.

Suv tanqis bo‘lgan mintaqamizda uni qadrlash va tejash juda dolzarb masala. O‘zbekistonda bunga doimiy e’tibor qaratilib, sug‘orish tarmoqlari ta’mirlanmoqda, suv tejovchi texnologiyalar joriy qilinmoqda.

Xususan, 2020-2024-yillarda shu maqsadlarga 60 trillion so‘m byudjet mablag‘lari hamda 622 million dollar xorijiy investitsiya yo‘naltirilgan. Natijada, 2020-yilda suv tejovchi texnologiyalar qo‘llangan maydonlar jami sug‘oriladigan maydonlarga nisbatan 4 foizni tashkil etgan bo‘lsa, 2025-yilga kelib bu ko‘rsatkich 50 foizga yetgan.

Endi bu ishlarning izchil davomi sifatida, suv resurslarini boshqarish va irrigatsiya sektorini rivojlantirishning 2025–2028-yillarga mo‘ljallangan dasturi ishlab chiqildi.

Taqdimotda mutasaddilar unda nazarda tutilgan chora-tadbirlar to‘g‘risida axborot berdi.

Dasturda suv resurslaridan oqilona foydalanishga ustuvor ahamiyat qaratilgan. Shu maqsadda 2 ming 551 kilometr irrigatsiya tarmoqlari rekonstruksiya qilinishi belgilangan. Nasos stansiyalaridagi eski uskunalarni tejamkoriga almashtirish orqali ularning yillik elektr energiyasi iste’molini 6,8 milliard kVt/soatdan 6,2 milliard kVt/soatgacha kamaytirish mo‘ljallangan.

Yerlarning holati ham suv sarfida muhim omil hisoblanadi. Shu bois dasturda suv ta’minoti past bo‘lgan sug‘oriladigan maydonlarni 424 ming gektardan 276 ming gektargacha kamaytirish ko‘zda tutilgan. Turli darajada sho‘rlangan hamda yerosti suvining sathi muammoli bo‘lgan maydonlar ham kamaytiriladi. Natijada foydalanishdan chiqib ketgan 460 ming gektar yer ekishga qaytariladi.

Yana 1 million 400 ming gektar yerda suv tejovchi, shu jumladan, 293 ming gektarda tomchilatib sug‘orish texnologiyasi joriy etiladi. 20 ta yirik inshootlarda nazorat-o‘lchov uskunalari modernizatsiya qilinadi.

Suv hisobini yuritishda inson omilini kamaytirish ham muhim. Bu borada 12 mingta meliorativ kuzatuv qudug‘ida hamda 1 ming 750 ta nasosda zamonaviy monitoring yo‘lga qo‘yiladi. 12 ta yirik suv xo‘jaligi inshooti raqamli texnologiyalar asosida avtomatlashtirilgan boshqaruvga o‘tkaziladi.

Umuman, dastur natijasida beton qoplamali kanallar ulushi hozirgi 39 foizdan 47 foizga yetadi. Irrigatsiya tarmoqlarining sifati oshib, yo‘qotishlar kamayadi. Tejamkorlik hisobiga bu yil 10 mlrd kub metr, 2028-yilga borib 14 mlrd kub metr suv iqtisod qilinishi kutilmoqda.

Davlatimiz rahbari bu takliflarni ma’qullab, O‘zbekiston Respublikasida suv resurslarini boshqarish va irrigatsiya sektorini rivojlantirishning 2025-2028-yillarga mo‘ljallangan dasturini tasdiqladi.

Taqdimotda, shuningdek, sohada samaradorlikni oshirish, raqamlashtirish, xususiy sektor ishtirokini kengaytirish borasidagi ishlar to‘g‘risida ham axborot berildi.

Hozirgi kunda viloyatlar, tumanlar va xo‘jaliklar miqyosidagi 18 ming 755 ta gidropostni avtomatlashtirish boshlangan. Keyingi bosqich dalalarga suv taqsimlovchi nuqtalarda rejalashtirilgan.

Suv xo‘jaligini raqamlashtirish masalasiga alohida to‘xtalib o‘tildi. Sohaga daxldor idoralardagi 11 ta dasturni integratsiya qilib, yagona platforma ishlab chiqish, IT-markaz va Vaziyatlar markazi tashkil etish bo‘yicha topshiriq berildi. Bunda “O‘zbekkosmos” imkoniyatlaridan keng foydalaniladi.

5 ming 200 ta nasosni elektr va suv hisoblagichlar bilan jihozlash, yirik nasoslarni muqobil energiyaga o‘tkazish vazifasi qo‘yildi. Bunda olinadigan ma’lumotlar raqamli platformada jamlanadi, suvning iqtisodiy samaradorligi tahlil qilib boriladi.

Bugungi kunda 2 ming 612 ta suv obyekti davlat-xususiy sheriklikka berilgan. Endi yirik nasoslar ham xususiy sektorga taklif qilinadi. Ularning har biri uchun alohida jozibador shartlar ishlab chiqiladi.

O‘tgan yili tuman irrigatsiya bo‘limlari negizida 159 ta “Suv yetkazib berish xizmatlari” davlat muassasasi tashkil qilingan edi. Ushbu quyi bo‘yin faoliyatini yaxshilash maqsadida endi ularga o‘z mablag‘ini mustaqil taqsimlash huquqini berish ko‘zda tutilmoqda.

Sohada xizmatlarni yaxshilash va samaradorlikni ta’minlash mutaxassislar tajribasiga ham bog‘liq. Shu maqsadda 200 o‘rinli malaka oshirish markazi tashkil etish rejalashtirilmoqda.

Prezidentimiz sohaga oid me’yoriy hujjatlarni takomillashtirish, suvdan foydalanish samaradorligini oshirish,  jamiyatda suvni tejash madaniyatini kuchaytirish bo‘yicha ko‘rsatmalar berdi.